1  ✡ Hir 46:2-26; Isi 29:1–32:32.Seini ka lalag te Magbebaye ne Manama ne igpanengneng ne egkeyitabu diye te Ihiptu:

Eggendiye te Ihiptu ka Magbebaye ne eg-untud te meiyal ne gapun. Ne egmangelkelen ka me diyus-diyus te Ihiptu diye te tangkaan te Magbebaye wey egkaawaan e te kabulut ka me matig-Ihiptu. 2 Ne migkahi ka Magbebaye, “Egmeg-unayen ku egmeg-eheta ka me matig-Ihiptu, ka me tahasuled, ka me talagsumbaley, ka tagse siyudad, wey ka me migharian. 3 Ne egkaawe e ka langun ne kabulut te me matig-Ihiptu iling te egkaanlas wey eglibehen ku sikandan te me planu ran. Ne egpanginse e sikandan te me diyus-diyus dan, te me mammulingan, wey te egmahehane. 4 Ne igbehey kud sikandan diye te mabulut ne ahalen ne iyan egmandu kandan ne ware keyid‑u. Sikeddi ka Amana ne Maresen ne Magbebaye ka miglalag kayi.”

5 Ne egkeetiyan e ka Weyig ne Nilu wey egmammare e seini. 6 Egkataman, egkengeetiyan e ka langun ne weyig ne mig-ulun te Nilu wey egngareg e. Ne egkaggangu e ka mallayat ne me hilamunen. 7 Ne egmasalad e ka ilis te weyig su egkaggangu man e ka langun ne pinamula diye wey egmanlayap e seini te kalamag. 8 Ne egpandalawit wey eglungku e ka egmanguwa te isda; seeye se langun ne egmamunuwit diye te Weyig ne Nilu, wey egmemagguye e seeye se egmamiyale. 9 Ne egkallagew e seeye se me talaggimu te hinabel, su warad ma egkeyimu ran ne me hinabel. 10 Ne egkasumpitan e ka me talaggimu te manggad, wey eglungku e ka langun ne me sinuulan ne me talaggimu.

11 Me ungel iya ka me pangulu te Suwan; keungelan ka me tambag te me talagtambag te Hari te Ihiptu. Me hentew a sikandan se egkahi diye ki Paraun te me kabuhalan sikandan te me matagseb wey te tapey ne me Hari? 12 Hari te Ihiptu, hendei naan e ka me matagseb ne talagtambag nu? Pitawa nu la ke egpakapangguhud sikandan keykew ke nekey ka implanu te Amana ne Maresen ne Manama ne eggimuwen din te Ihiptu. 13 Me ungel ka me pangulu te Suwan wey Mimpis su egmalintutuu sikandan te ubat. Iyan ded mig-uney miglaag kandan ka me pangulu perem te me tribu te Ihiptu. 14 Imbehayan te Magbebaye ne Manama te panisingan te pegkalibeg ka me matig-Ihiptu. Seyyup ka langun ne inggimu ran, wey egpakatilistilis sikandan iling te egkewubug ne diye egpakarugsu te ileb din. 15 Ne ware minsan hentew diye te Ihiptu ne egpakabulig te nasud din, meyaman ma wey se egkaayu-ayu, inila ma wey se kene.

16 Te sika kangkuwa ne timpu, egpekeiling e te me malitan ka me matig-Ihiptu. Egpangelkelen e sikandan tenged te kaaldek ke egpakakite e sikandan ne egkayawen e te Amana ne Maresen ne Magbebaye ka belad din eyew te peglegpad kandan. 17 Ne igkaaldek dan e ka inged te Huda minsan ke egkarineg dan de ka ngaran kayi, su nanengnengan dan nahud ne egkabaybayaran sikandan te implanu te Amana ne Maresen ne Magbebaye.

18 Te sika ne aldew, due lalimma ne inged te Ihiptu ne iyan eggamiten te me etew te eglalag ka Hibruwanen ne linalahan* Te Hibruwanen: eglalag te linalahan te Kanaan. wey migpanaad ne egparuma-rume e te Amana ne Maresen ne Magbebaye. Ne ka sabeka te sika ne me siyudad, egngaranan te Siyudad te Aldew.

19 Te sika ne aldew, duen e altar ne tutunganan te igpanubad diye te Ihiptu, wey sabeka ne sungkaleg ne batu ne impasasindeg diye te eletanan te Ihiptu para te Magbebaye ne Manama. 20 Ne sabeka seini ne palinneu wey pamalehet ne diye iya te Ihiptu ka Amana ne Maresen ne Magbebaye. Ke egpangananey te Magbebaye ka me matig-Ihiptu tenged su indeeg-deeg sikandan, egpeuyanan sikandan te Magbebaye te manluluwas ne egpangabang kandan. 21 Ne egpeile e ka Magbebaye diye te me matig-Ihiptu, wey te sika kangkuwa ne timpu, egpekeile e degma ka me matig-Ihiptu kandin ne Manama. Ne egsimbe e sikandan ne eg-uyan te igmanubad dan wey te egtutungen ne ighalad. Ne egpanaad e sikandan te Magbebaye wey egtumanen dan iya seini. 22 Ne egdusaan te Magbebaye ka me matig-Ihiptu piru egmanlibed sikandan diye te kandin. Ke eg-ampu sikandan kandin eyew te pegpabulig, egtabaken din sikandan wey egbawian din ded.

23 Te sika kangkuwa ne timpu, duen e dalan ne maluag puun te Ihiptu peendiye te Asirya. Ne egmangendiye te Ihiptu ka me matig-Asirya wey egmangendiye degma te Asirya ka me matig-Ihiptu. Ne egkasabeke e sikandan ka egsimba. 24 Ne te sika kangkuwa ne timpu, egsabeke e ka Israil, ka Ihiptu, wey ka Asirya. Ne ka sika se tatelu ne nasud egkeyimu ne panalangin kayi te kalibutan. 25 Ne egpanalanginan sikandan te Amana ne Maresen ne Magbebaye te egkahi, “Egpanalanginan ku sikaniyu se me matig-Ihiptu ne keet-etawan ku, sikaniyu se me matig-Asirya ne inggimu ku wey sikaniyu se me matig-Israil ne in-alam ku ne keet-etawan.”