1  ✡ Hub 41:1; Sal 74:14; 104:26.Te sika kangkuwa ne aldew, eggamiten e te Magbebaye ne Manama ka dakel, mahalang, wey maresen ne kampilan din eyew te pegdusa te salimbaweng ne egngaranan te Libiyatan, ka migpallahuy wey migduldulihis ne uled ne mig-ugpe diye te dahat. Ne eggimatayan te Manama ka salimbaweng diye te dahat.

2 Te sika ne timpu, ulahing kew meyitenged te mabehas-behas ne parasan. 3 Egkahi ka Magbebaye ne Manama, “Sikeddi se Magbebaye ne Manama ka migtanggu te sika ne parasan. Imbisbisan ku seini layun wey intamengan te aldew wey marusilem eyew ware egpakarereet kayi. 4 Warad ad nabelu te seini ne pinamulaan. Piru ke due egkakita ku ne egpanubu ne me balunseri, eg-aween ku iya sika wey egtutungen. 5 Piru ke egpepangabang sikandan keddi, keilangan ne egpakiggusey pad sikandan keddi. Uya, egpakiggusey iya sikandan keddi.”

6 Egginguma ka aldew ne egderalid e iling te pinamula ka me kabuhalan ni Hakub ne iyan ka keet-etawan te Israil. Ne egsusubing e seini wey egpamulak. Ne egkapenu e te me behas kayi ka intiru ne kalibutan.

7 Ware pad paruseyi te Magbebaye ne Manama ka Israil iling kasumpit te pegparusa rin wey pegpangimatey rin te me kuntere din. 8 Indusaan te Magbebaye ne Manama ka keet-etawan din pinaahi te pegkarakep wey pegkeuyan dan. Indeldel rin sikandan iling te makeseg ne kalamag ne egpuun te igsile ne egpakapalayap te langun ne egkabayaan kayi. 9 Egkapasaylu re ka me matig-Israil te me sale dan ke egpanlupeten dan ka langun ne me batu ne diye te me altar ne tutunganan te igpanubad iling te pahang ne nenallupet, wey ke eg-aween dan ka diyus-diyus ne sungkaleg ne larawan ni Asira wey ka panubaran ne tutunganan te insinsu.

10 Nahuhus e ka siyudad ne in-alad te matikang wey makepal ne batu wey warad e mahinged kayi iling te in-engkeran ne disirtu. Ne diyad e egmanabtab ka me baka wey egmambulbuluku ka eggimeley. Eg-aminen dan te egtabtab ka me dewun te me kayu. 11 Ke egkahangu e ka me sugpang wey egkahepu e, egpangayuwen e seini te me malitan. Keet-etawan sikandan ne ware salabutan, purisu kene sikandan igkeyid‑u wey kene eglapihan te Manama ne iyan miggimu kandan.

12 Te sika kangkuwa ne timpu, eglibulungen te Magbebaye ne Manama ka tagse sabeka te me matig-Israil puun te Weyig ne Iyupratis taman diye te Ihiptu, iling te etew ne egdiriek te trigu ne egpeglein te tipasi puun te usangen. 13 Te sika ne aldew, egparahingen e te meemen ka trumpita. Ne eglibed e kayi te Hirusalim ka naddakep ne me matig-Israil ne impanguyan dengan diye te Asirya wey diye te Ihiptu. Ne egsimbeen dan e ka Magbebaye ne Manama diye te matulus ne bubungan ne kayi te Hirusalim.