“Egkabunuwit nu naa ka salimbaweng ne egngaranan te Libiyatan

wey ke egkasahilut nu naa te lubid ka be‑be din?

2 Egkatiyukan nu naa ka irung din te lubid

wey ke egkasanggat nu naa ka bake din?

3 Egpeyid‑u-hid‑u naa layun sikandin keykew

wey ke egpeyimmimenew eyew eglekaan nu?

4 Eggimu naa sika ne mananap te kasabutan duma keykew

wey egsaad ne egpeuripen keykew te intiru ne umul rin?

5 Egkeyiketan nu naa sika ne mananap ne iling de te bayaku

ne iggalew nu te me suluhuanen nu ne me malitan?

6 Egbebeliyen naa sika te me talagngengalap te dahat

wey egpanggupalen naa te me nigusyanti wey igpamelegye?

7 Egkapeutengan nu naa te me tampuling ka laplap din,

wey ke egkapilak nu naa te kalawit ne igngengalap ka ulu rin?

8 Ke eg-ubalen nu sikandin, egkareha ka iya;

kene nud egkalingawan ka malised ne pegpakannekal nu.

9 Pammineg ka, egkaaldek wey egkaawaan te kanekal ka minsan hentew ne egpakakita te Libiyatan,

10 Ke ware minsan hentew ne egpakaatu ne eggewhew kandin,

hentew naa degma ka egpakasukul keddi?

11 Hentew naa ka egpakakahi te due utang ku kandin?

Sikeddi ka kamuney te langun ne kayi te kalibutan.

12 “Eg-abayan ku pad sikeykew egguhuri meyitenged te lawa te Libiyatan

wey ke mamenu seini karesen wey kanekal.

13 Ware minsan hentew ne egpakasu-su te laplap din,

14 Ware minsan hentew ne egpakabeke te be‑be din

ne nalingut te makaliyas-liyas ne me ngipen.

15 Egpekeiling te me kalasag ne immegdeket-deket,

16-17 amana nekegdeket ka me engil rin

wey ware minsan hentew ne egpakasu-su kayi.

18 Due egpangilak-ilak ne malayag te irung din ke egpamusenga sikandin.

Ne iling kalalab te egsile ne aldew ka mata rin.

19 Due legleg ne egmanlihawang te be‑be din

wey due egmamebesik ne iling te me baha.

20 Due eglihawang ne ebel te irung din

iling te uwang te egkale-kale ne weyig diye te kendiru,

wey iling te ebel te me hilamunen ne insilaban.

21 Egpakaletem te museng ka geyinawa rin

su duen ma hapuy ne egmanlihawang te be‑be din.

22 Kekehali ka lieg din,

wey egkengaliyasan ka langun ne egpakakita kandin.

23 Warad en iya memewumel ne baad te sapu din;

kekehali seini wey kene egkengaweil.

24 Egpekeiling kakehal te galingan ne batu ka pusung din

wey warad iya igkaaldek din.

25 Ne emun ke egsasindeg sikandin,

egkengaliyasan wey egmakapallahuy ka maddesen ne me etew.

26 Ne kene sikandin eg-utengan te kampilan, kelaab, pane, wey ke pungyal naa.

27 Para kandin, egpekeiling de kewumel te lahami ka putew,

wey egpekeiling de kewumel te kayu ne nalepuk ka burunsi.

28 Kene egpakaalew kandin ka me tunud.

Ne egpekeiling de te ukaba ka me batu ne igpamintik kandin.

29 Para kandin, egpekeiling de te lahami ka lampes ne kayu,

wey egngisiyan din de ka egwaheswes ne kelaab ne igpilak kandin.

30 Ne ka me engil diye te getek din,

Purisu emun ke egdul‑ug sikandin, hendue te egdaruwen ka egkabayaan din.

31 Ne egbuliyawen din ka dahat iling te egkale-kale ne weyig diye te kuren

wey iling te mentika diye te kale.

32 Ne emun ke eglumbuk sikandin te dahat,

egmangilak-ilak ka me buke te egkabayaan din iling te maangkag ne bulbul.

33 Ware egpekeiling kandin kayi te kalibutan;

mananap sikandin ne ware igkaaldek.

34 Malepet de ka pegtengteng te sika ne mananap te langun ne hambuhen ne me mananap;

sika ne mananap ka Hari te langun ne mahintalunan ne mananap.”