1 Mekeyid‑u-hid‑u seeye se miggendiye te Ihiptu eyew egpabulig. Migsalig sikandan te memeiyal ne me kudde diye te Ihiptu, te masulug ne karwahi, wey te seeye se migmangudde ne mannekal. Piru ware sikandan migsalig te Magbebaye ne iyan ka Matulus ne Manama te Israil, wey ware sikandan migpangananey kandin. 2 Matagseb ka Manama wey egpeuyan sikandin te karereetan. Ne eggimuwen din iya ke nekey ka ingkahi rin. Egpakig-ehet sikandin te nasud te maddeet ne me etew wey te seeye se migpangabang kandan. 3 Me etew re ka me matig-Ihiptu, kene ne Manama. Ne ka me kudde dan, kene ne panisingan. Ke egparuse e ka Magbebaye, egkareetan ka Ihiptu lagkes ka me nasud ne imbulihan din. Egpekeg-iling de sikandan ne egkengareetan.

4 Ne migkahi keddi ka Magbebaye ne Manama, “Iling a te egginihel ne liyun ne kene egkaaldek te egpanguleyi ne impabantey te egdawiyen din, ke kene, egpabulus de iya sikandin ka egdawi. Ne iling naa degma due, ware egpakapegnel keddi te eggendiye te bubungan ne Siyun eyew egpakiggira te me kuntere te Hirusalim. 5 Sikeddi se Amana ne Maresen ne Magbebaye ka egbantey te Hirusalim iling te bayaku ne eglayang-layang diye te ampew te salag din eyew egtamengan seini. Egpangabangan ku iya ka Hirusalim wey egluwasen.”

6 Ne migkahi ka Magbebaye, “He keet-etawan te Israil, nakasale kew wey migsupak keddi, piru libed kew e kuntee kayi te keddi. 7 Su egginguma ka timpu ne igpandegpak e te tagse sabeka kaniyu ka me pelata wey me bulawan ne me diyus-diyus ne impangimu niyu tenged te sale niyu. 8 Ne egpangimatayan ka me matig-Asirya piru kene ne me etew ka egpangimatey kandan. Ne egmakapallahuy sikandan puun te gira wey egkeuripen seeye se mannekal ne me lukes. 9 Ne egpakapallahuy ka Hari* Te Hibruwanen: batu. dan, wey egkeengkeran e te me upisyal ka bendila dan tenged te mangune-kune ne liyas dan.” Sika ka ingkahi te Magbebaye—ka Magbebaye ne due hapuy ne egkanlabkanlab diye te Hirusalim.