1 Migkahi ka Magbebaye ne Manama, “Mekeyid‑u-hid‑u ka keet-etawan te Israil ne migribildi keddi. Ka me planu ran supak te me planu ku wey migpakigsabut sikandan te me matig-Ihiptu ne ware ku ikeupii. Purisu natimulan ka sale dan. 2 Miggendiye sikandan te Ihiptu ne ware migpanginginse keddi. Iyan dan tuyu te miggendiye te Hari te Ihiptu ka egpabulig kandin wey eyew due egkaaputan dan. 3 Egpabulig perem sikandan te Hari te Ihiptu piru nasi de iya sikandan egkeyilawi wey egkabanseyi. 4 Su minsan due me upisyal te Hari diye te Suwan ne dapit te igkahibang ne balabahan wey diye te Hanis ne dapit te igkakawanan ne balabahan, 5 nasi de iya egkeyilawi ka langun ne migsalig kandin su kene ma egpakabulig kandan ka me etew rin.”

6 Seini ka lalag te Magbebaye ne Manama ne impanengneng meyitenged te me asnu wey me kamil ne migpangipanew diye te mammara ne inged ne kene egkeugpaan ne diye te igkakawanan ne balabahan:

“Miggipanew ka me matig-Huda ne diye migbaye te mahirap ne egbayaan diye te mammara ne inged ne kene egkeugpaan. Ne due me liyun diye, wey me uled ne eggilu ne egkahat. Ne immandulanan dan ka me asnu wey me kamil te me karatuan ne igbehey ran diye te nasud ne kene egpakabulig kandan. 7 Ware karuan te bulig te Ihiptu. Purisu egngaranan ku seini te ‘Salimbaweng ne migpeeneng-eneng de.’ ”

8 Insuhu a te Manama ne igsulat ke kamenu kareet ka hinimuwan te me etew eyew due kasulatan ne egpakamemalehet te ware egtamanan ne maddeet iya sikandan. 9 Su me ribildi sikandan ne me etew, me ubaten ne me anak, wey kene egkeupian ne egpanuluen te Magbebaye. 10 Ingkahiyan dan ka me prupita, “Kene key e nangeni ke nekey ka impanengneng te Manama kaniyu. Kene key e nangeni ke nekey ka eleg. Iyan niyu re inangen kanami ka egpakahale kanami minsan ubat. 11 Awe kew te egbayaan ney wey kene key balabahi nikaniyu. Kene key e nangeni meyitenged te Matulus ne Manama te Israil.”

12 Purisu migkahi ka Matulus ne Manama te Israil, “Ware kew miglinga-linga te ingkahi ku wey migsalig kew te kabulut wey te pegpanlimbung. 13 Sikan naa ka nakasale kew iya. Iyan egkeilingan te sale niyu ka gintaang te alad te siyudad ne matikang wey makepal ne batu ne iyan egpuunan ne sahuhune ne egkewugnak seini. 14 Egkalupet seini iling te kuren ne neulug wey warad iya nasame ne dakel-rakel ne eleg ne igsakug te baha diye te abu wey ke igsakug naa te weyig diye te limuranan te weyig.”

15 Ne migkahi pad man‑e ka Magbebaye ne Manama, ka Matulus ne Manama te Israil, “Ke eglibed kew egsalig keddi, egkaluwas kew, egmalig‑en, wey egmalinawen.” Piru migbalibad kew. 16 Nasi kew mule migkahi, “Kene key su egpallahuy key ne eg-untud te meiyal ne me kudde.” Malehet iya ne egpallahuy kew. Memeiyal kew iya piru memeiyal pad ka eglupug kaniyu. 17 Ne minsan sabeka re te me kuntere niyu ka egginaaldek kaniyu, egmakapallahuy ka sabeka ne libu ne me sundalu niyu. Ne emun ke lalimma ka egginaaldek kaniyu, egmakapallahuy kew langun, taman te egsabsabeka kew naan de ka egkasame iling te pes-ek te bendila diye te puntul te bubungan. 18 Purisu migtetahad ka Magbebaye ne egparani kew kandin eyew igpapitew rin e ka keyid‑u rin kaniyu. Su matareng sikandin ne Manama wey due keupianan te langun ne egsalig kandin.

19 Sikaniyu se keet-etawan te Siyun* Ka Siyun wey Hirusalim, sabeka re ne inged. ne mig-ugpe te Hirusalim, kene kew e egpakasinehew! Igkeyid‑u kew iya te Magbebaye ne Manama ke egpabulig kew kandin. Ke egdinehen din ka pegpangananey niyu, egtabaken kew iya nikandin. 20 Minsan ke impaantus kew te Magbebaye ne talagpanulu niyu ne egpekeiling e te iyan niyud pegkeen tagse aldew ka peglungku wey masakit, piru kene kew e nikandin eg-inniyuhan, ke kene, egtangke e sikandin kaniyu. 21 Ke egpakasuwey kew diye te igkakawanan wey ke igkahibang naa ne dalan, egkarineg niyu sikandin diye te keinniyuhan niyu ka egkahi, “Seini ikula niyu ne dalan.” 22 Ne eg-isipen niyud e ne malindit ka me diyus-diyus niyu ne impangakeban te me pelata wey bulawan. Igmandegpak niyud e seini iling te manggad ne nalangesaan wey egkahi kew, “Malindit kew e!” 23 Ne egpeuranan te Magbebaye ka beni ne impamula niyu eyew egtubu seini wey eyew dakel ka egkahaani niyu. Te sika kangkuwa ne timpu, igpakapalayud niyud diye te maluag ne panabtaban ka me mananap niyu. 24 Ne ka me baka wey me asnu ne eggamiten te egdaru, iyan e igpakasunggud ka meupiya. 25 Te aldew ne egpangimatayan e ka me kuntere niyu wey egguhusen e ka matikang ne me baley ran, duen e egtulayas ne me beuhan puun te tagse me labuntud wey tagse me matikang ne me bubungan. 26 Ne ka layag te bulan, egpekeiling e te layag te aldew, wey ka layag te aldew, egpekeiling e te layag te pitu ne aldew ne insaamul. Sika ka egkeyitabu te timpu ne egbukusan wey egbawian e te Magbebaye ne Manama ka napalian din ne keet-etawan din.

27 Pitew kew, egkakite e diye te mariyu ka Magbebaye ne Manama ne egginguma. Egkakita ka langet din iling te egkanlabkanlab ne hapuy wey dakel ne ebel. Ne egpakatutung ka lalag din iling te hapuy. 28 Ka peggeheyinawa rin, egpakarereet iling te baggiyu ne taman te lieg se karalem. Ne egpasiliyen din ka keet-etawan te me nasud eyew igdegpak e seeye se eggimu te mareet. Ne eg-uyanen sikandan iling te kudde ne egkakangan. 29 Piru sikaniyu se keet-etawan te Manama, ulahing kew iling te eggimuwen niyu te marusilem te pegsahakeen niyu. Gale-gale kew iling te me etew ne nangipanew ne egbales te dahing te pulendag taheed te eggendiye sikandan te bubungan te Magbebaye ne Manama, ka batu ne aputanan te Israil.

30 Ne igparineg te Magbebaye ka makaaldek-haldek ne laheng din. Igpapitew rin ka belad din ne andam e ne egdusa duma te mangune-kune ne langet, te egkanlabkanlab ne hapuy, te dakel ne uran, wey te uran ne apiyew. 31 Ne egkengaaldek amana ka me matig-Asirya te laheng te Magbebaye wey egpanlampesan din sikandan. 32 Ne ka tagse karereetan ne igpaneem-neem din kandan, egkarumaan e te peggale-gale pinaahi te egbalesen ne tegunggu wey salurey. Ka Magbebaye en iya ka egpakig-ehet te me matig-Asirya. 33 Intahahe e ka inged ne egtutungan te Hari te Asirya. Maluag seini wey maralem ne bitu, wey duen e inlimud ne igtemeg diye. Ne ka Magbebaye ka egpakapalukindab kayi pinaahi te peggeheyinawa rin iling te egkanlabkanlab ne asupri.