1 Mekeyid‑u-hid‑u kew se egmandereet wey egmangeakal. Ware kew pad nakaneem-neem ne indereetan kew wey in-akalan. Piru ke egkasanggel e ka pegpandereet niyu wey pegpangeakal niyu, sikaniyud e degma ka egdereetan wey eg-akalan.

2 He Magbebaye ne Manama, ikeyid‑u key ubag nikeykew. Migtetahad key keykew. Sikeykew ubag perem ka keseg ney te tagse maselem wey kaluwasan ney te timpu te kasamuk. 3 Egmakapallahuy ka me etew ke egpakarineg te laheng nu. Egmemekegsuwey ka me nasud ke egsasindeg kad. 4 Ne eg-ahawen ka me kasangkapan dan ne warad e egkasame, iling te kamet ne egdalapakan te talangas.

5 Ka Magbebaye ne Manama ka labew te langun, sikandin iya ka mig-ugpe diye te kinaribabawan te langit. Eg-empeten din ka Hirusalim te eleg ne peggukum wey te katareng. 6 Egkeyimu sikandin ne malig‑en ne pabunsuranan niyu. Egluwasen kew nikandin layun, wey egbehayan kew te katagseb wey katuenan. Ka pegtahud niyu te Magbebaye iyan karatuan niyu.

7 Pitew kew, egpangananey e ka mabbulut ne me sundalu niyu. Ne ka egpanuhuen ne egpahuhuren ne egpakiggusey te me kuntere niyu, egmakasinehew naan de tenged te pegkasuhey. 8 Ne warad e eetawen te me kelesadda, wey warad e egbaye diye. Warad natuman ka me kasabutan wey warad natahud ka me talagpamalehet. Ne warad e etew ne egtahud te duma rin. 9 Migmammare e ka tane wey warad pinamula ne egtubu. Nenaggangu e ka me kayu diye te Libanun, wey egpekeiling e te disirtu ka tane ne Siyarun. Ne nenapupu e ka me dewun te me kayu diye te Basan wey Karmil.

10 Ne migkahi ka Magbebaye, “Kuntee, egweil ad e. Igpapitew kud ka geem ku wey ka karesen ku. 11 Sikaniyu se me matig-Asirya, iyan egpangkusan te me planu niyu ka egpekeiling te lahami, wey ka peggeheyinawa niyu mismu ka egpekeiling te hapuy ne egpakapalukindab kayi. 12 Egkatutung kew egkatamtamani, iling duhiyen ne hilamunen ne mahaan egkasilabi. 13 Sikaniyu se me nasud ne diye te maddiyu wey maddani, pammineha niyu ke nekey ka inggimu ku, wey ilaa niyu ka karesen ku.”

14 Ne egpangelkelen tenged te liyas ka me makasesale diye te Hirusalim ne ware miglinga-linga te me panulu te Manama. Migkahi sikandan, “Egpekeiling ka Manama te migkanlabkanlab ne hapuy ne kene egkeebukan. Ne hentew‑a kanta ka egpekeugpe duma te hapuy ne kene egkeebukan? Ware iya.” 15 Piru egkaluwas mule ka me etew ne matareng. Kene sikandan eg-uubat, kene egpaginansiya pinaahi te limbung, kene egdawat te seleppi ne igsagpeng te be‑be, kene egpammineg te me etew ne egginalig kandan ne eg-apil te egpangimatey, wey kene sikandan egpatintal te me etew te peggimu te mareet. 16 Sika ne me etew ka egpakapariyu te karereetan. Eg-ugpe sikandan ne kene egkamenu diye te me matikang ne inged ne naringdingan te me batu, wey kene sikandan egkawaan te egkakeen wey weyig.

17 Me matig-Israil, egkakita niyu ka sabeka ne mabantug ne Hari ne egmandu diye te luluahi ne tane. 18 Ne egkasuman-suman niyu ka pegkaaldek niyu te me upisyal te Asirya ne migmangendini ka egpanlimud wey egpanlista te me buhis, wey egseel te me baley niyu. 19 Ne kene niyud egkakita seeye se me hambuhen ne me lapu ne kene egkasabut se linalahan. 20 Pitawa niyu ka Siyun, ka egsagsahakeenan ta ne siyudad te tagse leg‑un. Ka sika ne siyudad ne iyan ka Hirusalim, ka siyudad ne warad igkaaldek te mahinged. Egpekeiling seini te balungbalung ne kene egkabarut se me pes-ek, wey kene egkabigtew se me lubid. 21 Ne egbantayan ki te Magbebaye pinaahi te geem din. Egpekeiling ka Hirusalim te inged ne due masulug ne malluag ne weyig ne ware egpakalapas ne me kuntere pinaahi te pegpamegsey wey ke peg-untud naa te balangey. 22 Su talaggukum ta ka Manama, talagbehey te balaud, wey Hari ta. Inluwas ki nikandin. 23 Kuntee naawaan ka Hirusalim te langun ne karesen din wey ware pabunsuran. Piru egginguma red ka timpu ne egpakaahew ka Hirusalim te masulug ne kasangkapan puun te me kuntere din, wey egkabaaran minsan ka me pungku. 24 Ne warad mahinged te Hirusalim ne taharaluwen, wey ka me sale dan egpasayluwen e te Manama.