1 Parani kew ka me nasud, wey pammineg kew. Hendini kew wey pammineha niyu ka eglalahen ku, sikaniyu se kayi te ampew te tane. 2 Nalanglangetan ka Magbebaye ne Manama te keet-etawan te langun ne me nasud, wey te langun ne sundalu ran. Purisu egguleen din sikandan langun. 3 Ne kene iglebeng seeye se me minatey, wey egngareg e seini. Ne diye te bubungan, egtulayas ka me langesa ran. 4  ✡ Mat 24:29; Mar 13:25; Luk 21:26; Imp 6:13-14.Ne egkalleney ka me bituen wey ka minsan nekey ne diye te aw-awangan, wey egkalulun ka langit iling te pepil. Egkengeulug ka me bituen iling te naggangu ne dewun te paras wey ke behas naa te iggira.

5  ✡ Isa 63:1-6; Hir 49:7-22; Isi 25:12-14; 35:1-15; Amu 1:11-12; Ubd 1-14; Mal 1:2-5.Ne emun ke egkatamtamanan e te Magbebaye ne Manama te egdereet ka diye te aw-awangan, egpamaneug e ka kampilan diye te Idum, ka inged te keet-etawan ne eglegparan din. 6 Ne ka kampilan te Magbebaye, egkeelin ne langesa wey tabe, iling te langesa wey tabe te me nati te karniru wey me kambing ne igpanubad. Su egpanubad ka Magbebaye diye te siyudad te Busra wey masulug ka egpangimatayan din. 7 Mabbulut ka me pangulu ran iling te me leew ne baka, wey mannekal ka me lukes-lukes dan iling te me buyag e ne me baka, piru egpangimatayan ded degma sikandan. Ne egkeempet te langesa wey tabe ka tane dan. 8 Su egginguma ka timpu ne egsulian te Magbebaye ka me kuntere te Israil te neyimu ran, wey egbehayan din te keupianan ka keet-etawan din.

9 Ne egkeyimu e ne ispaltu ka me weyig diye te Idum, wey egkeyimu e ne asupri ka tane. Ne egkeyimu e ka intiru ne nasud te Idum ne ispaltu ne egkanlabkanlab. 10  ✡ Imp 14:11; 19:3.Egkanlabkanlab seini aldew wey marusilem. Ne ka ebel kayi, eggendiye te dibabew te ware egtamanan. Te egkabuhal-buhal pad ka me etew, egkammare e ka tane te Idum wey kenad egbayaan te ware egtamanan. 11 Ne iyan e eg-ugpe diye ka me kulahu, me uwak, wey duma pad ne me mananap ne eg-ugpe te inged ne ware me etew. Eggimuwen e te Magbebaye ne mareet ne egpitawen wey ware tahu ka sika ne inged. 12 Ne egngaranan dan e seini te “Ware migharian.” Ne egkengaawe e ka langun ne me pangulu. 13 Ne egpanubuan e te me duhiyen ne pinamula wey me hilamunen ka me baley ne immalig‑en te eggimu eyew egkaaputan, wey diyad e egpangugpe ka me kulahu wey leew ne me asu. 14 Ne diyad e egmangugpe ka me mahintalunan ne me mananap. Ne egpangumew e ka mahintalunan ne kambing te me duma ran, wey diyad eggimeley ka me mananap ne marusilem de eglihawang. 15 Egsesalag e ka me kulahu diye, eg-atelug, eg-elen wey egpigse, wey egkupkup te me piyak dan. Egliblibulung degma diye ka me uwak ne nekeglunggun.

16 Pamitawa niyu ka libru te Magbebaye wey basaa niyu. Ware minsan sabeka te seini ne me mananap ne egkaawe, wey ware sabeka kandan ne ware paris tenged su ka Magbebaye ka migsuhu kayi. Ne ka Panisingan din ka miglibulung kandan. 17 Intahahe din e ka tane kandan wey sikandin iya ka migbaad-baad diye te me mananap. Sikandan e ka kamuney te tane wey diyad e sikandan eg-ugpe te ware egtamanan.