50
1 Migkahi ka Magbebaye ne Manama,
“Impaawe ku naa sikaniyu puun te Hirusalim,
iling te sabeka ne lukes ne mig-engked te igbeyi rin?
Imbelegye ku naa sikaniyu isip uripen
eyew egpakabayad a diye te neutangan ku?
Naddakep kew tenged te sale niyu
wey insamsamilian kew se me matig-Hirusalim
tenged te maddeet ne hinimuwan niyu.
2 “Mania te ware etew te pegginguma ku?
Mania te ware migtabak te pegpangumew ku?
Kene ne malepet ka me belad ku
te pegluwas kaniyu.
Ware naa geem ku eyew te pegluwas kaniyu?
Egpakapeeti a te dahat wey te me weyig
te peglalag de
su eyew egpatey ka me isda wey egkamewu.
3 Egkeyimu ku ne egpamarusilemen ka langit
iling te migsaluub te meitem te peglungku.”
Ka matinumanen ne suluhuanen
4 Impanulu a te Magbebaye ne Manama ke nekey ka eglalahen ku
eyew egkateu a ne egbagget te nenabbeley.
Egpukawen a nikandin tagse maselem
eyew egpammineg te igpanulu din.
5 Inlalahan a te Magbebaye ne Manama
wey migpammineg a kandin.
Wara a migribildi wey ke migpariyu naa kandin.
6 ✡ Mat 26:67; Mar 14:65.Intaya ku ka peka ku te seeye se egmanlampes
wey ka ulaula ku te seeye se egpamarut te sumpe ku.
Wara a migpanalliya te seeye se egpeyilew keddi
wey te seeye se egkulepa te ulaula ku.
7 Piru wara a neyilew tenged su imbulihan e ma te Magbebaye
ne iyan ka Manama.
Sikan naa ka egsasindeg a ne kene egkaweil iling te batu
su nakataha a ne kena a egkeyilawan.
8 ✡ Rum 8:33-34.Ne marani e ka Manama
ne egpanengneng ne matareng a.
Ke due egsumbung keddi wey egbayung,
egpegkiteey key diye te hukumanan!
9 Ka Magbebaye ne Manama iya ka migbulig keddi
purisu hentew ka egpakapamalehet ne nakasala a?
Egkareetan sikandan iling te manggad ne egketketen te me uled-uled.
10 Hentew‑a ka migtahud te Magbebaye
wey migtuman te insuhu te suluhuanen din?
Ke miggipanew sikandin diye te marusilem ne ware malayag,
egsalig sikandin te ngaran te Magbebaye ne Manama.
11 Piru taham-taham kew se migplanu te mareet te duma;
sikaniyu red ka egsahap te me planu niyu!
Ka Magbebaye ne Manama ka egdusa kaniyu
wey egpatey kew iya te subla ne pegdusa.