51
Ka pegliwang te Hirusalim
1 Migkahi ka Magbebaye ne Manama,
“Pammineg kew se migpallateng te kaluwasan
wey migpamitew keddi.
Sumsumana niyu ka batu ne impuunan niyu
ka ingkaliyan kaniyu.
2 Sumsumana niyu ka kaap-apuan niyu ne si Abraham wey si Sara.
In-umew ku si Abraham ne sabsabeka piru impanalanginan ku sikandin
wey impamasulug.
3 “Egliwangen ku iya ka Hirusalim* Te Hibruwanen: Siyun. Sabeka seini te me ngaran te Hirusalim. wey ka langun ne inged kayi ne naddeetan.
Ne ka me inged ne ware mig-ugpe,
eggimuwen ku ne egpekeiling e te Idin, wey ka disirtu egpekeiling te pinamulaan ku.
Ne due pegkahale diye wey due me pegpasalamat, wey me peg-ulahing.
4 “Pammineg kew keddi,
keet-etawan te nasud ku.
Igpanengneng ku ka balaud ku,
wey egkeyimu ne kalayag te keet-etawan ku ka katareng ku.
5 Mahaan e egginguma ka kaluwasan
wey te kene egkaluhey egpangabangan kud e sikaniyu,
wey egmanduan ku ka keet-etawan duma te geem ku.
Ne ka diye te me ilis te dahat, egtetahad keddi
wey egpallateng te geem ku.
6 Leng‑ag kew diye te langit,
wey pitawa niyu ka kalibutan.
Egkaawe ka langit iling te ebel,
wey egkaleddak ka kalibutan iling te manggad.
Egpatey ka langun ne nangugpe kayi iling te me ketiketi.
Piru ware egtamanan te kaluwasan ne igbehey ku kaniyu
wey kene egkataman ka katareng ku.
7 “Pammineg kew keddi, sikaniyu se nakanengneng te katareng
wey due geyinawa ne egtuman te me balaud ku.
Kene kew kaaldek te seeye se egpanampele
wey egpeyilew kaniyu.
8 Su egpekeiling e sikandan te manggad ne egketketen te me uled-uled.
Piru ware egtamanan te katareng ku
wey ka kaluwasan te langun ne kabuhalan.”
9 Ne bulihi key e Magbebaye ne Manama.
Gamita nu ka geem nu te pegluwas kanami.
Bulihi key iling te inggimu nu dengan.
Sikeykew ma ka migtadtad te salimbaweng ne si Rahab.
10 Sikeykew ka migpeeti te dahat,
wey ka miggimu te dalan diye te elat-elat kayi
eyew egpakalapas ka inluwas nu.
11 Seeye se inluwas te Magbebaye,
eglibed diye te Hirusalim† Te Hibruwanen: Siyun. Sabeka seini te me ngaran te Hirusalim. ne egmangulahing.
Egkaawe e ka me peglungku dan wey pegkalaggew ran.
Ne egkahale e sikandan te ware egtamanan.
12 Ne migkahi ka Magbebaye,
“Sikeddi ka migliwang kaniyu.
Purisu, mania te egkaaldek kew te etew ne egkapatey red iling te hilamunen?
13 Nalingew kew te Magbebaye ne Manama ne iyan miggimu kaniyu,
ka miggimu te langit wey ka migtahu te pabunsuranan te kalibutan.
Mania te layun kew egkaaldek?
Tenged naa te egkabelu sikandan kaniyu,
wey egkeupian ne eggimatey kaniyu?
Kene kew e egkareetan te pegkabelu dan.
14 Te kene egkaluhey, eglekaan e ka me pinirisu.
Kene sikandan egkapatey diye te imprisuwan kandan
wey kene egpekeendiye te lebenganan,
wey kene egkaawaan te egkakeen.
15 “Sikeddi ka Magbebaye ne Manama niyu,
ka migbuliyew te dahat eyew egsibu ka me bunlud.
Amana ne Maresen ne Magbebaye ka ngaran ku.
16 Impanulu ku sikaniyu ke nekey ka iglalag niyu,
wey impangabangan ku sikaniyu pinaahi te geem ku.
Intekul ku ka langit wey intahu ku ka pabunsuranan te kalibutan.
Ne ingkahiyan ku ka Hirusalim,
‘Keet-etawan ku sikaniyu.’ ”
Ka katamanan te peg-antus te Hirusalim
17 He Hirusalim, himata kad iya wey sasindeg kad e!
Mig-inum ka te ubab ne imbehey te Magbebaye ne napenu te langet din.
In-amin nu seini inuma wey egpakatilistilis kad e.
18 Ne warad iya minsan sabeka te keet-etawan nu ne egpekeinahak keykew,
wey warad iya minsan sabeka kandan ne egpakakitkit keykew.
19 Neyitabu seini se daruwa keykew:
nareetan ka tane nu tenged te gira,
wey nabitil ka keet-etawan nu.
Ne warad iya egliwang keykew.
20 Ne nenallepu ka keet-etawan nu wey nenakabahed de diye te ilis te kelesadda
iling te usa ne migsahad te balatik.
Nakaneem-neem sikandan te langet te Magbebaye ne Manama
wey insaparan din sikandan.
21 Purisu sikaniyu se mig-antus
wey egpakatilistilis minsan ware kew mig-inum te binu,
pammineha niyu seini.
22 Seini ka ingkahi te Magbebaye ne Manama ne miglapig kaniyu,
“Pammineg kew, in-awe kud e due te kaniyu ka ubab ne napenu te langet ku
ne iling te inumen ne egpekewubug.
Kene kud e sikaniyu egpaabayen egpeinuma kayi.
23 Ne igbehey kud seini te migpaantus kaniyu
wey ka migpalangkeb kaniyu eyew egdiekan dan.
Impeiling dan ka me peka niyu te tane
wey impeiling te kelesadda eyew egpakabaye sikandan.”