61
Ka pegpangabang te Israil
su in-alam a nikandin ne egwali te meupiya ne panugtulen diye te egkengaayu-ayu.
Impeuyan a nikandin eyew te pegliwang te miglungku,
eyew te pegpaawe te naddakep,
wey eyew te pegpalihawang te naprisu.
2 ✡ Mat 5:4.Impeuyan a nikandin eyew te pegpanengneng ne miggingume e ka timpu
ne eglapihan e te Magbebaye ka keet-etawan din,
wey egsulian din ka me kuntere dan.
Impeuyan a iya nikandin eyew te pegliwang te seeye se miglungku,
3 lagkes seeye se diye te Hirusalim.* Te Hibruwanen: Siyun. Sabeka seini te me ngaran te Hirusalim.
Impeuyan a nikandin eyew te pegbehey kandan te kahale, kene ne kalaggew,
te ulahingen te pegdeyrey, kene ne peglungku.
Eggimuwen sikandan langun ne matareng te Magbebaye,
eglig‑enen din sikandan iling te ahuu ne impamula rin.
Ne egkareyrey ka Manama tenged te inggimu rin.
4 Igpasasindeg dan ded ig-abey ka me siyudad dan ne nahuhus te naluhey e ne timpu.
5 Me keet-etawan te Manama, egkeyimu niyud ne suluhuanen ka me lapu.
Sikandan ka egsunggud te me mananap niyu, ka egdaru,
wey ka egtanggu te me parasan niyu.
6 Ne egngaranan kew te me talagpanubad te Magbebaye,
wey me talagpamakey te Manama ta.
Ne egkaangken niyu ka karatuan te me nasud,
wey egkabantug kew.
7 Egkeyilawan kew perem,
piru egkalupi e nasi te kararuwa ka panalangin ne egkarawat niyu.
Egpakarawat kew iya te daruwa ne lupi ne katubung diye te tane niyu
wey egpakaneem-neem kew te ware egtamanan ne kahale.
8 “Sikeddi se Magbebaye ne Manama,
egkahala a te eleg ne peggukum.
Igkalangeti ku ka pegpanakew,
wey ka seyyup ne hinimuwan.
Tenged te matinumanen a,
egdasahan ku ka keet-etawan ku,
wey eggimu a te ware katamanan ne kasabutan kandan.
9 Egkeila ka me kabuhalan dan te me nasud.
Ka langun ne egpakakita kandan,
egpakataha ne sikandan ka keet-etawan ne impanalanginan ku.”
10 ✡ Imp 21:2.Igkahale ku iya ka Magbebaye ne Manama ku
su insaluuban a nikandin te kaluwasan wey katareng.
Egpekeiling a te egpangasawa ne migsesalakey te mateles,
wey te egpangasaween ne migsaluub te me alahas.
11 Su iling te tane ne egpatubu te beni
wey te pinamulaan ne egpatulin te impamula,
ka Magbebaye degma egpapitew te geem din te pegluwas,
purisu egdeyrayen sikandin te langun ne nasud.