62
Ka egginguma ne kaluwasan te Hirusalim
1 Para te keupianan te Hirusalim,* Te Hibruwanen: Siyun. Sabeka seini te me ngaran te Hirusalim.
kena a egpeeneng-eneng,
kena a egsanggel taman te egkaluwas seini.
Ka kapanaluwan kayi egpekeiling te layag te sulu.
2 He Hirusalim, egkakita te me nasud ka katareng nu,
egkakita te me Hari ka katelesan nu.
Ne egbehayan ka te Manama te iyam ne ngaran.
3 Ne egmateles ka iling te mahal ne kuruna te Hari
ne inggen-genan te Magbebaye ne Manama.
4 Kene kad e egngaranan te “In-engkeran ne siyudad,”
wey ke “Inged ne ware mahinged”,
ke kene, egngaranan kad e te “Siyudad ne ingkahale te Manama”
wey ke “Eg-asaween naa te Manama”,
tenged su nahale ka Magbebaye ne Manama keykew
wey iling te asawa nu sikandin.
5 Ka miggimu keykew, egpangasawa keykew,
iling te kanakan ne eg-asawa te mengebay.
Egkahale ka Manama keykew,
iling te kanakan ne egkahale te egpangasaween din.
6 He Hirusalim, migtahu a te me talagbantey due te me alad nu.
Ne aldew wey marusilem, kene iya sikandan egpeeneng-eneng ka eg-ampu.
Sikaniyu se migpangananey te Magbebaye ne Manama, kene kew iya sanggel ka eg-ampu.
7 Kene kew peeneng-eneng ka eghangyu kandin ne igpasasindeg din ded ig-abey ka Hirusalim
wey egkareyrey man‑e seini te kalibutan.
8 Migsaad ka Magbebaye ne eggimuwen din seini pinaahi te geem din.
Migkahi sikandin, “Kene kud en iya igpakeen te me kuntere nu ka me trigu nu,
wey kene kud e igpeinum te me lapu ka binu ne inlaslasayan nu himuwa.
9 Ne seeye se migpamula wey miggaani te trigu,
egpakasusuba wey egpakakeen kayi,
purisu egkareyrey a nikandan.
Ne seeye se miggendiye te timplu ku eyew eghalad,
egpekeinum te binu ne inggimu ran puun te behas te paras dan.”
10 Keet-etawan te Hirusalim, lihawang kew te siyudad niyu.
Andama niyu ka dalan para te duma niyu ne egbaye diye.
Iparibabew niyu ka bendila eyew egkakita te langun ne nasud.
11 ✡ Isa 40:10; Imp 22:12.Pammineg kew!
Migpeuyan ka Magbebaye te seini ne lalag para te intiru ne kalibutan,
“Kahii nu ka mig-ugpe te Israil te eggingume e ka Manluluwas dan
wey eg-uyan sikandin te unag wey dasag.
12 Egngaranan e sikandan te, ‘Matulus ne keet-etawan’
wey ‘Inluwas te Magbebaye ne Manama’.
Ne ka Hirusalim egngaranan te, ‘Impamitew ne Siyudad’,
wey ‘Siyudad ne kenad eg-engkeran’.”