1 Sabeka ne aldew, miggendiye si Samsun te Gasa. Ne due nakita rin diye ne malitan ne egpamelegye te lawa, wey ingguliran din seeye ne malitan. 2 Natahaan te me matig-Gasa ne diye si Samsun te inged dan. Purisu, inlingutan dan sikandin wey inggepasan dan diye te gumawan te siyudad te intiru ne marusilem. Ne ware weilan dan te intiru ne marusilem, kahi ran, “Eggepasan ta sikandin taman te egkaliwaswas ne eggimatayan ta sikandin.” 3 Kunaleg te taman de te egliware te marusilem ne miglipereng si Samsun. Ne migbukal-bukal sikandin wey inggenat din ka lekeb te gumawan te siyudad, lagkes ka daruwa ne pes-ek, wey ka me pagul wey duma pad. Ne intiang din seini wey in-uyan din diye te dibabew te bubungan ne egpakapantew te Hibrun.

4 Nataman, due malitan ne inggeyinawaan ni Samsun ne egngaranan ki Dilayla ne diye mig-ugpe te Napu te Surik. 5 Ne nangendiye ka me pangulu te me Pilistihanen ki Dilayla wey migkahiyan dan sikandin, “Ginaliha nu si Samsun eyew igguhud din keykew ke hendei migpuun ka kanekal rin, wey ke egmenuwen ney sikandin te egtalu su eyew egkeelehan ney sikandin. Ne egbehey key re keykew te sabeka ne libu wey sabeka ne gatus (1,100) ne pelata.”

6 Sikan naa ka mig-insaan ni Dilayla si Samsun, “Nangeni a nikeykew ke hendei egpuun ka kanekal nu. Egmenuwen ka te egbaku eyew kene ka egpakaawe?”

7 Ne migtabak si Samsun, “Emun ke egbakuen a nikandan te pitu ne me makehal wey ware pad nahangu ne tagpes te piet, ne egmahuya ad iling te duma ne etew.”

8 Purisu, in-uyanan si Dilayla te me pangulu te Pilistihanen te pitu ne me makehal wey ware pad nahangu ne tagpes te piet, wey imbaku din e si Samsun. 9 Due me etew ne miggeles diye te lein ne sinabeng eyew egtetahad ke egkabaku e ni Dilayla si Samsun. Ne migpanguleyi si Dilayla, “Samsun, sikan e ka me Pilistihanen ne egdakep keykew!” Piru impamugtus ni Samsun ka imbaku kandin ne iling de te lanut ne narilaan te hapuy. Sikan naa ka ware dan nataheyi ke hendei egpuun ka kanekal rin. 10 Ne migkahiyan ni Dilayla si Samsun, “Imbaley-baley a nikeykew wey in-ubatan a nikeykew. Ne kuntee, nangeni a nikeykew ke egmenuwen ka te egbaku ne kene kad egpakaawe.”

11 Migkahiyan ni Samsun si Dilayla, “Emun ke egbakuen a nikandan te iyam ne lubid ne ware pad nahamit, egmahuya ad iling te duma ne etew.”

12 Sikan naa ka migkuwa si Dilayla te iyam pad ne lubid wey imbaku din e man‑e si Samsun. Ne due me etew ne miggeles diye te lein ne sinabeng eyew egtetahad ke egkabaku e ni Dilayla si Samsun. Ne migpanguleyi si Dilayla, “Samsun, sikan e ka me Pilistihanen ne egdakep keykew!” Piru impamugtus ni Samsun ka imbaku kandin ne iling de te lanut.

13 Ne migkahiyan e man‑e ni Dilayla si Samsun, “Imbaley-baley ad man‑e nikeykew wey in-ubatan a. Nangeni a nikeykew ke egmenuwen ka te egbaku ne kene kad egpakaawe.”

Ne migkahiyan ni Samsun si Dilayla, “Emun ke ig-apil nu ighabel ka pitu ne insalapid ne bulbul ku wey iggiket nu seini diye te pes-ek wey igpakpak nu seini diye te alabat, egmahuya ad iling te duma ne etew.”

14 Ne taheed te newulep si Samsun, insalapid ni Dilayla ka bulbul din te pitu ne salapid. Nataman, imbagkes din e seini diye te pes-ek wey impakpak din seini diye te alabat wey migpanguleyi sikandin, “Samsun, sikan e ka me Pilistihanen ne egdakep keykew!” Piru mig-enew sikandin wey nalagnut diye te impakpakan ka bulbul din.

15 Ne ingkahiyan sikandin ni Dilayla, “Ingkahiyan a nikeykew te inggeyinawaan a nikeykew, kunaleg te kene bes ne malehet ka geyinawa nu keddi. Katatelu ad nikeykew balbalaya su ware ka mignangen keddi ke hendei egpuun ka kanekal nu.” 16 Egpihilen din te eg-inse tagse aldew si Samsun taman te neubil e si Samsun. 17 Te katammanan, ingguhuran e ni Samsun si Dilayla te malehet. Migkahi sikandin, “Ware de due natempuhi ka bulbul ku, tenged su inhalad e ma diye te Manama eyew egkeyimu ne Nasariyu minsan te diye e pad te getek te iney ku. Purisu, emun ke egtempuhan ka bulbul ku, egmahuya ad e iling te duma ne etew.”

18 Te nakita ni Dilayla ne malehet ka ingguhud ni Samsun, impakahiyan din ka me pangulu te me Pilistihanen, “Libed kew kayi te kasabeka naan de su migguhud e sikandin te malehet.” Sikan naa ka miglibed sikandan wey nanguyan te seleppi. 19 Ne impalipereng ni Dilayla si Samsun diye te bubun din, wey mig-umew sikandin te sabeka ne etew ne eg-alut te pitu ne insalapid ne bulbul ni Samsun. Ne impasakitan din si Samsun, piru warad keseg ni Samsun. 20 Ne migpanguleyi e man‑e si Dilayla, “Samsun, sikan e ka me Pilistihanen ne egdakep keykew!” Mig-enew si Samsun su kahiyen din ne egpakaawe ded man‑e sikandin, kunaleg te in-engkeran bes e sikandin te Magbebaye ne Manama. 21 Ne indakep e sikandin te me Pilistihanen wey ingkulewut ka mata rin. In-uyan sikandin diye te Gasa, wey imbaku sikandin te me keddina. Impatrabahu sikandin diye te prisuwan isip talaggaling. 22 Piru migbunsud e man‑e migtulin ka bulbul din.

23 Ne miglibulung ka me pangulu te Pilistihanen eyew egsahakeen wey eghalad sikandan ki Dagun ne diyus-diyus dan. Te peggale-gale dan, nangulahing sikandan te, “Impatalu kanta te manama ta ka kuntere ta ne si Samsun.” 24 Te pegkakita te me etew kandin, indayan dan ka diyus-diyus dan wey migkahi, “Impatalu kanta te manama ta ka kuntere ta ne migdereet te inged ta, wey nakapatey te masulug kayi te kanta.” 25 Nahale sikandan wey migkahi, “Peendiniya niyu si Samsun eyew egbalbalayen ta.” Sikan naa ka impaangey ran si Samsun puun te prisuwan wey imbaley-baley ran. Ne impasasindeg dan sikandin diye te elat-elat te daruwa ne derakel ne sungkaleg. 26 Migkahiyan ni Samsun ka kanakan ne migkitkit kandin, “Pahen-gena a nikeykew te me sungkaleg ne nakapahen te seini ne timplu eyew egpakasandig a.” 27 Nanekel-sekel ka me lukes wey me malitan diye te timplu. Diye degma ka me pangulu te me Pilistihanen. Ne ka diye te atep, due me tatelu ne libu (3,000) ne lukes wey me malitan ne migmanengteng wey migbaley-baley ki Samsun.

28 Ne mig-ampu si Samsun diye te Magbebaye ne Manama, “He Magbebaye ne Manama, bulihi a nikeykew. Ke egkaayun, beheyi a ubag nikeykew te keseg minsan kuntee naan de eyew egpakasuli a te me Pilistihanen ne migkulewut te mata ku.” 29 Ne impeglimang ni Samsun te eggen-gen ka daruwa ne sungkaleg ne diye te elat ne iyan nakapahen te timplu. 30 Ne migpanguleyi sikandin, “Tuhuti a ne egpekeunung te me Pilistihanen.” Ne migpangeseg sikandin ka migtuku te me sungkaleg, wey nalundus e ka timplu. Masulug pad ka nekeunung kandin du te neyimatayan din te neuyag pad sikandin.

31 Pegkeimpus dutu, migtupang ka me suled din wey me karumaan din eyew eg-angey te lawa rin. Inlebeng dan sikandin diye te inlebengan te amey rin ne si Manuwa, diye te elat-elat te Sura wey Istaul. Migpangulu si Samsun te Israil te daruwa ne pulu (20) ne leg‑un.