1 Te timpu ne ware pad Hari te Israil, due Libita ne mig-ugpe diye te bubungan te Ipraim. Due duwey rin ne matig-Bitlihim ne sakup te Huda. 2 Kene eglayam ka duwey te Libita wey mig-uli e diye te amey rin diye te Bitlihim. Mig-uugpe sikandin diye te hep‑at ne bulan. 3 Nataman, inlupug te Libita ka duwey rin eyew eg-inniyaten din ne eg-uli. Migduruma sikandin te suluhuanen din wey mig-uyan te daruwa ne asnu. Te pegginguma rin e diye, impalasud sikandin te duwey rin, wey te pegkakita te anuhang din kandin, in-alumama amana sikandin. 4 Ne inggawiran ka Libita te anuhang din ne lukes ne egpeuugpeen pad. Sikan naa ka migpalunggaat pad ka Libita te tatelu ne aldew. Nangeen sikandan, nangiinum, wey nanlipereng. 5 Te igkeep‑at e ne aldew, migselem-selem sikandan ka mig-enew su egligkat e ka eg-uli. Piru ingkahiyan te amey te malitan ka mekaamung din, “Keen kew pa eyew kene kew eggutasan diye te deralanen; ne human kew naan pa hipanew.”

6 Sikan naa ka nangekeen wey nangiinum sikandan. Ne migkahi ka anuhang din, “Girehe kew pa man‑e wey gale-gale kew pa man‑e.”

7 Nataman, te egligkat e man‑e perem ka Libita, inggawiran man‑e sikandin te anuhang din. Purisu, nekeyirehe pad man‑e sikandin. 8 Te igkalalimme e ne aldew, migselem-selem sikandin mig-enew su egligkat e. Piru ingkahiyan e man‑e sikandin te anuhang din, “Keen kew pa wey maapun kew e ligkat.” Sikan naa ka nangeen e man‑e sikandan.

9 Te egligkat e perem ka Libita, ka duwey rin wey ka suluhuanen din, migkahi e man‑e ka amey te duwey rin, “Maapun e amana wey mahaan e egkasagkup. Meupiya pad keg girehe kew pad man‑e kayi wey gale-gale kew. Selem-selem kew e uli kaaselem.”

10-11 Piru warad migpahawid ka Libita wey migligkat e sikandan ka mig-untud te daruwa ne asnu. Eglineb e ka aldew ne migginguma sikandan te Hibus (Hirusalim e kuntee seini). Sikan naa ka migkahi ka suluhuanen, “Kayi ki bu re eg-aran te siyudad te me Hibusihanen.”

12 Piru migtabak ka Libita, “Kene egkaayun ne eg-aran ki kayi te kene ne inged te me Israilita. Egleus ki diye te Gibiya.” 13 Ne migkahiyan din pad man‑e ka suluhuanen din, “Egpabulus ki diye te kewun‑aan wey diye kid eg-aran te Gibiya wey ke Rama naa.” 14 Sikan naa ka migpabulus pad sikandan. Ne diyad sikandan nasagkupi te Gibiya ne sakup te tane ni Binhamin. 15 Migtulan sikandan diye te Gibiya eyew diyad sikandan eggirehe. Piru ware egpeyirehe kandan sikan naa ka naminpinnuu re sikandan diye te plasa te siyudad.

16 Te egkasagkup e, due buyag ne lukes ne migpuun diye te kamet din. Matig-Ipraim sikandin, piru miggalin e sikandin mig-ugpe te Gibiya ne in-ugpaan te me kabuhalan ni Binhamin. 17 Nasil-apan te buyag ne due me etew diye te plasa te siyudad, wey mig-insaan din sikandan, “Hendei kew migpuun, wey hendei kew egpabulus?”

18 Ne migtabak ka Libita, “Diye key migpuun te Bitlihim ne sakup te Huda, wey eggendiye key te bubungan te Ipraim ne ugpaan ney. Miggendiye key te Bitlihim ne sakup te Huda wey eg-uli key e kuntee diye te baley ku.* Te Hibruwanen: baley te Magbebaye ne Manama. Kayi key pad perem eg-aran, piru ware egpeyirehe kanami. 19 Iyan ney re iya prublima ka eggirehaan su duen ma lahami ney ne igpakeen ney te me asnu ney. Ne due man‑e paan ney wey binu.”

20 Ne migkahi ka buyag, “Meupiya. Egpekeyirehe kew diye te baley ku. Egbehayan ku sikaniyu te minsan nekey ne keilanganen niyu, kene kew re lipereng kayi te plasa.” 21 Sikan naa ka migduma sikandan te buyag. Te pegginguma ran, impakeen te buyag ka me asnu ran. Inlu‑luan dan ka me paa ran, ne nataman nangeen sikandan wey nanginum. 22  ✡ Hin 19:5-8.Taheed te miggale-gale sikandan, due lalung ne me etew ne sahuhune ne migginguma. Inlingutan dan ka baley te buyag wey impandukduk dan ka gumawan. Ne ingkahiyan dan ka buyag, “Palihawanga nu ka mahaliyug nu ne lukes su egguliran† Te Hibruwanen: eg-il-ileen. ney.” 23 Ne miglihawang ka buyag te baley rin wey migkahi, “Me alukuy ku, kene egkaayun. Kene kew himu te maligsem su mahaliyug ku ka seini ne lukes. 24 Due anak ku ne mengebay, wey due duwey te mahaliyug ku ne lukes. Igpalihawang ku sikandan kuntee, wey himuwa niyu ke nekey ka igkeupii niyu ne eggimuwen kandan. Piru kene niyu himuwa seini se maligsem te mahaliyug ku.” 25 Piru ware migpammineg kandin ka me lalung. Sikan naa ka impalihawang e te Libita ka duwey rin wey imbehey e kandan. Impehes dan te egleheng ka malitan wey inggilabetan dan taman te napawaan. Ne wey ran e peen-enengi ke egpamalat-palat e.

26 Egkaliwaswas e ne nakalibed ka malitan, wey diye de iya nakabahed sikandin te gumawan te baley te buyag ne intuenan te asawa rin. Ne diyad sikandin napawei. 27 Te inlukatan e te Libita ka gumawan, su egligkat e sikandin, iyan din e nakita se duwey rin ne nakabahed de wey nakahen-gen naan de te gumawan. 28 Ne migkahi ka Libita, “Enew kad e su eggipanew kid.” Piru napatey bes e ka duwey rin. Purisu, indulan din e ka duwey rin te asnu, wey migpabulus sikandin ka mig-uli. 29 Te pegginguma rin diye te baley rin, migkuwa sikandin te ugpit wey insapu din ka lawa te duwey rin te sapulu wey daruwa ne sapu, wey impamehey rin seini diye intiru ne inged ne sakup te Israil. 30 Nakakahi ka langun ne nakakita, “Keyey, ware de due nakita ta, wey ke neyitabu naa ne iling kayi puun pad te peg-awe ta te Ihiptu. Egmalalahey ki wey egmasabsabutey ki ke nekey‑a ka eleg ne eggimuwen ta!”