1 Ne miglibulung ka langun ne kabuhalan ni Israil diye te tangkaan te Magbebaye ne Manama diye te Mispa. Ka duma kandan egpuun te Dan ne dapit te igkahibang ne balabahan, wey Biir-Siba ne dapit te igkakawanan ne balabahan, lagkes seeye se diye nangugpe te talipag te Weyig ne Hurdan diye te Gilyad ne dapit te igsile. 2 Mig-apil degma ka me pangulu te langun ne kabuhalan ni Israil te peglibulung te keet-etawan te Manama. Migginguma te hep‑at ne gatus ne libu (400,000) ka me sundalu ne iyan panganiban se kampilan.

3 (Nakataha ka me kabuhalan ni Binhamin ne miglibulung ka me Israilita diye te Mispa.)

Ne mig-inse ka me Israilita, “Nangeni key mania te neyitabu ka seini se mareet ne himu?”

4 Ne migtabak ka Libita ne asawa te malitan ne inggimatayan, “Migtulan key te duwey ku diye te Gibiya ne sakup te tane ni Binhamin eyew eg-aran key pad diye. 5 Te marusilem e, due migginguma ne lalung ne me pangulu te Gibiya wey inlingutan dan ka baley ne intuenan ney. Eggimatayan a perem nikandan wey impehes te eggilabet ka duwey ku taman te napatey sikandin. 6 Ne in-uyan ku ka lawa rin wey insapu ku seini te sapulu wey daruwa* Insapu seini te sabeka ne pulu wey daruwa (12) su in-atul te sapulu wey daruwa ne kabuhalan ni Hakub. (12) wey indulung ku seini diye te intiru ne inged ne sakup te Israil, tenged su subla ne dereeti ka inggimu ran wey lilinditi seini. 7 Ne kuntee, sikaniyu se me Israilita, lalag kew naan e ke nekey ka eleg ne eggimuwen ta.”

8 Ne miglegse ka langun ne etew migsasindeg wey migkahi, “Ware sabeka kanta ne eg-uli diye te balungbalung ta wey ke baley te naa. 9 Na, seini ka eggimuwen ta te Gibiya: eglusuran ta sikandan wey egpintut-pintut ke hentew kanta ka eglusud. 10 Eg-angey ki te me etew te langun ne kabuhalan ni Israil eyew iyan egbehey te egkakeen te me sundalu ta. Ke due mahatus (100) ne etew te sabeka ne kabuhalan, ne sapulu ka egkuen ta kandan. Ne emun ke sapulu ne libu (10,000) sikandan, ne mahatus ka egkuen ta kandan. Ne ka egkasame iyan egparusa te Gibiya tenged te maligsem ne inggimu ran te Israil.” 11 Sikan naa ka nekeg-uyun ka langun ne Israilita ne eglibulung eyew eglusud te Gibiya.

12 Ne due me etew ne insuhu te me kabuhalan ni Israil, wey impakahiyan dan ka kabuhalan ni Binhamin, “Amana ne dereeti ka inggimu niyu due. 13 Ne kuntee, ibehey niyud kanami ka lalung ne me etew ne miggimu te mareet due te kaniyu eyew eggimatayan ney eyew egkaawe e ka dereeti ne neyitabu te Israil.” Piru ware linglingaa te me kabuhalan ni Binhamin ka karumaan dan ne me Israilita. 14 Nasi de iya sikandan migsaamul te me matig-Gibiya eyew egpakiggira te me karumaan dan ne me Israilita. 15 Te seeye ne aldew, nalibulung ka me kabuhalan ni Binhamin wey due daruwa ne pulu wey hen‑em ne libu (26,000) ne sundalu ran, ware pad labet te pitu ne gatus (700) ne bahani ne me sundalu te Gibiya. 16 Ne due nakasewug ne gibang ne me bahani ne me sundalu, wey me tummawan sikandan ne eglambuyug te batu su egkasuhat dan minsan ka bulbul ne deisek. Me tummawan iya sikandan. 17 Ne nakaalam degma ka me Israilita te hep‑at ne gatus ne libu (400,000) ne me sundalu wey neelin sikandan langun ne me bahani. Ne ware dan pad ilagkes te egseel ka me sundalu ne me kabuhalan ni Binhamin.

18 Ne nangendiye ka me Israilita te Bitil eyew eg-inse te Manama. Migkahi sikandan, “Hentew ne kabuhalan ka eggun‑a ne egpakiggira te me kabuhalan ni Binhamin?”

Migtabak ka Magbebaye ne Manama, “Iyan eggun‑a ka kabuhalan ni Huda.”

19 Te maselem e, migselem-selem ka me Israilita ne nangekampu diye te marani te Gibiya. 20 Nangendiye sikandan eyew egpakigkuntere te kabuhalan ni Binhamin wey migpangandam e sikandan ka eglusud te Gibiya.

21 Ne migligkat e diye te Gibiya ka me sundalu te me kabuhalan ni Binhamin wey migpahiggireey e te me Israilita. Te seeye ne aldew, daruwa ne pulu wey daruwa ne libu (22,000) ne me Israilita ka neyimatayan te kabuhalan ni Binhamin. 22-23 Ne nangendiyad e man‑e ka me Israilita te Bitil, wey naninehew sikandan diye taman te marusilem. Ne mig-insaan dan ka Manama, “Egpakiggira key naan pad te me karumaan ney ne me kabuhalan ni Binhamin?”

Ne migtabak ka Manama, “Uya.”

Sikan naa ka nabagget ka me Israilita. Ne migpangandam e man‑e sikandan diye te inged ne inggiraan dan te miglihad ne aldew. 24 Te seup ne aldew, inlusuran dan e man‑e ka kabuhalan ni Binhamin. 25 Te seini ne timpu, insinug-ung sikandan te kabuhalan ni Binhamin puun te Gibiya. Ne napatayan e man‑e sikandan te sapulu wey walu ne libu (18,000) ne iyan panganiban se kampilan. 26 Ne nangendiyad e man‑e ka langun ne Israilita te Bitil ka eglungku. Migpinnuu sikandan ka egsinehew diye te tangkaan te Manama. Migpuasa sikandan taman te marusilem wey nanguyan te egmanutungen ne igpanubad, wey me halad eyew egpekeg-uli ka meupiya ne geyinawa ran te Manama. 27 Ne mig-inse ka me Israilita diye te Magbebaye ne Manama. Te seeye ne timpu, diye te Bitil ka Tahuanan te Kasabutan te Magbebaye. 28 Iyan migtalipun dutu si Pinihas ne anak ni Iliyasar ne anak ni Aarun. Ne mig-inse e man‑e ka me Israilita te Magbebaye ne Manama, “Egpakigkuntere key naan pad man‑e te karumaan ney ne me kabuhalan ni Binhamin, wey ke kenad e?”

Migtabak ka Manama, “Lusuri niyu sikandan, su kaaselem igpepanalu ku sikaniyu kandan.”

29 Purisu, impalingutan te me Israilita te me sundalu ne eggepas ka Gibiya. 30 Te igkatelu ne aldew, inlusuran dan ka kabuhalan ni Binhamin diye te seeye ded ne inged. 31 Ne nanlihawang ka me kabuhalan ni Binhamin ka egkuntere te me Israilita taman te nakapariyu e sikandan te siyudad. Ne due tatelu ne pulu (30) ne me Israilita ne neyimatayan dan diye te me deralanen te Bitil wey Gibiya. 32 Migkahi ka me kabuhalan ni Binhamin, “Natalu te red man‑e sikandan.”

Piru migkahi ka me Israilita, “Eg-isues ki wey egpalupuhen ta sikandan kanta diye te deralanen eyew egpakapariyu sikandan te siyudad dan.” 33 Ne mig-isues ka me sundalu te Israil wey nanlibulung sikandan diye te Baal-Tamar taheed te nanlihawang e ka duma ne me Israilita ne miglingut miggepas diye te Gibiya. 34 Migginguma te sapulu ne libu (10,000) ka in-alam ne me bahani ne miggun‑a miglusud te Gibiya. Ne amana ne makaalat-halat ka gira ran wey ware nataheyi te me kabuhalan ni Binhamin ne mahaan e sikandan egkatalu. 35 Ne imbulihan te Magbebaye ne Manama ne egkatalu te me sundalu te me kabuhalan ni Israil ka me sundalu te me kabuhalan ni Binhamin. Te seeye ne aldew nekeyimatey sikandan te daruwa ne pulu wey lalimma ne libu wey sabeka ne gatus (25,100) ne me sundalu te me kabuhalan ni Binhamin. 36 Ne nasahimanu te me kabuhalan ni Binhamin ne natalu e sikandan.

Nangisues ka me Israilita tenged su migsalig ma sikandan te me duma ran ne miggepas miglingut diye te Gibiya. 37 Ne miggaan-gaan miglusud ka me etew ne nanggepas diye te Gibiya wey inggule dan te egpanibas ka langun ne etew diye te siyudad. 38 Due tuus te me Israilita ne namallahuy wey seeye se me etew ne nanggepas, emun ke egpakakite e sikandan te dakel ne ebel diye te siyudad, 39 eglibed e ka me Israilita ne namallahuy, eyew egpakiggira te kabuhalan ni Binhamin. Te seeye ne timpu, nakapatey ka kabuhalan ni Binhamin te tatelu ne pulu (30) ne me Israilita. Nakakahi sikandan, “Natalu te red man‑e ka me Israilita.” 40 Piru te migbunsud e mig-eebel ka siyudad, miglilingey ka me kabuhalan ni Binhamin wey nakita ran ne nasilaban e ka intiru ne siyudad dan, wey dakel amana ka ebel. 41 Ne migpalilibed e ka me Israilita wey naliyasan ka kabuhalan ni Binhamin su natahaan dan ne egkahunaan e sikandan. 42 Namallahuy sikandan peendiye te disirtu, piru neumaan ded sikandan. Neeletan sikandan te susuluhi ne me sundalu ne nanlihawang ne egpuun te siyudad. 43 Warad egkapallahuyan dan su inlingutan sikandan te me Israilita wey neumaan dan sikandan diye te igsile te Gibiya. 44 Migginguma te sapulu wey walu ne libu (18,000) ka migpatey ne bahani ne me sundalu te kabuhalan ni Binhamin. 45 Namallahuy ka duma diye te disirtu peendiye te pahangen te Rimun. Nakapatey ka me Israilita te lalimma ne libu (5,000) diye te deralanen. Impanalukunan dan ka duma peendiye te inged ne Gidum, wey nakapatey pad man‑e sikandan te daruwa ne libu (2,000) ne etew. 46 Migginguma ka neyimatayan ne bahani ne me sundalu te kabuhalan ni Binhamin te daruwa ne pulu wey lalimma ne libu (25,000).

47 Piru due nakapallahuy ne hen‑em ne gatus (600) ne etew diye te disirtu diye te pahangen te Rimun, wey migtagtaheed sikandan mig-ugpe diye te hep‑at ne bulan. 48 Ne migmanlibed ka me kabuhalan ni Israil wey impangimatayan dan ka langun ne etew wey me mananap ne neumaan dan. Ne impanilaban dan degma ka langun ne lungsud ne nenaliharan dan.