18
Ka peggendiye ni Hirimiyas te baley te talaggimu te kuren ne tane
1 Ne ingkahiyan e pad man‑e te Magbebaye ne Manama, 2 “Tupang ka diye te baley te talaggimu te kuren ne tane.* Te dengan ne timpu, egmangimu ka me etew te kuren puun te tane. Ne diye kud iglalag ke nekey ka igpalalag ku keykew.” 3 Purisu miggendiya ad en iya te talaggimu te kuren ne tane wey neumaan ku sikandin diye ka sasangan ne egpangimu te kuren. 4 Ne nakita rin ne mareet ne egpitawen ka kuren ne neyimu rin, purisu imbalbalawan din e man‑e seini te eggimu sumale te igkeupii rin ne klasi te kuren.
5 Ne seini ka impanengneng te Magbebaye, 6 “He keet-etawan te Israil, kahiyen niyu buwa ne kene ku egkeyimu kaniyu ka eggimuwen te talaggimu te kuren? Egpekeiling kew re degma te malamiket ne tane kayi te belad ku! 7 Ne emun ke migkahi a te egguhusen ku wey ke egdereetan ku naa ka sabeka ne nasud wey ke migharian naa, 8 piru ke eg-inniyug ded ka keet-etawan te sika ne nasud te mareet ne himu ran, kene kud igpabulus ka peglegpad ku. 9 Ne emun ke migkahi a man‑e te eggimu a te nasud wey ke migharian naa wey eglig‑enen ku seini, 10 piru ke kene egtuman keddiey su nasi eggimu te mareet ka sika ne nasud, kene kud igpabulus ka meupiya ne eggimuwen ku. 11 Sikan naa, kahii nu ka keet-etawan te Huda wey ka me mahinged te Hirusalim te seini ka inlalag ku: ‘Pammineg kew! Migplanu ad wey migpangandam ad te peglegpad kaniyu! Purisu, engked kew e te maddeet ne me himu niyu. Balbalawi niyud ka me batasan niyu wey ka hinimuwan niyu!’ 12 Piru egtabak sikandan keykew ne egkahi, ‘Kene! Mania te eggimuwen ney sika? Igpabulus ney ka hinimuwan ney. Kene key en iya langun egmanlingeg-lingeg wey eggimuwen ney naan de iya ka mareet ne igkeupii ney!’ ”
Nalingawan e te Israil ka Magbebaye din
13 Purisu migkahi ka Magbebaye,
“Panginsei nu ka langun ne nasud
ke duen e neyitabu ne iling kayi dengan.
Dereeti naan de iya ka inggimu te Israil, ka mengebay ne siyudad!
14 Kene egkaawaan te isnu ka me batuwen ne bubungan te Libanun,
wey kene egkeetiyan ka me maagsil ne sebseb.
15 Piru nalingawan ad mule te keet-etawan ku.
Egpanutung e sikandan te insinsu diye te ware karuan ne me diyus-diyus.
Warad sikandan mig-ikul te eleg wey tapey ne dalan,
wey iyan dan e in-ikul ka nakasaligkat kandan.
16 Natamtamanan e nareeti ka inged dan ne egkalemlemetan e te ware egtamanan.
Ne egkengaaldek e
wey egmakakelengkeleng naan de ka langun ne etew ne eglihad.
17 Egtalagtahen kud ka keet-etawan ku diye te me kuntere dan
iling te alinepung ne eglayap te kalamag ne egpuun te igsile.
Eg-inniyuhan kud sikandan,
wey kene kud egbulihan ke due karereetan ne egginguma kandan.”
Ka mareet ne planu te me etew ki Hirimiyas
18 Ne migkahi ka me etew, “Mahaan kew e, eggimu ki te paahi ne egpakapeeneng-eneng e si Hirimiyas! Ma-naa su kene ki ma egkaaminan te me talagpanubad ne egpanulu kanta, te me etew ne matagseb ne egtambag kanta, wey te me prupita ne egwali te lalag te Magbebaye! Purisu, igsumbung tad sikandin wey kene kid e egpammineg ke nekey ka eglalahen din.”
19 Purisu mig-ampu a ne migkahi, “Magbebaye, bulihi a, wey pammineha nu ka inlalag te me kuntere ku meyitenged keddiey. 20 Meupiya ka inggimu ku kandan, piru eleg naan iya ne egsulian te mareet ka meupiya? Miglulungag e sikandan eyew eggimatayan a. Sumsumana nu ne mighangyu a keykew eyew kene nu igpeula-ula kandan ka langet nu. 21 Piru kuntee, Magbebaye ne Manama, balahara nud seeye se me etew ne egpatey te gira, wey ke me anak dan naa ne egpatey te gutas. Balahara nud ka me malitan ne egpatey se me anak wey me asawa, balahara nud ka me buyag ne me lukes ne egpatey te dalu, wey ka me kankanakan dan ne egpatey diye te giraanan. 22 Ipatigkew nu ipahuhus te maddeet ne me etew ka me baley ran, wey pepanguleyia nu sikandan te pegkaaldek! Migpepaluwak e sikandan te egkeuluhan ku wey miglilit‑ag e te egsaharan ku. 23 Piru nakataha ka, he Magbebaye te planu ran te peggimatey keddiey. Sikan naa ka kene nu sikandan pasayluwa te maddeet ne me himu ran wey te me sale dan. Tuhuti nud ne egkatalu sikandan te me kuntere dan, wey ipeula-ula nu kandan ka langet nu.”