17
Ka sale te Huda wey ka legpad
1 Ne migkahi ka Magbebaye ne Manama, “Keet-etawan te Huda, nakakulit e ka me sale niyu due te makehal ne me pusung niyu, wey diye te me sungey-sungey te pikungan te me altar niyu ne tutunganan te igpanubad. 2 Egsimba ka me anak niyu diye te me altar ne tutunganan te igpanubad wey diye te me larawan te diyus-diyus ne si Asira ne impasasindeg lenged te mallapung ne me kayu, diye te me labuntud, 3 wey diye te me bubungan. Ne igpaahew kud te me kuntere niyu ka me karatuan niyu tenged te langun ne sale ne inggimu niyu kayi te intiru ne nasud. 4 Ne egkeengkeran niyud ka tane ne imbehey ku kaniyu, wey igmeuripen kud sikaniyu te me kuntere niyu diye te inged ne ware niyu nanengnengi, tenged te langet ku ne egpekeiling e te egkanlabkanlab ne hapuy ne kene egkataman.”
Ka lein-lein ne me lalahen
5 Ne migkahi pad man‑e ka Magbebaye,
“Egdilusen ku seeye
se eg-inniyug keddiey
wey egsalig te etew
ne eglig‑en kandan.
6 Iling sikandin te pinamula diye te disirtu,
ne migtubu diye te mammara
wey mapeit ne tane ne ware duma ne egtubu.
Ware meupiya ne egkeyitabu kandin.
7 “Piru egpanalanginan ku mule ka etew
ne egsalig keddiey.
8 ✡ Sal 1:3.Egpekeiling sikandin te kayu ne migtubu diye te lenged te beuhan,
ne egpekeuma ka me dalid diye te weyig.
Kene sikandin egkaaldek ke egginguma ka gulabung
su kene ma egkallanes ka me dewun din.
Kene sikandin egkalaggew ke kene eg-uran
su layun ma sikandin egbebehas.”
9 “Amana ne mareet wey ubaten ka pusung te etew.
Ware egpekeiling kayi
wey ware egpakasabut.
10 ✡ Imp 2:23; Sal 62:12.Sikeddiey se Magbebaye, egpitew a te suman-suman te me etew
wey eg-ugsi-ugsi te pusung dan.
Eg-unahan ku ka tagse sabeka kandan sumale te hinimuwan dan,
wey pegbebatasan dan.”
11 Ne ka etew ne egpakaseleppi te mareet ne paahi,
egpekeiling te bayaku ne eg-elen te kene ne atelug din.
Te elat-elat te umul rin, egkaawe e ka seleppi din,
wey te katamanan egkanengnengan e te langun ne ungel sikandin.
Ka pegpangananey ni Hirimiyas te Magbebaye
12 Ne migkahi a, “Egpekeiling ka timplu ney te mabantug ne trunu ne diye te matikang ne bubungan, puun pad dengan. 13 Magbebaye, sikeykew re iya ka egkapallatengan te Israil. Egkengeyilawan ka langun ne mig-inniyug keykew. Ipanlebeng nu sikandan te tane su in-engkeran ke ma nikandan, se sebseb ne egpuunan te umul. 14 He Magbebaye, bawii a eyew egkeulian ad iya. Luwasa a nikeykew eyew egpakalihawang ad iya. Sikeykew re ka egsayeen ku! 15 Ne ingkahiyan a te keet-etawan, ‘Hendeid ka karereetan ne ingginalat te Magbebaye kanami? Mania te ware pad seini neyitabu?’ 16 Piru Magbebaye, ware ku pehesa sikeykew eyew egdereet te me etew, wey ke mig-iman-iman e naa te mareet ne egkeyitabu kandan. Nakataha ka kayi wey nakataha ka ke nekey ka inlalag ku. 17 Kena a ubag hinaaldeka su sikeykew ka aputanan ku te timpu te kalised. 18 Peyilawi nu seeye se migbayad-bayad keddiey, piru kene nu ubag himuwa sika keddiey. Tamtamani nu hinaaldeka sikandan, piru kena a ubag hinaaldeka. Tamtamani nu dereeti sikandan.”
Ka pegtuman te Aldew te Peggimeley
19 Ne ingkahiyan a te Magbebaye, “Hendiye ka wey sasindeg ka diye te Gumawan ni Binhamin ne bayaanan te me Hari te Huda ke egseled wey ke eglihawang te siyudad. Ne egkataman, hendiye kad man‑e te duma pad ne me gumawan te Hirusalim. 20 Ne kahii nu ka me Hari wey ka keet-etawan te Huda, wey ka langun ne mahinged te Hirusalim ne egbaye-baye te sika ne gumawan, te keilangan ne egpammineg sikandan te eglalahen ku. 21 ✡ Nih 13:15-22.Kahii nu sikandan te emun ke inggeyinawaan dan ka pegkeetew ran, keilangan ne kene sikandan eg-uyan te minsan nekey te Aldew te Peggimeley. Te sika ne aldew, kene sikandan egseled diye te me gumawan te Hirusalim ke due egmanguyanen dan. 22 Keilangan ne kene sikandan eg-uyan te minsan nekey puun te me baley ran wey ke egtrabahu naa te Aldew te Peggimeley. Keilangan ne igteil ran keddiey ka sika ne aldew su sikan ma ka insuhu ku te kaap-apuan dan. 23 Piru warad iya migpammineg keddiey ka me kaap-apuan dan wey ke miglinga-linga naa. Nasi de iya migmakehal ka me ulu ran. Kene iya sikandan egpadisiplina keddiey.”
24 Ne migkahi pad man‑e ka Magbebaye, “Kahii nu ka keet-etawan te keilangan ne egtumanen dan ka me suhu ku. Keilangan ne kene sikandan eg-uyan te minsan nekey te pegseled dan te me gumawan te siyudad te Aldew te Peggimeley. Keilangan ne eg-ileen dan ne matulus ka sika ne aldew, wey kene sikandan egtrabahu te minsan nekey. 25 Ne emun ke eggimuwen dan sika, ka me Hari wey me pangulu ne egpuun te kabuhalan ni Dabid, egpabulus ne egseled te sika ne me gumawan ne egpanguntud te me karwahi wey me kudde. Ne iling ded degma ka me upisyal wey ka keet-etawan te Huda wey te Hirusalim. Ne ka sika ne siyudad, eg-ugpaan iya te me etew. 26 Ne egpangendue ka me etew puun te me inged ne nakalingut te Hirusalim, wey puun te me lungsud te Huda wey Binhamin, puun te me bubungan,* Te Hibruwanen: Puun te Sipila. me puwalas wey te inged te Nigib. Egmanguyan sikandan te igmanubad dan ne egtutungen diye te timplu ku, wey te duma pad ne me halad te pegpasalamat, iling te harina, wey me insinsu. 27 Piru ke kene dan egtumanen ka inlalag ku meyitenged te Aldew te Peggimeley eyew te pegtahud keddiey, wey ke nasi de iya sikandan egmanguyan te minsan nekey te pegseled dan te Hirusalim, egpanilaban kud ka me gumawan wey ka me palasyu te Hirusalim. Ne warad iya egpekeebuk te sika ne hapuy.”