1 Nataman, migparani keddiey ka langun ne upisyal te me sundalu lagkes si Diyuhanan ne anak ni Kariyas, wey si Asaniyas ne anak ni Husayas, wey ka langun ne etew, puun te lerew peendiye te inila ne me etew. 2 Ne migkahi sikandan keddiey, “Iampu key ubag se nenasame diye te Magbebaye ne Manama nu. Masulug key pad dengan piru deisek key naan de kuntee, sikanami naan de iya se nakita nu kuntee. 3 Ampu ka te Magbebaye ne Manama nu eyew igpakita rin kanami ke hendei key egbaye, wey ke nekey ka eleg ne eggimuwen ney.”

4 Ne ingkahiyan ku sikandan, “Uya, ig-ampu ku sikaniyu te Magbebaye ne Manama ta, wey eglalahan ku re sikaniyu ke nekey ka tabak din. Ware iggeles ku kaniyu.”

5 Ne migkahi sikandan keddiey, “Eglegparan key perem te Magbebaye ne Manama ke kene ney eggimuwen ka minsan nekey ne eglalahen din. 6 Ne minsan pad ke igkeupii ney wey se kene, egtumanen ney iya ka eglalahen te Magbebaye ne Manama tenged su nakataha key ne due keupianan ney ke egtumanen ney ka iglalag din.”

7 Peglihad te sapulu ne aldew, impanengneng a te Magbebaye ne Manama. 8 Purisu impeumew kud si Diyuhanan, ka langun ne duma rin ne me pangulu te sundalu, wey ka langun ne etew, puun te inila peendiye te kene ne inila. 9 Ne ingkahiyan ku sikandan, “Migkahi ka Magbebaye, ka Manama te Israil ne impaampuan niyu keddiey para kaniyu, 10 ‘Emun ke egpabulus kew eg-ugpe te seini ne inged, igpasasindeg ku sikaniyu wey eglig‑enen. Kene ku egdereetan sikaniyu. Amana a nekegsendit te karereetan ne impasalerep ku kaniyu. 11 Kene kew e kaaldek te Hari te Babilunya su duma a nikaniyu, wey egluwasen ku sikaniyu puun kandin. 12 Igpapitew ku kaniyu ka himenew ku te paahi ne egkeyimenawan degma sikandin kaniyu, eyew igpalibed kew red nikandin diye te inged niyu.’

13 “Piru ke kene niyu egtumanen ka Magbebaye ne Manama niyu, ke kene kew egpabulus eg-ugpe te seini ne inged 14 wey nasi kew re iya egkahi, ‘Kene key eg-ugpe kayi. Eggendiye key te Ihiptu su ware gira wey ware bitil diye,’ 15 ne seini ka tabak te Amana ne Maresen ne Manama, ka Manama te Israil, ‘Emun ke nasabeke e ka suman-suman niyu ne eg-ugpe diye te Ihiptu, 16 nasi kew re iya egpakasalerep diye te gira wey gutas ne igkaaldek niyu. Ne diye kew re iya egpatey. 17 Ka langun ne egkeupian ne eg-ugpe diye te Ihiptu, egpatey te gira, bitil wey dalu. Ne ware minsan sabeka kandan ne egkaluwas wey ke egpakapallahuy naa te karereetan ne igpeula-ula ku kandan.’ ”

18 Ne migkahi pad man‑e ka Amana ne Maresen ne Manama, ka Manama te Israil, “Emun ke eggendiye kew te Ihiptu, igpeula-ula ku kaniyu ka mangune-kune ne langet ku ne impeula-ula ku te me mahinged te Hirusalim. Ne egdirilusen kew wey igkengaaldek te me etew. Egle-leihen kew nikandan wey eglemetan. Ne kene kew e egpakalibed kayi te inged niyu.”

19 Ne ingkahiyan ku pad man‑e sikandan, “Sikaniyu se nenasame ne keet-etawan te Huda, ingkahiyan kew e te Magbebaye ne Manama ne kene eggendiye te Ihiptu. Tantanuri niyu seini se impaney-paney ku kaniyu kuntee. 20 Amana ne seyyup seini se inggimu niyu. Mighangyu kew keddiey ne eg-ampu te Magbebaye ne Manama para kaniyu, wey migkahi kew pad man‑e te eggimuwen niyu ka langun ne iglalag din kaniyu. 21 Ne kuntee inlalag kud kaniyu ka langun ne inlalag te Magbebaye ne Manama niyu, piru ware niyu red man‑e seini tumana. 22 Purisu tantanuri niyu seini: egpatey kew te gira, gutas, wey dalu diye te Ihiptu, ka inged ne igkeupii niyu te eg-ugpe.”