1  ✡ 2Har 25:25.Te igkapitu ne bulan te seeye ded ne leg‑un, miggendiye si Ismail ki Gidaliyas duma te sapulu (10) ne etew rin. Anak si Ismail ni Nitaniyas wey apu ni Ilisama ne karumaan te pamilya te Hari, wey labew sikandin te me upisyal te Hari dengan. Ne taheed te egmangekeen sikandan langun, 2 migsasindeg e si Ismail wey ka sapulu (10) ne etew ka nangulabut te me kampilan, wey inggimatayan dan e si Gidaliyas, ka etew ne inggimu te Hari te Babilunya ne gubirnadur te Huda. 3 Inggimatayan degma ni Ismail ka langun ne Hudiyu, wey ka me sundalu ne matig-Babilunya ne duma ni Gidaliyas diye te Mispa.

4 Te pegkamaselem te ware pad nataheyi ne inggimatayan e si Gidaliyas, 5 miggingume e diye te Mispa ka walu ne pulu (80) ne etew puun te Sikim, Silu, wey Samarya. Ingkahisan dan ka me sumpe dan, immanggisi dan ka me kumbale dan, wey impamalian dan ka me lawa ran, eyew te pegpapitew ne miglungku sikandan. Migpanguyan sikandan te harina wey insinsu ne ighalad dan diye te timplu te Magbebaye ne Manama. 6 Nataman, miglihawang e si Ismail puun te siyudad te Mispa ka egsinehew ne migsinug-ung kandan. Te nekegsinug-ung e sikandan, migkahi e si Ismail kandan, “Seled kew, pitawa niyu si Gidaliyas.” 7 Te nakaseled de iya sikandan langun te siyudad, impangimatayan e sikandan enni Ismail wey impangulug e ka me lawa ran diye te belun.

8 Piru due sapulu kandan ne ware himatayi su ingkahiyan dan ma si Ismail, “Kene key himatayi nikeykew! Igbehey ney re keykew ka trigu, sibada, lana ne ulibu, wey teneb ne inggeles ney diye te me kamet ney.” 9 Ka belun ne impanguluhan ni Ismail te me lawa te me etew ne impangimatayan din, lagkes ka lawa ni Gidaliyas, belun ni Hari Asa. Impakaliyan seini ni Asa te timpu ne inlusuran sikandan ni Baasa ne Hari te Israil. Ne inggipenu ni Ismail te lawa te me etew ka seeye ne belun. 10 Ne impandakep e ni Ismail ka me malitan ne anak te Hari, lagkes ka langun ne etew diye te Mispa ne impiyal ni Nibusaradan ki Gidaliyas. Ne impanguyan din e sikandan te eglibed diye te Amun.

11 Nataman, nanengnengan e ni Diyuhanan ne anak ni Kariyas, wey te langun ne pangulu te me sundalu ka langun ne mareet ne inggimu ni Ismail. 12 Ne inlibulung dan e ka langun ne etew ran wey inlupug dan e si Ismail, wey neumaan dan e sikandin diye te marani te maluag ne lanew diye te Gibyun. 13 Ne naggale seeye se impandakep ni Ismail te pegkakita ran ki Diyuhanan wey te duma rin ne me upisyal. 14 Ne migpamallahuy e sikandan peendiye ki Diyuhanan. 15 Piru nakapallahuy si Ismail wey ka walu ne duma rin peendiye te inged te Amun.

16 Ne inlibulung e ni Diyuhanan wey te duma rin ne me upisyal ka me malitan, me bate, me upisyal, wey me sundalu ne impandakep ni Ismail puun te Mispa te neyimatayan din e si Gidaliyas ne anak ni Ahikam. Ne impandume e sikandan langun ni Diyuhanan puun te Gibyun 17 peendiye te Girut-Kimham ne marani te Bitlihim. Ne diye, migpangandam e sikandan peendiye te Ihiptu. 18 Naaldek sikandan ke nekey ka eggimuwen kandan te me matig-Babilunya tenged su inggimatayan ma si Gidaliyas ne anak ni Ahikam ni Ismail ne anak ni Nitaniyas. Si Gidaliyas ka inggimu te Hari te Babilunya ne gubirnadur te Huda.