Hub
Igpewun‑a
Ka baseen ni Hub, sabeka seini ne guhuren meyitenged te etew ne matareng ne impasalerep te mangune-kune ne karereetan—migpatey ka langun ne anak din, naawe ka langun ne karatuan din, wey miggingumaan pad iya man‑e sikandin te mangune-kune ne dalu. Ne due pitu ne baad te guhuren te seini ne baseen. Ne pinaahi te sika ne me guhuren, impanengneng te talagsulat ke nekey ka inggeram ni Hub wey te me alukuy rin meyitenged te sika ne me karereetan. Ne ka impurtanti ne baad te guhuren, iyan sika se paahi te Manama te peg-uyan te keet-etawan din. Ne nataman, migpapitew mismu ka Manama ki Hub.
Te marani pad te an-anayan te seini ne baseen, ingkahiyan ni Meibulan ka Manama te kene ne meupiya ka peg-uyan te keet-etawan din ne egdasahan din ka me matareng. Purisu diye egpangkus te iyan naan de egpuunan ne eggimu te matareng ka me etew tenged te dasag. Ne kenad e ne egpuun te pusung dan ka peggimu ran te matareng. Ne seini iya ka ingkahi ni Meibulan meyitenged ki Hub. Purisu intuhutan te Manama si Meibulan ne eg-el-elehan ka pegkamatinumanen ni Hub ke egpabulus-bulus naan pad sikandin ne matareng ke eg-antus sikandin.
Ne pinaahi te karaan ne pegpalintutuu, impasabut te me alukuy ni Hub ne mig-antus sikandin tenged su nakasale sikandin. Piru para ki Hub, kene perem ne eleg ne eg-antus sikandin te sika ne legpad su matareng ma sikandin ne etew. Ware din nasabut ke mania te intuhutan te Manama ne eggingumaan sikandin te makaliyas-liyas ne dalu te matareng ma sikandin ne etew. Purisu inhanggat din ka Manama ne eggendiye sikandan te hukumanan. Ne minsan pad due, ware naawei ka pegpalintutuu ni Hub, piru igkeupii rin ne eg-ileen sikandin ne matareng te Manama, wey egkaangken din ded ka kabantug isip matareng ne etew.
Ware tabaka te Manama ka me inse ni Hub. Piru inggehet ded te Manama ka pegpalintutuu ni Hub, pinaahi te geem wey katuenan din. Ne in-ila ni Hub ne labew ne matagseb ka Manama, duma te pegpariralem din, wey migbuyu sikandin te pasaylu te nenallalag din puun te langet din.
Ne ka katamanan te seini ne baseen, migpanengneng ne impalibed ded ki Hub ka meupiya ne keugpe din, wey migsubla pad sikandin ne matubung du te dengan. Ne impangehetan te Manama ka me alukuy ni Hub, su ware ma sikandan nakanengneng ke mania te mig-antus si Hub. Si Hub de ka nakasabut ne madmaresen pad ka Manama du te karaan ne pegpalintutuu.
Ka nenasulat te seini ne baseen
HUN‑A NE BAAD: Ka igpewun‑a 1:1–2:13
IGKARANGEB NE BAAD: Ka pegpalalahey ni Hub wey te me alukuy rin 3:1–27:23
a. Ka pegsagsahukul ni Hub 3:1-26
b. Ka an-anayan ne pegpalalahey 4:1–14:22
c. Ka igkarangeb ne pegpalalahey 15:1–21:34
d. Ka igkatatelu ne pegpalalahey 22:1–27:23
IGKATELU NE BAAD: Indayan ka katagseb 28:1-28
IGKEEP‑AT NE BAAD: Ka katamanan te lalag ni Hub 29:1–31:40
IGKALIMA NE BAAD: Ka me lalag ni Ilihu 32:1–37:24
IGKEEN‑EM NE BAAD: Ka me lalag te Manama 38:1–42:6
IGKAPITU NE BAAD: Katamanan ne lalag 42:7-17
HUN‑A NE BAAD: Ka igpewun‑a
1
(1:1–2:13)
Ka meupiya ne peg-ugpe ni Hub
1 Due etew ne egngaranan ki Hub ne mig-ugpe diye te Us. Matareng sikandin, wey ware igkarew‑ey. Due pegkaaldek din te Manama wey kene sikandin eggimu te mareet. 2 Due pitu ne anak din ne me lukes wey tatelu ne malitan. 3 Ne due pitu ne libu (7,000) ne karniru rin, tatelu ne libu (3,000) ne kamil, lalimma ne gatus (500) ne paris ne baka, wey lalimma ne gatus (500) ne beyan ne asnu. Ne susuluhi degma ka me suluhuanen din, purisu sikandin ka subla ne meyaman ne etew te langun ne nangugpe diye dapit te igsile. 4 Ka me anak din ne lukes, egmasubsubaley re ne egsahakeen diye te tagse baley ran mismu, wey egmanginggaten dan ka me atebey ran eyew eglagpu kandan te egkekeen wey eg-iinum. 5 Ne emun ke egpekeimpus e ka me anak din ne egsahakeen, igpeumew rin e sikandan eyew te pegpanubad para te pegmatulus kandan eyew egkaayun ded man‑e sikandan ne eg-apil te pegsimba te Manama, su migsuman-suman ma sikandin ne kema ke nakasale ka me anak din wey nenakalalag te mareet diye te Manama. Egselem-selem sikandin eg-enew, wey egtutung te igpanubad ne ayam, wey eg-atulen din egpanubari ka me anak din. Ne layun de iya sikandin egpanubad para te me anak din.
Ka peg-apul ni Meibulan te katareng ni Hub
6 ✡ Hin 6:2.Sabeka ne aldew, miglibulung ka me panalihan diye te tangkaan te Magbebaye ne Manama, wey diye degma si Meibulan* Te Hibruwanen: ka talagkuntere. te kalibulungan. 7 Ne mig-inse ka Magbebaye ki Meibulan, “Hendei ka migpuun?”
Ne migtabak si Meibulan, “Migleug-leug a diye te kalibutan.” 8 Ne migkahi e man‑e ka Magbebaye, “Ew. Ne nakabantey ke naa te suluhuanen ku ne si Hub? Ware egpekeiling kandin diye te ampew te tane—matareng sikandin wey ware igkarew‑ey, wey due pegkaaldek din keddi wey kene eggimu te mareet.”
9 Ne migtabak si Meibulan, “Uya le re iya su due egkaangey rin keykew. 10 Impariyu nu sikandan se taltalaanak te langun ne karereetan wey ka langun ne kandin. Impanalanginan nu ka langun ne inggimu rin, wey migmasalig amana ka me ayam din. 11 Kema dereeti† Te Hibruwanen: ketenga nu ka belad nu wey samsama nu. nu ka langun ne diye te kandin—pitawen ta ke kene sikandin egpanlalag te mareet keykew.”
12 Ne migkahi ka Magbebaye, “Uya, egtuhutan ku sikeykew ne eggimu te minsan nekey ne igkeupii nu diye te kandin, piru kene nu re sikandin menuwa.” Seeye naa, mig-awe e si Meibulan diye te tangkaan te Manama.
Ka pegdereet ni Meibulan te karatuan wey te me anak ni Hub
13 Sabeka ne aldew, taheed te migsahakeen ka me anak ni Hub diye te baley te kinakakayan ne anak din, 14 due etew ne migginguma diye ki Hub ne migpangguhud ne migkahi, “Taheed te migdaru key te me baka nu diye te kamet, wey migpepanabtab te me asnu, 15 sahuhune ne due nanginguma ne me matig-Sibiya wey impangimatayan dan e ka me duma ku ne me suluhuanen nu, wey impanuyuk dan e ka me ayam nu. Ne sikeddi naan de iya ka nakapallahuy. Sikan naa ka nekeendini a ka egguhud keykew.”
16 Te sasangan pad ka etew ne egpangguhud, duen e man‑e senge-etew ne migginguma wey migpangguhud ne migkahi, “Nasuhat te kilat ka me karniru nu wey ka me suluhuanen nu. Sikeddi naan de iya ka nasame, sikan naa ka nekeendini a ka egguhud keykew.”
17 Te sasangan pad degma ka etew ne egpangguhud, duen e man‑e senge-etew ne migginguma wey migpangguhud ne migkahi, “Inlusuran key te me matig-Kaldiya ne tatelu ne punduk, wey impanuyuk dan e ka me kamil, wey impangimatayan dan pad man‑e ka me duma ku ne me suluhuanen nu, wey sikeddi naan de iya ka nakapallahuy, sikan naa ka nekeendini a ka egguhud keykew.”
18 Te sasangan pad degma ka etew ne egpangguhud, duen e man‑e senge-etew ne migginguma wey migpangguhud ne migkahi, “Taheed te migmanliblibulung ka me anak nu ne egsahakeen diye te baley te kinakakayan ne anak nu, 19 sahuhune ne due nenekali ne kalamag puun te disirtu, wey nasuhat te seeye ne kalamag ka baley te anak nu. Nalundus ka baley wey neneutunan e sikandan langun wey nammatey e. Sikeddi de iya ka nasame, sikan naa ka nekeendini a ka egguhud keykew.”
20 Seeye de iya, migsasindeg si Hub wey inggisi din ka kumbale din wey in-abuluhan din ka ulu rin. Ne miglangkeb sikandin diye te tane wey migsimba te Manama. 21 Migkahi sikandin, “Miglesut a ne ware kukumbaleen puun te aanakan te iney ku, wey eglibed a diye te tane ne ware ded kukumbaleen. Ka Magbebaye ne Manama ka egbehey te langun, wey sikandin ded ka eggawi. Egdayanen ka ngaran din.”
22 Ne minsan ke neiling e dutu, ware ded iya man‑e nakasale si Hub wey ware miglalag te mareet diye te Manama.