1  ✡ Hub 1:6; 2:1.Nataman, migmasalig e ka me etew kayi te ampew te tane, wey migmasalig e degma ka anak dan ne me malitan. 2 Te pegkakita te me anak te Manama ne mateles amana ka me mengebay, impangasawa ran e ka igkeupii ran. 3 Ne migkahi ka Magbebaye ne Manama, “Kena a egkeupian ne egkeuyag ka me etew te ware egtamanan, su etew re sikandan. Egbehayan ku naan de sikandan te 120 ne leg‑un. Ne egkataman, egparusaan kud sikandan.” 4  ✡ Num 13:33.Te seeye ne timpu wey minsan pad te egpakasinundul ne me leg‑un, due me eleggasi kayi te ampew te tane. Sikandan ka me kabuhalan te seeye se me anak te Manama ne nakapangasawa te me mengebay. Ka me eleggasi ka me bahani wey ka migbantug ne me etew te dengan ne timpu.

5  ✡ Mat 24:37; Luk 17:26; 1Pid 3:20.Nakita te Magbebaye ne Manama ne egkanasnasian e ka mareet ne hinimuwan te me etew kayi te ampew te tane. Mareet layun ka langun ne egsumsumanen dan wey ka igkeupii ran. 6 Ne dutu, nekegsendit e ka Magbebaye ne Manama te neyimu rin ka etew kayi te ampew te tane, wey miglungku e sikandin. 7 Purisu migkahi e sikandin, “Egguleen ku kayi te ampew te tane ka me etew ne inggimu ku. Egguleen ku degma ka langun ne me mananap wey me manuk-manuk su nekegsendit a te neyimu ku sikandan.” 8 Piru, due sabeka ne etew ne ingkahale te Magbebaye ne Manama, sikandin si Nuwi.

9  ✡ 2Pid 2:5.Seini ka pangguhuren meyitenged ki Nuwi. Matareng ne etew si Nuwi, ware igkarew‑ey kandin te seeye ne timpu, wey talag-alukuy sikandan te Manama. 10 Ne due tatelu ne anak din ne ensi Sim, si Ham, wey si Hapit.

11 Piru nakita te Manama ne mareet ka duma ne me etew, wey nekeempet e ka mareet ne hinimuwan dan kayi te ampew te tane. 12 Nakita rin ne mareet e ka kalibutan su subla ne mareet ka hinimuwan te langun ne etew.

13 Ne migkahiyan te Manama si Nuwi, “Egguleen ku ka langun ne etew su nekeempet e ka mareet ne hinimuwan dan kayi te ampew te tane. Eggukuman ku sikandan duma te kalibutan. 14 Purisu, kuwa ka te kayu ne egngaranan te gupir wey himu ka te arka. Paninabengi nu naa ka seled, wey pamiketa nu ka seled wey ka lihawangan. 15 Himuwa nu seini ne 133 ne mitrus ka kalayat, daruwa ne pulu wey daruwa (22) ne mitrus ka kaluag, wey sapulu wey tatelu (13) ne mitrus ka katikang. 16 Atepi nu naa seini wey tukehi nu te liware te mitrus ka batang te lilliyungan. Himuwa nu seini ne tatelu ne andana wey himuwi nu te gumawan diye te kakiliran. 17 Egpasipukan ku ka kalibutan eyew egkahule ka langun ne miggeheyinawa. Egpatey ka langun, 18 piru eggimu a te kasabutan duma keykew. Untud kew te arka se alunggun duma te me anak nu wey te me asawa ran. 19-20 Paseled ka te arka te tigsabeka ne lunggunan te langun ne nakalkalasi ne mananap, me manuk-manuk, wey te langun ne egdul‑ug. Eggendue sikandan te keykew eyew kene sikandan egpamatey. 21 Uyan ka man‑e te nakalkalasi ne egkakeen wey itines nu eyew due egkakeen niyu wey te me mananap.” 22  ✡ Hib 11:7.Ne intuman ni Nuwi ka langun ne insuhu te Manama kandin.