5
Ka pegpabulus-bulus ni Ilipas te eglalag
1 “Hub, minsan pad egpangananey ka, ware iya egbulig keykew,
minsan ka me panalihan.
2 Ka kabelu wey ka pegkeimma,
egpakapatey te seeye se egkeungel-ungel, wey ware katagseb.
3 Nakakita ad e te egkeungel ne meupiya mule se egkeula-ula,
piru patulus ne egdilusen te Manama ka ugpaan din.
4 Ware egkengaaputan te me anak din,
egkengareetan sikandan diye te gumawan te siyudad,
wey warad iya egpakapangabang kandan.
5 Ne ka me uma te kamet din, egkekeenen e te egmanggutasan,
minsan ka egmanubu diye te me duhiyen,
wey eg-aminen te me halamlamen ka karatuan din.
6 Ka kalised, kene egpuun te alinepung
wey ka keyirapan, kene egtubu te tane.
7 Piru iyan ded egpuunan ka etew ne eg-antus sikandin,
iling te igmuk ne egmanlayap paribabew.
8 “Ke sikeddi pad sikeykew, egparani a iya te Manama,
wey iglalag ku kandin ka keugpe ku.
9 Sikandin de ka egpekeyimu te mabbantug ne himu ne kene egkasabut,
wey te me kein-inuwan ne kene egkaseel.
10 Impeuranan din ka tane,
wey impaweyihan din ka me kamet.
11 “Imparibabew te Manama seeye se mapariralemen,
wey imbehayan din te kahale seeye miglungku.
12 Ingguhus din ka me planu te limbungen,
eyew kene sikandan eglampus.
13 Egsahiluten din seeye se me matagseb
pinaahi red te kandan mismu ne katagseb.
Ne sahuhune ne egkapegnel
ka me planu te me limbungen.
14 Egkareleman sikandan minsan maaldew,
wey egmakapanamsam naan de minsan meudtu.
15 Piru egluwasen te Manama ka egkengaayu-ayu puun te kamatayen,
wey ka egkengaware-ware puun te seeye se egmandeeg-deeg kandan.
16 Purisu due mule egkapallateng te egkengaayu-ayu,
piru egbalabahan te Manama ka me makasesale ne eggimu te mareet.
17 “Ne tenged due, meupiya ka etew ne egsaparan te Maresen ne Manama,
purisu kene ka keenendueni ke egdisiplineen ka nikandin.
18 Sikandin ka egpali, wey sikandin ka egbukus te pali;
sikandin ka egpaddel, wey sikandin ded degma ka egbawi.
19 Egluwasen ka nikandin puun te langun ne karereetan.
20 Egluwasen ka nikandin puun te kamatayen tenged te gulabung,
wey te gira.
21 Egpangabangan ka nikandin puun te me salupet meyitenged keykew
wey ware igkaaldek nu ke egginguma ka karereetan.
22 Egngisiyan nu re ka gulabung wey ka karereetan.
Ne kene ka egkaaldek te me mahintalunan ne mananap.
23 Ne warad me batu diye te daruwan nu, wey kene kad eggilabetan te me mahintalunan.
24 Ne egkanengnengan nu ne ware igkaliyasi diye te ugpaan nu,
wey te pegleuy nu te me ayam nu, egkakita nu ne ware seini nasalini.
25 Ne egmasulug ka me kabuhalan nu,
iling kasulug te me hilamunen te tane.
26 Ne egmalayat ka umul nu,
wey kene ka egpatey te kene pad egginguma ka eleg ne timpu ne egpatey ka.
27 Nanengnengan ney ne malehet seini sumale te peg-ugsi-ugsi ney te malayat ne timpu.
Purisu pammineha nu seini wey himuwa nu para te keupianan nu.”