6
1 Ne migtabak si Hub,
2 “Ke egkatimbang de ka kalasayan
wey ka keyirapan ku,
3 mabehat pad seini du te pantad te dahat,
purisu kene kew keinu-inu te egpanlalag a te warad pegsuman-suman.
4 Impana a te Maresen ne Manama te eggilu ne tunud,
wey nekeempet te lawa ku ka lalas;* Te Hibruwanen: in-inum te panisingan ku ka hilu.
intumbuk te Manama keddi ka langun ne makaliyas-liyas ne panganiban din.
5 Kene egngangang ka asnu ke dakel ka sagbet,
wey kene egmahulub ka baka ke due egkasepe ne kumpay.
6 Ka egkakeen ne ware asin, kene ne mananam,
wey ka maangkag te atelug, ware nanam.
7 Warad ibeg ku ne egkeen te sika ne egkakeen,
su nekeiling naan de sika te mareet ne keenen.
8 “Igbehey perem te Manama ka egbuyuen ku,
wey egkarawat ku ubag perem ka igkeupii ku.
9 Iyan ku igkeupii ne eggimatayan ad perem te Manama.
10 Ke eggimuwen din seini, egkaliwang ad e.
Su minsan te masakit ne in-antus ku, ware ku supaka ka me suhu te matulus ne Manama.
11 Warad kabagget ku ne eg-iman-iman pad.
Nekey naan pad se eg-im-imanen ku te warad ma igkatiglingey ku te seini ne umul ku?
12 Kena a ne makehal iling te batu.
Kene ne iling te burunsi ka lawa ku.
13 Warad egkeyimu ku eyew egkabulihan ku ka pegkeetew ku,
wey warad e egpakabulig keddi.
14 “Sikeddiey se nabaybayaran,
migkeilangan a ubag perem te pegliwang te me alukuy ku,
piru nasi e re iya nikaniyu bebayungi ne in-engkeran ku ka Amana ne Maresen ne Manama.
15 Piru sikaniyu se in-isip ku ne me suled ku,
me talag-akal kew keddi.
Iling kew te beuhan ne egkeetiyan ke tingmeinit.
16 Ne egkabunbunan ka beuhan te apiyew, wey isnu,
17 piru ke eg-aldew, egkaawe e ka weyig,
wey egkeetiyan e ka beuhan tenged te keinit.
18 Ne ka me etew ne nanguntud te me kamil ne migluyud ne due me dinulan,
migsuwey te dalan dan eyew te pegpamitew te weyig, piru ware nakita ran.
Purisu nammatey sikandan diye te inged ne ware mig-ugpe.
19 Migluyud ka me matig-Timan ne egpamitew te weyig,
wey ka me matig-Siyiba ne mig-iman-iman ne due egkakita ran.
20 Piru nasuhey re sikandan te subla ne peg-iman-iman dan.
Naruruhu de iya sikandan te pegginguma ran diye te eggendiyaan dan.
21 Nenekeiling kew en iya te sika ne beuhan,
wey ware igpakabulig niyu keddi.
Nasi kew nenaaldek te pegkakita niyu te makaalat-halat ne neula-ula ku.
22 Wara ad iya mighangyu ne egdasahan a nikaniyu,
wey wara a migpabulig kaniyu puun te me karatuan niyu.
23 Wara a degma migpepangabang kaniyu puun te egkukuntere keddi,
wey me talagdeeg-deeg.
24 “Iyan ku re ighangyu ne egpanuluen a nikaniyu su egpeeneng-eneng ad.
Pasabuta a nikaniyu ke nakasale e ma.
25 Amana ne masakit ka me lalag ne due kamalehetan.
Piru nekey naa ka kamalehetan te igbayung niyu keddiey?
26 Migsuman-suman kew buwa ne egtul-iren niyu ka me lalag ku
su para kaniyu ware karuan te impanlalag te etew ne warad kapabulusan iling keddi?
27 Ne minsan ka me ilu, egpintutpintutan niyu ke hentew ka egpekeuripen kandan,
wey igbelegye niyu ka me alukuy niyu.
28 “Piru pitawa a ubag nikaniyu,
su kena a eg-uubat kaniyu.
29 Sumsumana niyu abayi,
ipeeneng-eneng niyud sika se seyyup ne himu,
wey nengnengi niyu ne ware seyyup ne neyimu ku.
30 Wara a mig-uubat.
Nakanengneng a ke nekey ka eleg wey ka seyyup.