10
1 Ne migpabulus-bulus si Hub ka migkahi,
“Neupul ad e te umul ku.
Sikan naa ka egpakasagsahukul ad e.
Igpangguhud ku ka masakit kayi te pusung ku.
2 Egkahiyan ku ka Manama: Kena a hukumi,
panengnenge e pa ke nekey ka sale ne igbayung nu keddi.
3 Nahale ke naa te pegbayad-bayad nu keddi?
Mania te in-ang-anggaan a nikeykew se inggimu nu,
piru inlapihan nu mule ka me planu te me makasesale?
4 Klaru ne kene ne iling ka mata nu te mata te etew,
ne iyan egpuunan ne ware tamanan te egkakita nu iling te egkakita rin,
wey eleg mule ka peggukum nu te me etew.
5 Kene ne iling de kalepet te umul te etew ka umul* Te Hibruwanen: me aldew. nu.
Kene ne iling de kaluhey te peg-ugpe te etew ka peg-ugpe† Te Hibruwanen: me leg‑un. nu
6 ne egpakannekal ka iya ne egpamitew te kene ne meupiya ne neyimu ku,
wey eg-ugsi-ugsi te sale ku.
7 Mig-ugsi-ugsi ka te sale ku minsan ke nakanengneng ka ne ware iya sale ku,
wey ware egpakapangabang keddi puun keykew.‡ Te Hibruwanen: te belad nu.
8 Sikeykew ka miggimu keddi.
Piru kuntee, sikeykew bes ded ka egdereet keddiey?
9 Tantanuri nu ne inggimu a nikeykew puun te tane,
ne kuntee, igpalibed e red man‑e nikeykew te tane.
10 Sikeykew ka miggimu keddi diye te aanakan te iney ku,
iling te kisu ne neyimu puun te gatas.
11 Sikeykew ka miggimu te me tul‑an wey me uhat ku
wey imbukusan a nikeykew te sapu wey laplap.
12 Imbehayan a nikeykew te umul wey impapitew nu keddi ka kene egkabalbalawan ne geyinawa nu,
wey in-ay-ayaran a nikeykew tangguwa.
13 Piru kuntee, nakanengneng ad te malehet ne duen bes inggeles nu ne planu nu keddi,
14 ne iyan ka peg-iipat ke egpakasala a.
Ne kena a egpasayluwen nikeykew te mareet ne egkeyimu ku.
15 Ne emun ke nakasala a iya, mekeyid‑u-hid‑u a iya,
piru ke ware sale ku, kene e red man‑e egpakapeggasal,§ Te Hibruwanen: eglengak.
su neelin naan de iya ne keyilawan wey subla ne peg-antus ka neula-ula ku.
16 Minsan egmenuwen ku te egpakannekal, piru egpekeiling ka te liyun ne eggingutel keddi,
wey eggimu ka te me kein-inuwan te pegkuntere keddi.
17 Due layun me talagpamalehet nu ne egdakesel keddi,
wey egkatimtimulan ka langet nu keddi.
Ne ware ka migsanggel ka eglusud keddi.
18 “Mania te impalesut e pad nikeykew?
Meupiya pad perem ke migpatey ad te ware pad nakakita keddiey.
19 Meupiya pad perem ke wara ad neuyag.
Nabunggu e lad perem te diye e pad te aanakan te iney ku, wey impaleus e re te eglebeng te peglesut ku.
20 Malepet naan de ka umul ku,
purisu, balahara ad e eyew egkahale e pad ubag minsan te malepet naan de ne timpu.
21 Mahaan ad e eggendiye te inged ne durusilemi,
wey kena ad e eglibed;
22 ka inged ne durusilemi wey ware meupiya ne keugpe,
ne minsan ka malayag neyimu e ne marusilem.”