9
Ka tabak ni Hub ki Bildad
1 Ne migtabak si Hub,
2 ✡ Hub 4:17.“Uya, malehet iya ka ingkahi nu.
Piru egmenuwen naa te etew te egpamalehet ne ware sale din diye te tangkaan te Manama?
3 Egmenuwen din te egpakig-apul te Manama?
Te linibu ne inse te Manama, ware minsan hentew ne egpakatabak.
4 Matagseb wey maresen amana sikandin,
wey ware egpakasukul kandin.
5 Eg-antahen din ka me bubungan te ware pegpataha,
wey egpanlunawen din seini tenged te langet din.
6 Egpalilinuhen din ka me pabunsuranan te tane,
wey egkengawelwel ka me batu diye te diralem ne natahuan kayi.
7 Sikandin de ka egpakasuhu te aldew ne kene egpasileen,
wey te me bituen ne kene egpalayahen.
8 Sikandin de ka miggimu te langit,
wey sikandin de ka egpakapasanggel te me bunlud te dahat.
9 Sikandin ka miggimu te me bituen ne egngaranan te Usu,
Uriyun wey Pliyadis.
10 Sikandin de ka egpekeyimu te mabbantug ne himu ne kene egkasabut,
wey te me kein-inuwan ne kene egkaseel.
11 Ke eglihad sikandin, kene ku sikandin egkakita
wey egkasahinda.
12 Ne egkakuwa rin ka igkeupii rin wey ware egpakabalabag kandin.
Ne ware egpekeinse kandin ke mania te eggimuwen din sika.
13 “Kene egkabewu ka langet te Manama.
Ne minsan ka me suluhuanen te salimbaweng ne si Rahab,* Kene ne seini ka malitan diye te Hiriku ne egpamelegye te lawa rin. Ngaran seini te salimbaweng ne egkabasa diye te Hub 26:12; Salmu 90:11; Isayas 51:9 wey migsimbulu seini te Malalab ne Dahat ne egkabasa diye te Isayas 30:7 wey Salmu 87:4.
egparuma-ruma kandin tenged te liyas.
14 Purisu kena a egpakig-apul te Manama.
Wara a nakanengneng ke nekey ka iglalag ku kandin.
15 Minsan ware sale ku, kena a iya egpakapangatarengan.
Ne iyan ku re iya egkeyimu ka egpeyid‑u-hid‑u te Manama ne talewukum ku.
16 Su minsan eghangyuen ku sikandin ne eg-atubang key wey egsuhut sikandin,
kena a egpalintutuu ne egpamminehen a nikandin.
17 Su imbaybayaran a nikandin iling te mangune-kune ne pegpangalamag wey peg-uran,
wey kamasulug a nikandin pamalpalii te ware ayatanan.
18 Kena ad e nikandin egpaheheyinaween te subla ne masakit,
su nasi a patamtamani te egbayad-bayad.
19 Su ke egpapitawey re te kanekal, manekal iya ka Manama,
ne emun ke egpabayungey man‑e, hentew naa ka egpakabayung kandin?
20 Su minsan ware sale ku, egparusaan e red iya man‑e te Manama tenged te impanlalag ku.
Minsan ware igkarew‑ey keddi, piru egpamalehetan te Manama ne nakasala a.
21 Minsan ware igkarew‑ey keddi, piru balahad e;
warad karuan te umul ku, wey neupul ad te egkeula-ula ku.
22 Nekeg-iling de iya ka langun.
Purisu egpakakahi a te ware tapid ne egdereetan te Manama,
matareng ma wey se makasesale.
23 Emun ke egkatigkew egpatey ka etew ne matareng, egngisi re iya ka Manama.
24 Imbalahad din de ka inged ne egharian te me makasesale;
imbunbunan din ka me mata te me talewukum sikan naa ka kene ne eleg ka peggukum dan.
Ke kene ne sikandin ka miggimu kayi, hentew naa?
25 “Meiyal ne nanlihad ka me aldew te umul ku wey meiyal pad seini du te me talagpallahuy.
Nanlihad seini ne ware keupianan.
26 Nanlihad ka me aldew ku iling te egtuwal ne gakit,
wey iling keiyal te banug ne egdagmang te egdawiyen.
27 Ne minsan pad ke kena ad e egsagsahukul,
wey egpeeneng-eneng ad ka eglungku,
wey eggihimun-gimun e naan de,
28 egkaaldek e red iya man‑e te me peg-antus ne egginguma keddi.
Su nakanengneng a nahud ne kene eg-isipen te Manama ne ware sale ku.
29 Nekey naan pad se karuan ke egpakannekal a ne egpangatarengan
te in-isip ad ma nikandin ne nakasale?
30 Minsan eglu‑luan ku ka intiru ne lawa ku te subla ne malinis ne weyig,† Te Hibruwanen: apiyew.
wey egsebunan ku ka belad ku,
kena ad e egmalinis,
31 su ig-antug e red iya nikandin diye te lungag ne basaken.
Ne minsan ka kumbale ku, egkalindit e keddiey iling te alukuy ne kene ne malehet.
32 Kene ne etew ka Manama iling keddi,
purisu kena a egpakaapul kandin diye te hukumanan.
33 Due ubag perem talagpataliware
ne eggusey kanami te daruwa.
34 Ne egpape-peenengen din e ka Manama ne eglampes
wey egginalat keddi,
35 su tenged te liyas ku te Manama, kene ku egkeyimu ne egpakig-apul kandin.”
*9:13 Kene ne seini ka malitan diye te Hiriku ne egpamelegye te lawa rin. Ngaran seini te salimbaweng ne egkabasa diye te Hub 26:12; Salmu 90:11; Isayas 51:9 wey migsimbulu seini te Malalab ne Dahat ne egkabasa diye te Isayas 30:7 wey Salmu 87:4.
†9:30 Te Hibruwanen: apiyew.