17
1 Ne migpabulus-bulus si Hub ka migkahi,
“Mahaan ad e egpatey,
su hendue te egkabigtawan ad e,
wey naandam e ka eglebengan keddi.
2 Inlilingutan a te me lemeten,
wey mata-mata kud iya kandan te eglelemet keddi.
3 “He Manama, pangabangi ad ubag
su warad iya lein ne egpakapangabang keddi,
ke kene, sikeykew re.
4 Insagpengan nu ka suman-suman* Te Hibruwanen: pusung. te me alukuy ku eyew kene sikandan egpakasabut.
Purisu kene nu sikandan tuhuti ne egpanalu.
5 Ka etew ne eg-akal te alukuy rin tenged te seleppi,
ka me anak din ka egkabaybayaran tenged te sika ne mareet ne hinimuwan din.
6 “Inggimu a te Manama ne kangisiyan te me etew,
wey in-iileban dan ka ulaula ku.
7 Kena ad e egpakameleg-meleg ka eglungku,
wey henduen naan de te alung kahase ka me belad wey me paa ku.
8 Ne ka me etew ne migsuman-suman ne matareng ka pegkeetew ran,
neinu-inu te pegkakita ran te neyitabu keddi,
wey in-isip a nikandan ne etew ne ware kun migpalintutuu te Manama.
9 Para kandan, ka me matareng malig‑en amana,
wey egkatimulan pad ka kalig‑en dan.
10 Piru egganggaten ku sikandan langun ne eg-abey eg-ugsi-ugsi keddi,
wey klaru iya ne ware egkakita ku ne matagseb kandan.
11 “Mahaan e egkataman ka peg-ugpe ku.
Nahuhus e ka me planu ku,
wey naawe e ka igkengeupii ku.
12 Piru migkahi sikandan te egmeupiya kun ded ka keugpe ku keureme
wey migkahi sikandan te,
‘Limang te marusilem, duen ded malayag.’
13 Ke egpallateng e ma, iyan ku naan de egpallatengen ne egpekeugpa a diye te inged te me minatey,† Te Hibruwanen: Siyul.
wey diya ad eggibat te inged ne marusilem.
14 Ne eg-isipen kud ne amey ku ka lebenganan
wey eg-isipen kud ne iney wey me atebey ku ka me iyas.
15 Hendeid naa ka egkapallateng ku?
Duen naa nakakita kayi?
16 Kene ku egkeuyan ka egkapallateng ku diye te inged te me minatey,
wey kene iya seini egpakatapik keddi diye te diralem te tane.”