18
Ka tabak ni Bildad
1 Ne migtabak si Bildad ne matig-Suwa,
2 “Hub, ken‑u ke naan pad egpeeneng-eneng ka eglalag?
Kema sum-sumana nu pa ka egpanlalahen nu su eyew egpakalalag key.
3 Mania te in-isip key nikeykew ne iling te baka?
Kahiyen nu buwa ne kene key egpakasabut?
4 Egdereetan nu re ka pegkeetew nu tenged te langet.
Kahiyen nu buwa ne egbalaharen te Manama ka inged tenged de keykew
wey ke egpangalinen din naa ka me batu puun te nenatahuan kayi?
5 “Ka malehet, klaru iya ne egpatey ka makasesale
iling te sulu ne egkeebukan
wey kenad e eglayag.
6 Egmarusilem e ka baley rin,
su neebukan man e ka sulu ne diye te dangdang din.* Te Hibruwanen: ampew rin.
7 Mapakeddel-keddel dengan sikandin piru kenad kuntee,
wey ka me tambag din te duma, iyan ded mismu egpakasaligkat kandin.
8 Sikandin ded mismu ka egpeendiye te paluwak, wey egsahad sikandin.
9 Ne egkeyiketan ka paa rin, wey kenad sikandin egpakaawe.
10 In-andaman sikandin te paluwak diye te egbayaan din,
wey imbunbunan seini te tane.
11 Nalingutan sikandin te igkaalati rin,
wey egpanlupuhen sikandin minsan hendei.
12 Inggutasan sikandin wey warad keseg din.
Kenad iya sikandin egpakapanalliya te me peg-antus.
13 Egkareetan ka laplap din te dalu ne egpakapatey,
wey egkengammewu e ka me belad wey me paa rin.
14 Ne egdeldelen sikandin puun te balungbalung ne igkasalig din,
wey eg-uyanen sikandin diye te makaliyas-liyas ne Hari.
15 Ne egsubalan e ka balungbalung din te minsan hentew,
ke egkeimpusan e seini te eg-empet te egtahu te asupri eyew egkaawe ka dalu dutu.
16 Egpekeiling sikandin te pinamula ne egkahangu se dalid,
wey egkalanes e se me sugpang.
17 Ne warad e egtanud-tanud kandin kayi te kalibutan,
wey warad iya minsan sabeka ne egpakasuman-suman te ngaran din.
18 Egdeldelen e sikandin puun te me etew ne neuyag
peendiye te inged te me minatey ne durusilemi.
19 Ne ware me anak din, wey ware iya nasame ne neuyag diye te baley ne in-ugpaan din.
20 Ne egkaalatan te egkatamanan din ka langun ne etew,
puun te igsile peendiye te iglineb.
21 Sika iya ka egpangkusan† Te Hibruwanen: ugpaan. te etew ne makasesale,
wey ware mig-ila te Manama.”