19
Ka tabak ni Hub ki Bildad
1 Ne migtabak e man‑e si Hub,
2 “Ken‑u naan pad egkataman ka pegbayad-bayad niyu keddi
te me masakit ne egpanlalahen niyu?
3 Kapapila ad e nikaniyu lelemeti,
wey ware kew neyilew ka egbayad-bayad keddi.
4 Panunggilingan ke nakasala a,
nekey naa degma se labet niyu?
5 Migsuman-suman kew ne matareng kew pad keddi,
wey in-isip niyu ne nabaybayaran a tenged te sale ku.
6 Piru keilangan ne egnengnengan niyu ne Manama ka miggimu kayi,
wey sikandin ka migsahilut keddi.
7 Tengteng kew ma, migpangananey a tenged te kabulut din piru warad iya migbulig keddi.
Migpepangabang a
piru warad iya migbehey keddi te eleg ne peggukum.
8 In-eletan te Manama ka dalan ne egbayaan ku eyew kena a egpakabaye
wey imbunbunan din seini te delem.
9 In-awe din ka kabantug ku,
wey impunggis din ka salakey ku.
10 Intabtabileng a nikandin te egbaras, wey hendue te egpatey ad
wey in-awe din ka egkapallateng ku iling te kayu ne inluwal.
11 Nangebel-ebel ka langet din keddi,
wey in-isip ad e nikandin ne kuntere din.
12 Egpekeiling te impalusuran a nikandin te me sundalu,
wey miggimu sikandan te dalan peendiye te keddi,
wey inlilingutan dan ka balungbalung ku.
13 “Ne impariyu din keddi ka me karumaan ku,
wey hendue te warad nekeila keddi ka me alukuy ku.
14 Inlilingawan ad e te me karumaan ku
wey me alukuy ku.
15 In-isip ad ne lapu ne ware neileyi te me mahaliyug
wey te me suluhuanen ku ne me malitan,
wey iling e te sikeddi ka lapu te pegpitew ran.
16 Ne emun ke egpangumew a te me suluhuanen ku, kena ad e nikandan egtetabaken,
wey minsan egpeyid‑u-hid‑u a kandan kena ad e nikandan eglinglingeen.
17 Ne igkangarehi e te asawa ku ka ku,
wey igkengalligsem ad e te me suled ku ne me lukes.
18 Ne minsan ka me bate, eglelemet e keddiey;
egngingisiyan ad e nikandan ke egkiteen a.
19 Igkengalligsem ad e te amana ku ne me alukuy dengan,
wey mig-inniyuhan ad e te nanggeyinawaan ku.
20 Gehasei e naan de iya
wey hendue te egpatey ad e.
21 “Me alukuy ku, keyid‑u kew ubag keddi,
su imbarasan* Te Hibruwanen: insamsam. a te Manama.
22 Mania te eg-iling kew te Manama ne egbayad-bayad keddi?
Kene naan pad ne eleg ka pegpaantus niyu keddi?† Te Hibruwanen: Ware kew bes pad neurali te sapu ku?
23 “Meupiya perem ke nakasulat ka me lalag ku wey eggimuwen ne libru,
24 wey ke nakakulit naa naay-ayari diye te batu,
eyew kenad egkaawe te ware egtamanan.
25 Piru nakanengneng a ne ware kamatayen te Talagpangabang keddi,
wey te katamanan, egginguma sikandin kayi te inged eyew te pegpangabang keddi.
26 Taheed te manekal e pad, egkakita ku iya ka Manama,
minsan egkamewu te dalu ka laplap ku.
27 Egkakita ku iya sikandin,
wey kene kud e eg-isipen sikandin ne lapu.
Amana ad iya egkeupian ne egpakakita kandin.
28 “Ne emun ke iyan niyud ugpe se egbayung keddi
ne mig-antus a tenged te me sale ku,
29 egkeyitabu iya kaniyu ka makaalat-halat ne legpad te Manama.
Eglegparan kew iya nikandin tenged te langet din,
wey egkanengnengan niyu ne inggukuman kew nikandin.”