31
Ka me pahunlibet ni Hub te ware iya sale din
1 Ne migpabulus-bulus si Hub ka migkahi,
“Nakasaad a te pegkeetew ku ne kena a egtengteng te me beyi-beyi,
ne egdumaan te ibeg te lawa.
2 Nekey buwad e ka eggimuwen keddi te Maresen ne Manama ne diye te langit;
nekey buwad e ka unag ku puun kandin?
3 Ka malehet, egpeuyanan din te karereetan
ka seeye se eggimu te mareet.
4 Nakita te Manama ka langun ne inggimu ku,
wey naseel rin ka langun ne sikal ku.
5 Egpahunlibet a
te ware iya sale ne neyimu ku
wey wara a migpanlimbung.
6 Ka Manama perem ka egbehey keddi te eleg ne peggukum
eyew egpakataha sikandin ke nakasale e naa.
7 Ke migsuwey e ma puun te eleg ne dalan
pinaahi te peggimu te mareet ne igkeupii ku tenged te nakita ku,
ke nekeyimu e ma te mareet purisu nalinditan ka pegkeetew ku,
8 na, egkareetan iya ka me pinamula ku
wey ke egkekeenen naa te lein ne me etew.
9 Ke mig-ealig e ma te asawa te sumbaley ku,
wey miggeles-heles a migtetahad diye te lihawangan te baley rin ke eglihawang ka sika ne malitan,
10 na, balahad en iya ke eggil-hilabetan ka asawa ku te lein ne lukes,
wey ke igduwey naa.
11 Mekeyilew-hilew ma nahud ka pegpanlibug,
wey ka eggimu te kene ne meupiya, eleg ne eglegparan te me talewukum pinaahi te kamatayen.
12 Ka pegpanlibug, egpekeiling te hapuy ne egpakasilab wey egpakapatey keddi
wey egpakarereet te langun ne naangken ku.
13 Ke due sabeka te me suluhuanen ku
ne egsagsahukul keddi,
egtahuren ku layun ka kandan ne katenged te peglelalag.
14 Ke kene ku sika eggimuwen, egmenuwen ku naa te eg-atubang ka Manama?
Nekey naa ka igpakalalag ku ke eggukuman a nikandin?
15 Kene bes ne ka Manama ne miggimu keddi,
ka miggimu degma te me suluhuanen ku?
16 “Wara ad iya migbalibad ka egbulig te egkengaayu-ayu,
wey ware kud iya awei te egkapallateng ka me balu,
17 wey wara a migtuhes-tuhes ka egkeen taheed te egmanggutasan ka me ilu.
18 Puun te pegkabatei ku,
migtanggu ad te me ilu,
wey ware ku sikandan balahara.
Te intiru ne umul ku,
ware ku balahara ka me balu.
19 “Ne emun ke egpakakita a te etew ne egkeilangan te kumbale,
piru ware igpakabeli,
20 egbehayan ku sikandin te kumbale ne inggimu puun mismu te bulbul te me karniru ku.
Ne egpasalamatan a nikandin.
21 Ne emun ke migpasakit a te sabeka ne ilu
tenged su nakanengneng a ne due egpangabang keddi
diye te hukumanan,
22 egkahepu perem ka belad ku
wey egkapupu puun te temuwanan te pamanayen ku.
23 Kena a iya egpekeyimu te iling due
tenged su egkaaldek a te legpad wey katenged te Manama.
24 Wara a migsalig te karatuan ku
wey ke migsuman-suman e naa ne egpakabehey sika keddi te keupianan.
25 Wara a migpeggasal te karatuan ku
wey te langun ne naangken ku.
26 Wara a migsimba te aldew
tenged te kalayag din
wey te bulan tenged te katelesan din.
27 Wara ad iya natintal
ne egsimba te aldew wey bulan te heles de,
wey wara ad iya mig-usengul eyew te pegtahud.
28 Ke neyimu ku ma sika se kene ne meupiya ne me himu,
eleg ne eglegparan a te me talewukum pinaahi te kamatayen,
su ka iling due ne himu, pegsupak te Manama.
29 Wara a miggale-gale tenged te karereetan
wey te me kalised ne nasalerepan te me kuntere ku.
30 Wara ad iya nakasale
pinaahi te pegdilus kandan.
31 Nakanengneng ka langun ne trabahanti ku
ne in-elit-elit ku ka langun ne mahaliyug ku.
32 Ware ku tuhuti ne diye de egmakalipereng te deralanen ka me mahaliyug ne egmanlihad,
ke kene, impaaran ku sikandan te baley ku.
33 Wara a migbubunbun te sale ku iling te inggimu te duma,
pinaahi te peggeles te himu ne kene ne meupiya diye te pusung ku.
34 Wara a naaldek ke nekey ka igpakalalag te me etew.
Wara a migpeeneng-eneng de wey ke miggeles naa tenged te kaaldek te me tampele dan.
35 Ke duen de perem egpammineg keddi.
Ne, andam a ne egpirma eyew te pegpamalehet ne malehet ka impanlalag ku.
Ke duen ma igpakabayung keddi te Maresen ne Manama,
eghangyuen ku sikandin ne igsulat din seini,
36 su igsampey ku seini te pamanayen ku
wey ke igbelebed ku naa seini te ulu ku isip kuruna
eyew egkamelmelehan te langun.
37 Igguhud ku te Manama ka langun ne neyimu ku;
egsasindeg a diye te tangkaan din iling te pangulu ne ware igkaaldek.
38 “Ke tinakew ku ka tane ne intrabahu ku
puun te malehet ne kamuney kayi—
39 ke migkeen a te uma te seini ne tane
piru impaantus ku te gutas ka migbasuk kayi—
40 iyan perem egpanubu kayi ka me duhi
wey ka me sagbet wey kene ka me trigu wey sibada.”
Kayi nataman ka me lalag ni Hub.