IGKALIMA NE BAAD: Ka me lalag ni Ilihu
32
(32:1–37:24)
Ka pegkalangeti ni Ilihu
1 Ne warad migtabak ka tatelu ne alukuy ni Hub, su impeuteng din ma iya ne ware sale ne neyimu rin. 2 Piru due etew ne egngaranan ki Ilihu ne ware iya mule nakatigkel te langet din tenged su ware ma iya mig-angken si Hub ne nakasale sikandin, wey nasi migsendit te Manama.
Anak si Ilihu ni Barakil ne kabuhalan ni Bus ne kabuhalan ni Ram. 3 Nalangetan man‑e sikandin te tatelu ne alukuy ni Hub, su warad ma sikandan nakatabak ki Hub, wey nekeiling e nasi te iyan e due sale te Manama. 4 Tenged te egkaari-hari si Ilihu, intaharan din pad ne egpekeimpus ka tatelu ne eglalag ne human pad sikandin migbunsud ka eglalag ki Hub. 5 Te pegkakita rin ne ware nakatabak ka tatelu ne alukuy ni Hub, amana sikandin nalangeti.
Ka an-anayan ne lalag ni Ilihu
6 Purisu migkahi si Ilihu,
“Bate-bate e pad, wey me buyag kew e,
purisu naaldek a ne eglalag kaniyu meyitenged te natuenan ku.
7 Kahiyen ku ne sikaniyu ka eleg ne eglalag
wey egpanulu te katagseb niyu
su me buyag kew man‑e wey masulug e mule ka natuenan niyu.
8 Piru ka malehet, iyan de egpakabehey te katagseb te etew
ka Panisingan te Maresen ne Magbebaye ne diye te kandin.
9 Kene ne kabuyahi ka egpuunan ne egmatagseb ka etew
wey ke egpakanengneng naa ke nekey ka eleg.
10 Purisu pammineg kew keddi su iglalag ku degma ka natuenan ku.
11 “Pammineg kew, mapariralemen a ka migpammineg taheed te miglelalag kew
wey migtetahad a kaniyu taheed te egsuman-suman kew te matagseb ne me lalag.
12 Mig-ayad-ayad ad iya migpammineg kaniyu
piru ware kew nakatabak te impanlalag ni Hub;
warad iya sabeka kaniyu ne nakapamalehet ne seyyup ka impanlalag din.
13 Egmenuwen niyu naa te egkahi ne matagseb kew?
Ka Manama re ka egpakatabak ki Hub; kene ne etew.
14 Kene ne sikeddi ka intandek ni Hub te impanlalag din,
purisu kene ku egtabaken sikandin iling te me tabak niyu kandin.”
Ka me lalag ni Ilihu ki Hub
15 Ne ingkahiyan ni Ilihu si Hub,
“Hub, warad nakatabak keykew ka tatelu ne alukuy nu
su warad ma duma ne igpakalalag dan keykew.
16 Keilangan naan pad man‑e ne egtetahad a
te namepeeneng man e sikandan ka migmanasindeg?
17 Due degma iglalag ku keykew;
iglalag ku degma ka nanengnengan ku.
18 Kena ad e egpakatigkel te eglalahen ku
su ka panisingan ne kayi te keddi ka egpalalag keddi.
19 Emun ke kena a egpakalalag
ne iyan kud e egkeilingan se egkabusaye ne laplap ne tahuanan
ne napenu-penu te iyam ne binu.
20 Keilangan ne eglalag a
eyew egkabewu-bewu a.
21 Ware eglapihan ku kaniyu
wey ke egdeyrayen naa ubag.
22 Kena a egkateu ne egdeyrey ubag;
egparusaan a perem te Manama ke eggimuwen ku sika.”