34
1 Ne migpabulus-bulus si Ilihu ka migkahi:
2 “Sikaniyu se migkahi ne me matagseb
wey masulug kun se natuenan,
pammineg kew ayad-ayad.
3 Egpakanengneng kew ne mananam ka egkakeen ke egpakaheram kew kayi.
Piru mania te kene kew egpakasabut ke egpakarineg kew te matagseb ne me lalag?
4 Keilangan ne eg-ileen ta mismu ke nekey ka eleg,
wey ka meupiya.
5 Su migkahi si Hub te,
‘Ware sale ku,
wey wara a behayi te Manama te eleg ne peggukum.
6 Ne minsan pad te pegkamatareng ku,
in-isip e pad iya man‑e nikandin ne ubaten.
Ne minsan wara a nakasale, impasalerep a nikandin te paddel ne kene egkeulian.’ ”
7 Ne migpabulus si Ilihu ka migkahi, “Nekey ne klasi te etew si Hub
se egpandali-di mule ne iling de kalemu te eg-inum te weyig?
8 Migduma-ruma sikandin te maddeet ne me etew,
wey mig-iling te maddeet ne hinimuwan te me makasesale.
9 Migkahi sikandin,
‘Ware meupiya ne egkakuwa te etew ke egpahaleen din ka Manama.’
10 “Purisu pammineg kew keddi
se me etew ne nenakasabut kun.
Kene eggimu te mareet ka Maresen ne Magbebaye.
11 ✡ Sal 62:12.Eg-unahan din ka etew sumale te hinimuwan din;
egsagsahipeen din ka etew sumale te pegbebatasan din.
12 Kene iya eggimu te mareet ka Maresen ne Magbebaye;
egbehayan din te eleg ne peggukum ka langun.
13 Kene ne etew ka migbehey te Manama te geem,
wey migsuhu kandin ne egmanduan din ka kalibutan.
14 Emun ke eggawien e te Manama ka umul te etew,
15 kasabeka re egpatey ka langun
wey egpakalibed e man‑e te tane.
16 “Pammineg ka te eglalahen ku, Hub, ke matagseb ka.
17 Ke egkeepes ka Manama te eleg ne peggukum, kene sikandin egpakamandu.
Eggukuman nu naa ka matareng wey Amana ne Maresen ne Magbebaye?
18 Ingkahiyan te Manama ka me Hari wey ka me pangulu,
‘Maddeet kew wey me ware karuan.’
19 Ware lapihi te Manama ka pangulu,
wey ware din amaneyi ka meyaman du te egkaayu-ayu,
su nekeg-iling man de sikandan ne inggimu rin.
20 Egkaayun ne egkatigkew sikandan egpatey te timpu te marusilem.
Egbarasan te Manama ka etew wey egpatey e;
malemu re amana kandin ka peggimatey minsan te due me katungdanan.
21 Eg-iipaten din ka langun ne eggimuwen te etew.
22 Ware delem ne egkeelesan te me makasesale
eyew kene sikandan egkakita te Manama.
23 Kenad ne keilangan ne egtahahe ka Manama te timpu
ne igpeumew rin ka etew diye te tangkaan din eyew eggukuman.
24 Kenad keilangan ne egpanginginse pad ka Manama
eyew egpangaween din ka me katungdanan te me pangulu
wey igpamehey rin diye te duma,
25 su nakanengneng ma sikandin te hinimuwan dan;
egpangaween din ka me katungdanan dan
wey egpandereetan din sikandan te timpu te marusilem.
26 Egparusaan te Manama ka me makasesale
ne egkakita te langun ne etew.
27 Inggimu rin sika su warad ma sikandan mig-ikul kandin
wey imbalahad dan e ka me suhu din.
28 Impandeeg-deeg dan ka egkengaayu-ayu
wey nenapehes ne egpangananey diye te Manama,
wey indineg te Manama ka pegpangananey ran.
29 “Ne emun ke egpeeneng-eneng de ka Manama,
ware egpakakahi te kene ne meupiya ka inggimu rin.
Ne emun ke eggeles man‑e sikandin, ware egpakakita kandin.
Piru ka malehet, imbebantayan te Manama ka me nasud
30 eyew egkabalabahan din ka maddeet ne egpangulu
ne egmandeeg-deeg te me sakup dan.
31 “Ne Hub, mig-angken kad naa te me sale nu diye te Manama,
wey nakasaad kad ne kene kad e eggimu te sale?
32 Nakahangyu kad naa te Manama ne igpapitew rin keykew ka me sale nu,
wey nakasaad kad naa ne kene nud sika eg-abayan eggimuwa?
33 Tenged su kene ka eg-inniyug te sale,
kene ka egpakapallateng ne egtabaken din ka pegpangananey nu.
Sikeykew ka eleg ne egbuut kayi—kene ne sikeddi;
guhuri e naa ke nekey ka igpakalalag nu.
34 “Ka nakarineg keddi ne me masinabuten,
egpekeuyun iya,
wey egpakakahi degma ka me matagseb,
35 ‘Hub, ware ka nakataha te impanlalag nu wey me ware karuan due.’
36 Hub, eleg iya ne eg-el-elehan ka
tenged su ka pegpanabak nu egpekeiling ma te pegtabak-tabak te me makasesale.
37 Intimulan nu pad iya man‑e ka sale nu
pinaahi te pegsukul nu te Manama;
imbaley-baley nu sikandin
wey ware ka migpeeneng-eneng ka egpangasak.”