33
Ka pegginalig ni Ilihu ki Hub ne egpammineg kandin
1 Ne ingkahiyan ni Ilihu si Hub,
“Ne Hub, pammineg ke naa ayad-ayad te langun ne eglalahen ku.
2 Andam ad e ne eglalag te langun ne eglalahen ku.
3 Eglalag a ne egdumaan te katareng ne egpuun te pusung ku;
iglalag ku iya ke nekey ka nenanengnengan ku ne malehet.
4 Ka Panisingan te Maresen ne Manama ka miggimu keddi,
wey ka migbehey keddi te umul.
5 “Ne tabak ke naa keddi ke egpekeyimu ka;
andama nu ka me katarengan nu
wey tangke ka keddi.
6 Pammineg ka, nekeg-iling ki re diye te tangkaan te Manama;
nekeg-iling ki re ne inggimu puun te basak.
7 Purisu ware eleg ne igkaaldek nu keddi;
kene ku sikeykew egpehesen.”
Ka pgsubli ni Ilihu te me lalag ni Hub
8 Ne ingkahiyan ni Ilihu si Hub,
“Kayi pad te talinga ku ka langun ne impanlalag nu. Migkahi ka:
9 ‘Ware neyimu ku ne mareet wey wara a nakasale,
wey ware neyimu ku ne minsan nekey ne kene ne meupiya.
10 Piru keyey, migpamitew iya ka Manama te aliddanan
eyew egpaantusen a nikandin,
wey in-isip a nikandin ne kuntere din.
11 ✡ Hub 13:27.Inggiketan din te keddina ka me paa ku,
wey in-iipat din ka langun ne eggimuwen ku.’
12 “Piru pammineg ka, seyyup ka Hub te impanlalag nu;
eglalahan ku sikeykew
te maresen ka Manama du te etew.
13 Mania te migkahi ka te kene eglinglingeen te Manama
ka pegsagsahukul te me etew?
14 Masulug ne paahi ne migpakiglalag ka Manama te me etew,
piru ware dan seini nasabut.
15 Migpakiglalag ka Manama te me etew pinaahi te taheinep wey igmakita
te timpu te marusilem taheed te egmakaliplippereng sikandan.”
Ka pegpaney-paney te Manama te etew
16 “Ne egparinehen te Manama ka etew te iglalag din
wey egginaalreken din pinaahi te me paney-paney.
17 Eggimuwen seini te Manama
eyew egpakapeeneng-eneng ka etew te mareet ne hinimuwan din
wey te pegkaambuhen din.
18 Kene egkeupian ka Manama ne egkareetan sikandan;
egluwasen din sikandan puun te kamatayen.
19 Egdisiplineen din ka etew pinaahi te dalu
wey te ware pegpeeneng-eneng ne pegmemasakit te me tul‑an.
20 Purisu kenad sikandin egkeibeg ne egkeen,
minsan pad te egkakeen ne igkeupii rin.
21 Eggase e sikandin egpanaman
wey tul‑anen naan de iya;
22 kene egkaluhey ne egpatey e sikandin
wey eggendiyad te inged te me minatey.
23 Piru ke due sabeka ne panalihan ne egpuun te linibu ne panalihan,
sikandin ka egpataliware te etew wey te Manama,
wey egpasuman-suman te etew ke nekey ka eleg ne eggimuwen.
24 Ne tenged te egkeyimenawan te etew ka panalihan, egkahi sikandin diye te Manama,
‘Luwasa nu ka etew puun te kamatayen;
nakakita ad e te iglekat kandin.’
25 Ne egpakalibed e ka meupiya ne peglelawa te etew
iling te bate-bate pad sikandin,
wey egmanekal e man‑e.
26 Ne emun ke eg-ampu sikandin,
egtabaken e te Manama,
wey egdawaten sikandin te Manama duma te kahale,
wey igpalibed e man‑e te Manama ka meupiya ne peg-ugpe din.
27 Ne igpanugtul rin ka me sale din diye te me etew te egkahi,
‘Nakasala a;
nakasupak a ke nekey ka eleg,
piru wara a paruseyi te eleg perem keddi.
28 Inluwas a te Manama puun te kamatayen,
purisu manekal e pad kuntee.’
29 “Malehet iya, seini layun ka eggimuwen te Manama diye te etew;
30 egluwasen te Manama ka etew puun te kamatayen
wey egbehayan din te kahale.
31 “Purisu ayad-ayad ka pammineg Hub te iglalag ku;
peeneng-eneng ke re
wey kene ka salemak ka egtabak.
32 Piru ke due igpakalalag nu, lalag ka,
su egkeupian a ne egpakanengneng ke malehet naan iya ne ware sale nu.
33 Piru ke ware igpakalalag nu, peeneng-eneng ka,
wey pammineg ke re keddi,
su egpanuluen ku sikeykew eyew egmatagseb ka.”