36
Ka pegpabulus ni Ilihu te eglalag
1 Ne migpabulus-bulus si Ilihu ka migkahi ki Hub,
2 “Dagdahew re, su duen pad eglalahen ku lapig te Manama.
3 Dakel ka nanengnengan ku
wey eggamiten ku seini te pegpamalehet keykew
ne matareng iya ka Manama ne miggimu keddi.
4 Malehet ka langun ne eglalahen ku
su matagseb a amana se egpakiglalag keykew.
5 “Pammineg ka, Maresen amana ka Manama
piru kene sikandin egdeeg-deeg te minsan hentew
wey ware minsan nekey ne kene din egkasabut.
6 Kene din egtuhutan ne egkeuyag kayi te kalibutan ka me makasesale,
piru egbehayan din layun te eleg ne peggukum ka egkengaayu-ayu.
7 Egpangabangan din ka me matareng
wey egbantuhen din sikandan te ware egtamanan, iling te me Hari.
8 Piru ke mig-antus ka me etew iling te impangiketan te keddina se me paa,
9 impapitew naa kandan te Manama ka me sale wey ka pegkaambuhen dan.
10 Egparinehen sikandan te Manama te me paney-paney
eyew eg-inniyug sikandan te maddeet ne hinimuwan dan.
11 Ke egtuman sikandan te Manama wey egpamakey kandin,
egmatubungen din sikandan, wey egpakaangken te kahale te intiru ne umul ran.
12 Piru ke kene sikandan egtuman te Manama, egpatey sikandan;
egkengaawe sikandan ne ware hinanawan.
13 Ne ka me etew ne ware migpalintutuu te Manama,
egmanetahu te langet dan diye te pusung dan,
wey minsan pad egparusaan sikandan te Manama, kene sikandan egpangananey kandin.
14 Egpatey sikandan ne me bate-bate pad;
egkengataman ka umul ran diye te keyilawan.
15 Piru egpanuluen te Manama ka etew pinaahi te me keyirapan,
wey eggamiten din ka kalised eyew egkateu sikandan ne egpammineg kandin.
16 “Impariyu ka te Manama puun te karereetan,
wey imbehayan ka nikandin te kaligwangan wey ware igkasamuk nu;
innipenu din te mannanam ne egkengakeen ka lamisa nu.
17 Piru kuntee, nakaneem-neem ka te parusa ne eleg te me makasesale;
kene ka iya egpakaalihu te eleg ne peggukum.
18 Bantey ka ne kene ka egkewuluan te karatuan;
kene ka dawat te sagpeng te be‑be.
19 Kene egpakabulig keykew te miglised,
ka karatuan wey ka keseg nu.
20 Kene ka iman-iman ne eggingume e perem ka marusilem;
ka timpu ne egkareetan ka me nasud.
21 Bantey ka, kene ka himu te mareet
su impaantus ka eyew egpakapariyu ka te mareet ne himu.
22 “Sumsumana nu ke mamenu karesen ka Manama;
ware talagpanulu ne egpekeiling kandin.
23 Ware etew ne egpakapanulu te Manama te eleg ne eggimuwen din
wey ke egpakakahi naa te, ‘Mareet ka inggimu te Manama.’
24 Indeyrey te me etew ka Manama tenged te immangimu rin;
purisu keilangan degma ne egdeyrayen nu sikandin.
25 Nakita te langun ne me etew ka neneyimu rin
piru diye de sikandan te mariyu.
26 Malehet iya, amana ne mabantug ka Manama,
wey kene ta egkatirew ka pegkamaresen din,
wey kene ta egkaseel ka idad din.
27 Impeuwang din ka weyig puun te tane
wey inggimu rin seini ne uran,
28 wey imbusbus din seini puun te gapun
para te langun ne etew.
29 Ware sabeka ne nakanengneng ke immenu te Manama te eg-empet ka gapun,
wey ke immenu rin te egpaluluhung diye te langit ne in-ugpaan din.
30 Tengteng ka, impakikilatan din ka aw-awangan,
piru imbunbunan din mule te delem ka diralem te dahat.
31 Pinaahi te sika ne uran, impakeen din ka me etew
wey impamatubung din sikandan.
32 Eggangkenen din ka kilat pinaahi te me belad din,
wey egsuhuen din seini ne eggisuhaten ka impatandekan din.
33 Ka luhung, iyan palinneu ne due egginguma ne bagyu,
wey minsan ka me baka, nakanengneng kayi.