37
1 Ne tenged te sika ne bagyu,
amana ne manekal ka pegketu-ketu te pusung ku.
2 Pammineg kew te laheng te Manama
ne iling te luhung ne eglihawang te be‑be din.
3 Impaheteb din ka kilat
peendiye te langun ne pikungan te kalibutan.
4 Pegkeimpus te kilat, egkarineg e ka daheneg te laheng din
ne iyan ka makaalat-halat ne dahing te luhung
taheed te egpakikilaten din.
5 Kein-inuwan amana ka laheng te Manama ne egpekeiling te luhung;
egkeyimu rin ka derakel ne me kein-inuwan ne kene ta egkasabut.
6 Insuhu din ka uran ne memaangkag ne mallintek ne egngaranan te isnu ne egkengeulug kayi te tane
wey impamakeseg din ka uran,
7 eyew egpakapeeneng-eneng ka me etew te trabahu ran,
wey egpakapalemlem te himu rin.
8 Ne egmangelung degma ka me mahintalunan ne mananap,
diye te helesanan dan te timpu te bagyu.
9 Ne egpuun te igkakawanan ne balabahan ka balisusu,
wey egpuun te igkahibang ne balabahan ka kalamag ne amana ne maagsil.
10 Egmakehal ka weyig pinaahi te peggeheyinawa te Manama
wey egkeyimu e seini ne apiyew.
11 Inggipenu din te weyig ka me gapun,
wey puun te gapun, impaheteb din ka kilat diye te minsan hendei.
12 Ne miglingut-lingut de iya te intiru ne kalibutan ka gapun
eyew te pegtuman te suhu te Manama.
13 Egpeuranan te Manama ka tane
eyew te pegdusa te me etew,
wey ke pegpapitew naa te geyinawa rin ne kene egkabalbalawan.
14 “Ne Hub, pammineg ka kayi;
peeneng-eneng ka wey palemlema nu ka me kein-inuwan ne inggimu te Manama.
15 Nakanengneng ke naa ke immenu te Manama te egsuhu ka me gapun,
wey ke immenu rin te egpakikilat?
16 Nakanengneng ke naa ke immenu te eg-antew te gapun diye te aw-awangan?
Himu sika te kein-inuwan ne Manama ne dakel se katuenan.
17 Kene ka egpakatirew kayi, Hub;
eg-antus ke re tenged te ware kalamag ne maagsil, ke kene, iyan de ka meinit ne kalamag
ne egpuun te igkakawanan ne balabahan.
18 Egpakabulig ke naa te Manama te pegbelat te langit,
wey egpamakehal kayi iling te burunsi ne impasilak?
19 Ne kun panulua key te iglalag ney te Manama;
ware key nahud nakanengneng ke egmenuwen ney te egpangatarengan
su migmarusilem ka suman-suman ney.
20 Kena a eghangyu te Manama
ne egpakig-apul a kandin
su kema ke eggimatayan a nikandin.
21 Ke eglayap te kalamag ka gapun,
ware etew ne egpakatengteng te aldew diye te aw-awangan,
su amana ma seini ne masil‑ew.
22 Ne puun te igkahibang ne balabahan,
eglepew ka Manama ne egsil‑ew iling te bulawan
wey makaaldek-haldek amana ka kalayag din.
23 Maresen amana ka Manama,
purisu kene ki egpakarani-rani kandin.
Matareng sikandin, wey kene egdeeg-deeg.
24 Purisu egtahuren sikandin te me etew.
Ne kene din eglinglingeen ka langun ne egsuman-suman te pegkeetew ran ne me matagseb kun.”