Ka guhuren meyitenged ki
Hunas
Igpewun‑a
Ka seini ne baseen, migpangguhud meyitenged te sabeka ne prupita ne egngaranan ki Hunas. Diye sikandin mig-ugpe te Israil te igkahibang ne balabahan, me 250 ne leg‑un ka miglihad te nekeimpus e si Dabid ka mighari. Ka seini ne baseen, kene ne iling te duma ne me guhuren meyitenged te pegpanagne, su migpanengneng seini meyitenged te neula-ula te sabeka ne prupita ne ware migtuman te insuhu te Manama kandin ne egpeendiyeen te siyudad te Ninibi. Ware sikandin migtuman te insuhu kandin su nakataha sikandin ne kene egbulusan te Manama te eglegpad ka seeye ne siyudad ke eg-inniyug ka me etew te me sale dan. Piru tenged te kein-inuwan ne natamanan din, napehes sikandin ne miggendiye te Ninibi wey migpangguhud te igpahuhud kandin te Manama. Nataman, neenenduenan sikandin wey nasakitan puun su ware iya natuman ka ingkahi rin diye te me etew ne eglegparan te Manama ka inged dan.
Nahuhud degma te seini ne baseen ne egpalintutuu te Manama ka langun ne inggimu rin iling te weyig, ngalap, kalamag wey duma pad. Piru labew te langun, nahuhud kayi ne hiid‑uwen ka Manama wey dakel ka geyinawa rin, su minsan ka kuntere te keet-etawan din, impasaylu rin wey inluwas din te mig-inniyug e sikandan te me sale dan.
Ka nenasulat te seini ne baseen
Ka pegsupak ni Hunas te suhu te Manama 1:1-17
Ka peg-ampu ni Hunas 2:1-10
Ka peggendiye ni Hunas te Ninibi 3:1-10
Ka langet ni Hunas te pegkeyid‑u te Manama te matig-Ninibi 4:1-11
1
Ka pegsupak ni Hunas te suhu te Manama
1 ✡ 2Har 14:25.Due etew ne egngaranan ki Hunas ne anak ni Amitay. Sabeka ne aldew impanengneng sikandin te Magbebaye ne Manama, 2 “Dagdahew ka hendiye te Ninibi, ka dakel ne siyudad wey panpanayi nu ka me mahinged diye su nakamaan-maan ad e te mareet ne hinimuwan dan.” 3 Piru nekeisip mule si Hunas ne egpallahuy diye te Tarsis* Ka Tarsis nekegdiyu te Ninibi. eyew egpakapariyu te Magbebaye ne Manama. Puun due, migtupang sikandin peendiye te Hupa wey due barku ne nakita rin diye ne eggendiye te Tarsis. Migbayad sikandin te pliti rin wey mig-untud e eyew egpakariyu-diyu te Magbebaye ne Manama.
4 Piru te nalanting e ka barku, migpeuyan ka Magbebaye ne Manama te makeseg ne kalamag diye te dahat. Ne migderakel e amana ka me bunlud wey hendue te egkahuhus e ka barku ne mig-unturan dan. 5 Nenaaldek ka langun ne me trabahanti te barku wey migpangananey ka tagse sabeka te me manama ran. Impandegpak dan diye te dahat ka impandulan te barku eyew egmaagkap naan de. Piru si Hunas, diye mule te kinariraleman te barku wey nakaliplipereng sikandin diye.
6 Ne dutu, miggendiyaan sikandin te kepitan te barku wey migkahiyan, “Hey, mania te migliplipereng ke re due? Enew ka wey pangananey ka te manama nu. Kema ke egkeyid‑u red sikandin kanta wey egpangabangan ki nikandin eyew kene ki egkengalened.”
7 Ne dutu, migpalalahey ka me trabahanti ne migkahi, “Kema, egpintut-pintut ki eyew egkanengnengan ta ke hentew ka egpuunan te karereetan ne migginguma kanta.” Ne migpintut-pintut en iya sikandan wey si Hunas ka natinuru. 8 Ne migkahi sikandan, “Nangeni key ke mania te miggingumaan ki te karereetan kuntee. Nekey‑a ka trabahu nu, wey hendei ka egpuun? Hendei ka mig-ugpe wey nekey‑a ka tribu nu?”
9 Ne migtabak si Hunas, “Sabeka a ne Hibruwanen wey ka impalintutuuwan ku ne Magbebaye, sika se Manama ne diye te langit ne miggimu te dahat wey tane.” 10 Ne mignangenan e sikandan ni Hunas te migpallahuy sikandin te Magbebaye ne Manama.
Puun due, naaldek amana ka me trabahanti te barku wey migkahiyan dan sikandin, “Keyey, makaaldek-haldek amana seini se inggimu nu.”
11 Ne dutu egkalihet e degma egmakeseg ne subla ka kalamag wey ka me bunlud, purisu mig-insaan dan e si Hunas, “Egmenuwen ney buwa sikeykew eyew egpeeneng-eneng e ka dahat ne egdaldaleet?”
12 Ne migtabak si Hunas, “Iantug e re nikaniyu te dahat eyew egpeeneng-eneng e ka kalamag wey ka me bunlud su nakanengneng a te sikeddiey ka egpuunan kayi.”
13 Piru migpakannekal migpamegsey ka me trabahanti su eyew egpakatuhun perem ka barku diye te ilis. Piru ware neyimu ran su nanasnasian pad ne migmakeseg ka kalamag. 14 Purisu migpangananey sikandan te Magbebaye ne Manama ne migkahi, “E Magbebaye, egpeyid‑u-hid‑u key keykew ne kene key gulaa tenged su eggimatayan ney ka seini ne etew. Kene key senditi ke ware sale te etew ne eggimatayan ney, su seini se neyitabu keykew ma ne igkeupii Magbebaye ne Manama.” 15 Ne innenat dan e si Hunas wey in-antug dan e diye te dahat. Ne sahuhune ne migpeeneng-eneng ka makeseg ne kalamag wey ka me bunlud. 16 Puun dutu, amane e egkaaldek te Magbebaye ne Manama ka me etew, wey migbehey sikandan te igpanubad dan te Magbebaye ne Manama wey migsaad ne egpamakey kandin.
17 ✡ Mat 12:40.Ne migsuhu ka Magbebaye ne Manama te dakel ne isda ne egparawiyen ki Hunas. In-abeleng te isda si Hunas, wey tatelu ne aldew wey marusilem sikandin diye te getek te isda.