Ubadiya
Igpewun‑a
Ka tahu te insulat ni prupita Ubadiya, iyan ka peggukum te Magbebaye ne Manama, wey peglegpad din te inged ne Idum. Ka matig-Idum me kabuhalan ni Isaw. Si Isaw seping ni Hakub ne kaap-apuan te me Israilita. Piru egpegkuntereey sikandan se daruwa. Seeye naa, te nalundus e te me sundalu te Babilunya ka Hirusalim te lalimma ne gatus wey walu ne pulu wey hen‑em (586) ne leg‑un te ware pad neetew si Kristu, amana nahale-gale ka matig-Idum wey kene ne sikan de, inleig-leig dan pad iya man‑e sikandan, wey imparakep dan sikandan wey impeuyan diye te Babilunya. Purisu migkahi ka Magbebaye ne Manama ne egkalundus ded degma ka migharian te inged ne Idum wey egpamatey red degma ka me sundalu ran. Ware iya egkasame kandan, piru egkabaluy red mule seeye se nenasame ne me matig-Israil wey egmangugpe e te tane dan.
Ka nenasulat te seini ne baseen
Ka peglegpad te inged ne Idum 1-14
Ka aldew te Magbebaye ne Manama 15-21
1
1 Seini ka impakita te Magbebaye ne Manama ki Ubadiya meyitenged te inged ne Idum,* Idum ka in-imu ni Isaw wey inged ne Idum ka ingngaran te inged ne mig-ugpaan te kabuhalan din. wey impahuhud din kandin seini.
Ka peglegpad te inged ne Idum
Narineg ta ka lalag ne migpuun te Magbebaye,
wey migpeuyan sikandin te talagpangguhud diye te me nasud te pegkahi,
“Sasindeg kew! Egpakigkuntere ki te me matig-Idum!”
2 Ne migkahiyan te Magbebaye ne Manama ka me matig-Idum,
“Pitew kew! Eggimuwen ku sikaniyu ne mahuye du te duma ne me nasud,
wey eg-ang-anggaan kew amana nikandan.
3 In-ubatan kew te hambug niyu,
nangugpe kew te siyudad ne nalingutan te maresen ne batu ne sumalem,
wey matikang ka ugpaan niyu diye te kabubunganan.
Sikan naa ka migkahi kew te suman-suman niyu,
‘Hentew‑a ka egpekewunnun kanami diye te diralem?’
4 Minsan pad ke titikangi ka peglayang niyu iling te banug,
wey minsan pad ke diye kew egsesalag te elat-elat te me bituen,
eg-uluhen ku red iya sikaniyu.”
5 “Ke egpanakawan kew te me takawen te marusilem,
iyan dan de egpanakawen ka igkeupii ran.
Ka egmamupu te behas te paras,
duen ded mule behas ne igsame dan te egkaayu-ayu.
Piru ka me kuntere niyu,
warad iya egsameen minsan deisek.
6 Egpamitawen dan ka me karatuan niyu
wey egpanakawan dan iya ka me kabuhalan ni Isaw.
7 Eg-akalan kew te langun ne miglapig kaniyu,
wey egdeldelen kew nikandan puun te tane niyu.
Ne eg-akalan kew te me etew ne migpangabang dengan kaniyu.
Egsahiluten kew e te me alukuy niyu ne miglagpu kaniyu te egkeen,
piru kene kew egpakanengneng te eggimuwen dan.”
8 Migkahi ka Magbebaye ne Manama,
“Egginguma ka aldew ne egparusaan ku ka inged ne Idum;
egguleen ku ka me matagseb ne etew diye te bubungan ni Isaw† Iyan igpasabut te bubungan ni Isaw ka inged ne Idum ne ugpaan te me kabuhalan din.
wey eg-aween ku ka langun ne katuenan dan.
9 He Timan, nenaaldek ka me bahani nu,
wey egpangimatayan ka langun ne sundalu nu diye te bubungan ni Isaw.”
Ka sale te matig-Idum
10 “Tenged te mareet ne inggimu nu diye te suled nu ne si Hakub,
egkeyilawan ka wey egkareetan te ware egtamanan.
11 Migtetengteng ke re diye te mariyu
te timpu ne egseled ka me kuntere dan ne egpanguwa te me karatuan dan.
Nekeiling ke red te seeye se me lapu
ne migpanguwa te me karatuan te Hirusalim wey imbaad-baad dan e.
12 Kene ne eleg ne igkahale nu
ka mareet ne neyingumaan te suled nu ne si Hakub.
Ne kene ne eleg ne igkahale nu
ka karereetan ne nabayaan te me matig-Huda
wey kene ne eleg ne egngisiyan nu sikandan
te timpu te pegpalumbibigtew ran.
13 Kene ne eleg ne egseled ka te siyudad te keet-etawan ku
eyew te peggale-gale te karereetan ne neumaan dan.
Kene ne eleg ne egpanakew ka te karatuan dan
te timpu te karereetan dan.
14 ✡ Isa 34:5-17; 63:1-6; Hir 49:7-22; Isi 25:12-14; 35:1-15; Amu 1:11-12; Mal 1:2-5.Kene ne eleg ka pegpangimatey nu diye te bebalakan te dalan,
te seeye se egpuun te Hirusalim ne eg-eleg-eleg eglenus.
Kene ne eleg ka pegpandulung nu kandan diye te me kuntere dan
te timpu te pegkalaggew ran.”
Ka peglegpad te me nasud
15 “Mahaan e ka aldew,
ne sikeddi se Magbebaye ne Manama,
eglegpad te langun ne nasud.
Ke nekey ka neyimu nu,
egkeyimu red degma diye te keykew.
Ne ke nekey ka himu nu,
iyan nu red degma egkarawat.
16 Mig-inum ka keet-etawan ku
te sabeka ne ubab te mapeit ne legpad
diye te matulus ne bubungan ku.
Piru subla pad ne mapeit ne legpad
ka eg-inumen te langun ne nakalingut ne me nasud.
Egkengaalamlam sikandan ne eg-iinum
wey egkengaawe e sikandan.”
Ka pegpanalu te keet-etawan te Israil
17 “Piru due egpakapallahuy diye te Bubungan ne Siyun‡ Sakup te Hirusalim ka Bubungan ne Siyun.
wey egkeyimu e man‑e seini ne matulus ne inged.
Ne egkaawi te kabuhalan ni Hakub
ka tane ne kandan iya.
18 Egkeyimu ne hapuy ka kabuhalan ni Hakub.
Ne egpekeiling te legleg ka kabuhalan ni Husi.
Ne ka me kabuhalan ni Isaw, egpekeiling te lahami.
Egkatutung wey egkeet-et ka lahami, wey warad iya egkasame minsan sabeka.
Sikeddiey ka Magbebaye ne Manama ka migkahi kayi.
19 “Egsubalan te keet-etawan te Nigib ka bubungan ni Isaw.
Ne ka tane te me Pilistihanen, egkaangken te keet-etawan ne diye nangugpe te lenlen te me bubungan te Huda.§ Te Hibruwanen: Sipila.
Egsubalan te keet-etawan te Israil ka tane te Ipraim wey te Samarya,
wey egkaangken te kabuhalan ni Binhamin ka Gilyad.
20 Egmanguli ka me sundalu ne naddakep puun te igkahibang ne balabahan te igsile te Israil,
wey egkaangken dan ka tane te me Kanaanen taman te igkahibang ne balabahan te Saripat.
Ne ka me siyudad te Nigib,
egkaangken te naddakep ne matig-Hirusalim ne in-uyan diye te Siparad.
21 Egpanakereg te Bubungan ne Siyun ka nenakapallahuy
eyew egmanduan dan ka bubungan ni Isaw.
Ne iyan e eghari ka Magbebaye ne Manama.”
*1:1 Idum ka in-imu ni Isaw wey inged ne Idum ka ingngaran te inged ne mig-ugpaan te kabuhalan din.
†1:8 Iyan igpasabut te bubungan ni Isaw ka inged ne Idum ne ugpaan te me kabuhalan din.
✡1:14 Isa 34:5-17; 63:1-6; Hir 49:7-22; Isi 25:12-14; 35:1-15; Amu 1:11-12; Mal 1:2-5.
‡1:17 Sakup te Hirusalim ka Bubungan ne Siyun.
§1:19 Te Hibruwanen: Sipila.