5
1 Narineg te langun ne Hari te Amurihanen ne diye te iglineb te Weyig ne Hurdan, wey te langun ne Hari te Kanaanen ne diye te ilis te Dahat ne Miditiranyu, te impeetiyan te Magbebaye ne Manama ka Hurdan te peglapas te me kabuhalan ni Israil. Seeye naa ka naaldek sikandan wey warad kabulut dan ne egkuntere te me kabuhalan ni Israil.
Ka pegtuli wey ka sahakeen diye te Gilgal
2 Ne ingkahiyan te Magbebaye ne Manama si Huswi, “Himu ka te ilab puun te sumalem ne batu wey tulii nud man‑e ka me kabuhalan ni Israil ne ware pad natulii.” 3 Sikan naa ka miggimu si Huswi te ilab wey intulian din ka me kabuhalan ni Israil diye te Gibiyat-Haaralut.* Te Hibruwanen: Ka Gibiyat-Haaralut iyan igpasabut ka “bubungan ne tulianan.” 4-6 ✡ Num 14:28-35.Seini ka egpuunan mania te inggimu rin sika. Te peg-awe dan diye te Ihiptu, natulian e ka langun ne me kabuhalan ni Israil. Piru ware pad natulii ka neneetew te timpu te sasangan sikandan ne eggipanew diye te disirtu te hep‑at ne pulu (40) ne leg‑un. Te seeye ne timpu, nammatey e ka me lukes ne eleg e ne egpakiggira su ware dan ma tumana ka suhu te Magbebaye ne Manama. Ingkahiyan sikandan te Magbebaye ne Manama ne kene dan e egkakita ka meupiya ne tane wey dakel se eg-uma† Te Hibruwanen: tane ne egtulayasan te gatas wey teneb. ne insaad din ne igbehey kandan. 7 Ne ka me anak dan ne migsubal kandan, intulian ni Huswi su ware ma natulii sikandan te timpu te sasangan pad sikandan ka eggipanew.
8 Te natulian e ka langun, migpalunggaat pad sikandan diye te kampu ran taman te neulian e ka me pali dan. 9 Ne ingkahiyan te Magbebaye ne Manama si Huswi, “Kuntee ne aldew in-awe ku ka keyilew niyu puun te pegkeuripen niyu te Ihiptu.” Sikan naa ka minsan kuntee, ingngaranan te Gilgal‡ Ka ngaran ne Gilgal egpekeg-iling te Hibruwanen ne lalag ne “in-awe”. ka seeye ne inged.
10 ✡ Iks 12:1-13.Taheed te nangekampu pad ka me kabuhalan ni Israil diye te Gilgal ne diye te napu te Hiriku, migsahakeen sikandan te Peglihad te Panalihan te Manama te igkasapulu wey hep‑at (14) ne aldew te an-anayan ne bulan. 11 Te seup ne aldew, migkeen sikandan te egkakeen ne in-uma te seeye ne inged: sinandag ne keenen wey paan ne ware patulin. 12 ✡ Iks 16:35.Puun te seeye ne timpu, mig-engked e ka peg-uran te mana, wey warad nakakuwa kayi ka me kabuhalan ni Israil. Puun te seeye ne leg‑un, iyan dan e egkeenen ka eg-uma te tane te Kanaan.
Si Huswi wey ka etew ne due kampilan
13 Taheed te diye si Huswi te marani te Hiriku, due nakita rin ne etew ne migsasindeg diye te tangkaan din ne miggen-gen te kampilan. Mig-insaan sikandin ni Huswi, “Sundalu ney sikeykew wey ke kuntere ney naa?”
14 Ne migtabak ka etew, “Kena a ne sundalu niyu wey ke kuntere naa. Sikeddi ka pangulu te me sundalu te Magbebaye ne Manama.”
Ne miglangkeb si Huswi eyew egsimba kandin wey mig-insaan din, “Ahalen, nekey ka igkeupii nu ne eggimuwen ku te suluhuanen nu?”
15 Ne migtabak ka pangulu te me sundalu te Magbebaye ne Manama, “Luunga nu ka sandal nu su matulus ka inged ne migsasindehan nu.” Ne intuman ni Huswi ka impeyimu kandin.