1 Ne migmanguleyi wey migpandalawit ka langun ne kabuhalan ni Israil te seeye ne karusileman tenged te kalaggew. 2 Ne migsagsahukul sikandan ki Muwisis wey ki Aarun te migkahi, “Meupiya pad perem ke migpatey key e diye te Ihiptu wey ke kayi naa te disirtu! 3 Mania te eg-uyanen key pad te Magbebaye te seeye ne tane eyew re egpatey te gira wey egpandakepen ka asawa ney wey me anak ney ne dereisek pad? Meupiya pad mule ke eglibed key e diye te Ihiptu.” 4 Ne migmalalahey sikandan ne migkahi, “Eg-alam ki te egpangulu kanta wey eglibed kid diye te Ihiptu.”

5 Ne miglangkeb ensi Muwisis wey si Aarun diye te tangkaan te langun ne kabuhalan ni Israil ne migmanlibulung. 6 Ne inggisi ni Huswi ne anak ni Nun wey ni Kalib ne anak ni Hipuni ka me kumbale dan tenged te kalaggew. Sikandan se daruwa ka migduma te peg-iipat. 7 Ne ingkahiyan dan ka langun ne kabuhalan ni Israil ne migmanlibulung, “Meupiya ma amana ka tane ne inleuy wey in-iipatan ney. 8 Ke nahale ka Magbebaye kanta, eg-uyanen ki nikandin diye te sika ne tane ne dakel se eg-uma* Te Hibruwanen: tane ne egtulayasan te gatas wey teneb. wey igbehey rin sika kanta. 9 Kene kew re sukul te Magbebaye. Ne kene kew kaaldek te me etew diye su egkatalu ta iya sikandan. Ware egpakabulig kandan, piru egbulihan ki mule te Magbebaye. Purisu kene kew kaaldek kandan.” 10 Piru egkeupian nasi ka me kabuhalan ni Israil ne egbebatuwen dan ensi Muwisis wey si Aarun. Ne sahuhune ne migpapitew te me kabuhalan ni Israil ka katelesan te Magbebaye diye te Balungbalung ne Temuwanan.

11 Ne ingkahiyan te Magbebaye si Muwisis, “Ken‑u bes naa mule egkataman ka pegsamsamili keddi te me kabuhalan ni Israil? Kene buwa iya mule sikandan egpalintutuu keddi minsan pad te langun ne kein-inuwan ne inggimu ku diye te kandan? 12 Egpeuyanan ku te karereetan ka me kabuhalan ni Israil wey egpangimatayan ku sikandan. Piru eggimuwen ku sikeykew ne dakel ne nasud ne madmaresen pad kandan.”

13 Piru ingkahiyan ni Muwisis ka Magbebaye, “Ne nekey naan e ka igpakalalag te me Ihiptuhanen ke egkanengnengan dan seini? Nakanengneng sikandan ne impalihawang nu ka me kabuhalan ni Israil puun te Ihiptu, pinaahi te geem nu. 14 Ne emun ke egdereetan nu ka keet-etawan nu, egguhuran te me Ihiptuhanen ka me Kanaanen. Ne nakanengneng e ka me Kanaanen ne keet-etawan key nikeykew, wey migpapitew ka kanami. Ne nakanengneng sikandan ke immenu key nikeykew te egduma pinaahi te gapun ne egpekeiling te sungkaleg te timpu te maaldew, wey te hapuy ne egpekeiling te sungkaleg te timpu te marusilem. 15 Ne kuntee, emun ke egpangimatayan nu ka keet-etawan nu, egpakakahi ka me nasud ne nakataha te kabantug nu, 16 ‘Tenged te kene egkeyimu te Magbebaye ka peg-uyan te seini se keet-etawan diye te tane ne insaad din, sikan naa ka impangimatayan din e sikandan diye te disirtu.’ 17 Purisu kuntee, Magbebaye, ipapitew nu ka geem nu sumale te insaad nu ne miggenendue, 18 ‘Kena a mahaan egkabelu wey dakel se geyinawa ku ne kene egkabalbalawan; mapasayluwen a te me sale te me etew. Piru egdusaan ku ka nenakasale taman te igkatelu wey igkeep‑at ne kabuhalan.’ 19 Ne sumale te karakel te geyinawa nu ne kene egkabalbalawan, migpeyid‑u-hid‑u a keykew ne egpasayluwen nu seini se keet-etawan, iling te pegpasaylu nu kandan puun te peglihawang dan te Ihiptu.”

20 Ne migtabak ka Magbebaye, “Egpasayluwen ku sikandan sumale te inhangyu nu. 21 Piru tenged te neuyag e ma se Magbebaye, wey tenged te nekeempet ka katelesan ku te kalibutan, 22 igsaad ku ne ware minsan sabeka kandan ne egpekeendiye te tane ne insaad ku te me kaap-apuan dan. Su minsan nakita ran e ka karesen ku wey ka me kein-inuwan ne inggimu ku diye te Ihiptu wey diye te disirtu, layun e red iya man‑e nikandan el-elehi wey wara a nikandan palintutuuwi. 23 Kene sikandan egpekeendiye te tane ne insaad ku te me kabuybuyahan dan. Ware minsan sabeka te migsamsamili keddi ne egpakaseled te seeye ne tane. 24  ✡ Huswi 14:9-12.Piru ka suluhuanen ku ne si Kalib, egpaseleren ku mule te tane ne inleuy rin su kene ma mule sikandin ne iling te duma, wey mapahetpet mule ka pegpalintutuu rin keddi. Ne diyad e egmangugpe ka me kabuhalan din. 25 Ne kene kew pa leus su duen pad me Amalikanen wey me Kanaanen ne nangugpe diye te me napu. Ne libed kew naan pa kaaselem diye te disirtu, wey ikul kew te dalan ne migpabulus diye te Malalab ne Dahat.”

26 Ne ingkahiyan e man‑e te Magbebaye ne Manama si Muwisis wey si Aarun, 27 “Ken‑u bes naa mule egpeeneng-eneng seini se me etew ne maddeet se hinimuwan? Narineg ku ka me pegsagsahukul ran keddi. 28 Purisu kahii nu sikandan te migkahi a se neuyag ne Magbebaye, ‘Eggimuwen ku iya due te kaniyu ka ingkahi niyu. 29 Egpatey kew kayi te disirtu su migsagsahukul kew ma keddi; ware minsan sabeka kaniyu ne puun te daruwa ne pulu (20) se idad wey buyag-buyag ne egpakaseled te seeye ne tane ne insaad ku, 30 angin e mule ki Kalib ne anak ni Hipuni, wey ki Huswi ne anak ni Nun. 31 Ne ka ingkahi niyu ne egpandakepen ne dereisek pad ne me anak niyu, egpanguyanen ku mule diye te seeye ne tane ne insamsamilian niyu. Ne egkaangken dan e mule seini. 32 Piru egpatey kew re mule kayi te disirtu. 33 Ne ka me anak niyu egkengeyimu ne talagbantey te me karniru kayi te disirtu taman te hep‑at ne pulu (40) ne leg‑un. Ne eg-antus sikandan taman te egpatey kew langun su ware kew ma migmatinumanen keddi. 34 Ne iling ne hep‑at ne pulu (40) ne aldew ka peg-iipat niyu diye te seeye ne tane, eg-antus kew degma taman te hep‑at ne pulu (40) ne leg‑un tenged te me sale niyu—tigsabeka ne leg‑un ka tagse aldew. Ne egkanengnengan niyu ke mamenu ka langet ku te langun ne egsukul keddi. 35 Sikeddi ka Magbebaye ne Manama ka miglalag kayi. Ne eggimuwen ku iya seini kayi te maddeet ne me etew ne nasabeka ka egsukul keddi. Egpatey iya sikandan langun kayi te disirtu.’ ”

36 Ne ka sapulu ne etew te insuhu ni Muwisis te peg-iipat diye te tane te Kanaan, migmanlibed ne nanguyan te ubat ne guhuren ne iyan egpuunan ne migsagsahukul ka me kabuhalan ni Israil diye te Magbebaye. 37 Ka seeye ne me etew ne mig-uyan te ubat ne guhuren, migpatey diye te tangkaan te Magbebaye tenged te dalu. 38 Te sapulu wey daruwa (12) ne etew ka nangiipat te tane, si Huswi re ne anak ni Nun, wey si Kalib ne anak ni Hipuni ka ware migpatey.

39 Te impangguhuran e ni Muwisis ka me kabuhalan ni Israil te ingkahi te Magbebaye, miglungku e amana sikandan. 40 Ne migselem-selem sikandan nangenew te seup ne aldew, wey migpanakereg e diye te bubungan. Ne migkahi sikandan, “Seini key e, wey andam key e ne eggendiye te tane ne insaad te Magbebaye. Eg-angkenen ney ne nakasale key.”

41 Piru migtabak si Muwisis, “Piru mania te egsupaken niyud e man‑e ka suhu te Magbebaye ne egpaliberen kew pad nikandin diye te inged ne ware mig-ugpe? Kene kew iya eglampus! 42 Kene kew pabulus ka eglusud su kene kew egdumaan te Magbebaye wey egkatalu kew iya te me kuntere niyu. 43 Ke egsukulan kew te me Kanaanen wey me Amalikanen, egkahule kew iya; kene kew egdumaan te Magbebaye su insupak niyu ma sikandin.”

44 Piru migpaalag-alag iya sikandan miglusud diye te me bubungan te Kanaan minsan ware migduma si Muwisis wey ware dan uyana ka Tahuanan te Kasabutan. 45 Ne migtupang ka me Amalikanen wey me Kanaanen ne mig-ugpe diye te me bubungan ka egsukul, wey natalu iya ka me kabuhalan ni Israil wey impanlupug taman te Hurma.