1 Te malayat e ne timpu ka miglihad, impeyimeley e te Magbebaye ne Manama ka Israil puun te me kuntere dan ne nakalingut kandan. Te seeye ne timpu, buyag e amana si Huswi. 2 Ne impeumew ni Huswi ka langun ne me kabuhalan ni Israil, lagkes ka me igdatu, ka me pangulu, ka me talewukum, wey ka me upisyal. Ne ingkahiyan din sikandan, “Buyag ad amana kuntee. 3 Ne nakita niyu ka langun ne inggimu te Magbebaye ne Manama niyu te seini ne me nasud tenged kaniyu. Ne sikandin e ka migpakiggira te me kuntere niyu. 4 Ne nabaad-baad kud diye te kaniyu isip karatuan ne inggaat te me kabuhalan niyu ka langun ne inged te me nasud ne naahew ta, lagkes ka me nasud ne ware te pad naahew. Puun seeye te igsile te Hurdan peendiye te iglineb te Dahat ne Miditiranyu. 5 Ne egdeldelen te Magbebaye ne Manama niyu sikandan wey egpaaween eyew egsubalan niyu ka tane dan su sika ka insaad te Magbebaye kaniyu. 6 Purisu, pakannekal kew. Pakannekali niyu te egtuman ka langun ne nasulat te baseen te Balaud ni Muwisis. Tumana niyu ka langun ne nasulat kayi. 7 Kene kew saamul te me etew ne mig-ugpe duma kaniyu, kene kew dawit te me ngaran te me diyus-diyus dan, wey ke egpanaad naa ne eggamiten ka ngaran dan. Ne kene kew simba, wey ke pamakey naa kandan. 8 Ke kene, palunggaat kew ne matinumanen te Magbebaye ne Manama niyu, iling te inggimu niyu kuntee. 9 Ne indeldel te Magbebaye ne Manama ka derakel wey maresen ne me nasud te peglusud niyu kandan. Ne minsan kuntee, ware iya nakatalu kaniyu. 10  ✡ Diy 32:30; Diy 3:22.Ne minsan hentew kaniyu, egpakadeldel te sabeka ne libu (1,000) ne etew, tenged su ka Magbebaye ne Manama ka egpakiggira te me kuntere niyu sumale te insaad din kaniyu. 11 Purisu, geyinawei niyu iya ka Magbebaye ne Manama niyu. 12 Piru ke eg-inniyug kew kandin, wey ke egpakigsaamul kew naa te me etew ne mig-ugpe duma kaniyu, wey ke egpangasawa naa kandan, 13 egpakasihuru kew ne kenad iya egdeldelen te Magbebaye ne Manama niyu ka me etew ne mig-ugpe duma kaniyu. Ke kene, egkeyimu nasi sikandan ne egpakarereet kaniyu iling te balatik, wey ke sahilut naa, wey egpakamasakit sikandan te peka niyu iling te eglampesan, wey iling sikandan te duhi ne egpakasanggat te me mata niyu. Ne egpabulus seini taman te egkapatey kew kayi te meupiya ne inged ne imbehey kaniyu te Magbebaye ne Manama.

14 “Mahaan ad e egpatey. Tantanuri niyu layun ne intuman te Magbebaye ne Manama niyu ka langun ne meupiya ne insaad din kaniyu. Ne ware iya minsan sabeka ne ware din tumana. 15 Piru ke immenu te Magbebaye ne Manama te pegtuman ka langun ne meupiya ne insaad din kaniyu, iling ded degma ka pegtuman din te karereetan ne impaney-paney rin e kaniyu, taman te egdereetan kew e nikandin puun kayi te meupiya ne inged ne imbehey rin kaniyu. 16 Malehet iya ne egkatuman seini due te kaniyu ke egsupaken niyu ka kasabutan te Magbebaye ne Manama niyu ne igpatuman din kaniyu. Ne emun ke egsimba kew wey egpamakey te me diyus-diyus, igpasalerep kew iya nikandin te mangune-kune ne langet din, wey sahuhune ne egkareetan kew kayi te meupiya ne inged ne imbehey rin kaniyu.”