1 Ne inlibulung ni Huswi ka langun ne tribu te Israil diye te Sikim. Ne impeumew rin ka me igdatu, me pangulu, me talewukum, wey me upisyal te Israil. Ne migparani sikandan diye te tangkaan te Magbebaye ne Manama. 2  ✡ Hin 11:27.Ne ingkahiyan ni Huswi ka langun ne etew, “Seini ka ingkahi te Magbebaye ne Manama te Israil: Diye nangugpe dengan ka me kaap-apuan niyu te talipag te Weyig ne Iyupratis, wey migpamakey sikandan te me diyus-diyus. Ne sabeka kandan si Tira ne amey ni Abraham wey ni Nahur. 3  ✡ Hin 12:1-9; Hin 21:1-3.Piru ingkuwa ku si Abraham puun dutu ne inged wey impeendiye ku sikandin te inged ne Kanaan, wey impabuhal ku sikandin diye. Ne imbehayan ku sikandin te anak ne si Isaak. 4  ✡ Hin 25:24-26; Hin 36:8; Diy 2:5; Hin 46:1-7.Ne imbehayan ku degma si Isaak te anak ne si Hakub wey Isaw. Ne imbehey ku ki Isaw ka bubungan te Siir isip baad din. Piru nangendiye mule si Hakub wey ka me anak din te Ihiptu. 5  ✡ Iks 3:1–12:42.Nataman, impeuyan ku si Muwisis wey si Aarun ka egluwas kaniyu diye te Ihiptu. Ne impasalerep ku te legpad ka Ihiptu, wey impalihawang ku sikaniyu diye. 6  ✡ Iks 14:1-31.Te pegginguma te me kaap-apuan niyu diye te Malalab ne Dahat, intalukunan sikandan te me Ihiptuhanen ne migmangudde wey nangekarwahi. 7 Ne migpangananey sikandan keddi, wey intahuan ku te meitem ne gapun ka eletanan dan wey te me Ihiptuhanen. Nenaleplep e ka me Ihiptuhanen wey nalened e sikandan. Namelmelehan niyu ke nekey ka inggimu ku diye te me Ihiptuhanen wey naluhey kew ka nangugpe diye te disirtu.

8  ✡ Num 21:21-35.“Nataman, in-uyan ku sikaniyu diye te inged te me Amurihanen ne nangugpe diye te igsile te Hurdan. Ne migpakiggira sikandan kaniyu, piru impatalu ku sikandan kaniyu. Indereetan ku sikandan, wey in-angken niyud ka inged dan te peglusud niyu. 9  ✡ Num 22:1–24:25.Ne migpakig-ehet kaniyu si Balak ne Hari te Muwab ne anak ni Sipur, wey imparilus kew nikandin ki Balaam ne anak ni Biyur. 10 Piru ware ku tuhuti si Balaam ne eggimuwen din sika due te kaniyu, ke kene, impepanalanginan ku sikaniyu wey inluwas ku sikaniyu puun ki Balak. 11  ✡ Huswi 3:14-17; Huswi 6:1-21.Ne miglapas kew te Hurdan, wey nekeuma kew te Hiriku. Migpakiggira kaniyu ka me mahinged te Hiriku lagkes ka me Amurihanen, Pirisihanen, Kanaanen, Hitihanen, Girgasihanen, Hibihanen, wey Hibusihanen. Piru impatalu ku sikandan kaniyu. 12  ✡ Iks 23:28; Diy 7:20.Ne ingginaaldek* Te Hibruwanen: Migpeuyan a te patiyukan hun‑a kaniyu. ku ka daruwa ne Hari ne me Amurihanen eyew egkareldel niyu sikandan te peglusud niyu. Migpanalu kew ne kene ne pinaahi te kampilan wey pane niyu. 13  ✡ Diy 6:10-11.Imbehayan ku sikaniyu te inged ne kene ne sikaniyu ka nalasey. Impeugpe ku sikaniyu te me siyudad ne kene ne sikaniyu ka migpasasindeg. Nangeen kew kuntee te behas te paras wey te ulibu ne kene ne sikaniyu ka migpamula.”

14 Ne migkahi pad man‑e si Huswi, “Purisu kuntee, kaaldeki niyu ka Magbebaye ne Manama wey pamakaya niyu sikandin te intiru ne pusung niyu. Engkeri niyud kuntee ka me diyus-diyus te me kaap-apuan niyu ne insimba ran dengan diye te talipag te Weyig ne Iyupratis, wey diye te Ihiptu. Ne iyan niyu re pamakaya ka Magbebaye ne Manama. 15 Piru ke kene kew egkeupian ne egpamakey te Magbebaye ne Manama, alam kew kuntee ne aldew ke iyan niyu egpamakayen ka me diyus-diyus te me kaap-apuan niyu ne diye te talipag te Weyig ne Iyupratis wey ke ka me diyus-diyus naa te me Amurihanen ne kayi te in-ugpaan niyu kuntee? Piru sikeddi wey ka pamilya ku, iyan ney mule egpamakayen ka Magbebaye ne Manama.”

16 Ne migtabak ka me etew, “Ware te suman-suman ney ne eg-engked te Magbebaye ne Manama wey ke egpamakey naa te me diyus-diyus. 17 Su ka Magbebaye ne Manama ka migluwas kanta wey te me kaap-apuan ta te timpu ne neuripen ki diye te Ihiptu. Ne namelmelehan tad degma ka me kein-inuwan ne inggimu rin. Impangabangan ki nikandin te peggipanew ta wey te peglihad ta diye te duma ne me nasud. 18 Ne ka me Amurihanen ne nangugpe te seini ne inged, indeldel sikandan langun te Magbebaye te peglusud niyu kandan. Purisu, egpamakey key degma te Magbebaye su sikandin de iya ka Manama ta.”

19 Ne migkahiyan ni Huswi ka me etew, “Kene egkaayun ne egpamakey kew te Magbebaye ne Manama su matulus sikandin wey talikuren. Kene din egpasayluwen ka me mareet ne hinimuwan niyu wey ka me sale niyu. 20 Ne emun ke eg-inniyuhan niyu ka Magbebaye ne Manama wey egpamakey kew te me diyus-diyus, egkabelu sikandin kaniyu wey eglegparan kew nikandin. Egguleen kew nikandin minsan pad ke neyid‑u dengan sikandin kaniyu.”

21 Piru migtabak ka me etew, “Egpamakey key iya te Magbebaye ne Manama.” 22 Ne migkahi si Huswi, “Sikaniyu mismu ka me talagpamalehet te pegkeetew niyu ne egpamakey kew te Magbebaye ne Manama.”

Ne migtabak sikandan, “Uya, sikanami iya ka me talagpamalehet.”

23 Ne migkahi si Huswi, “Emun ke iling due, engkeri niyud ka me diyus-diyus niyu wey pamakey kew te Magbebaye ne Manama te Israil.”

24 Ne migtabak ka me etew, “Egpamakey key te Magbebaye ne Manama ney, wey egtumanen ney ka me suhu din.”

25 Purisu, te seeye ne aldew miggimu si Huswi te kasabutan diye te Sikim para te me keet-etawan te Israil. Ne imbehayan din sikandan te me balaud wey me suhu. 26 Insulat seini ni Huswi diye te Libru te Balaud te Manama. Nataman, migkuwa sikandin te dakel ne batu wey intahu din seini diye te lenged te uk ne kayu diye te matulus ne inged te Magbebaye ne Manama. 27 Ne ingkahiyan ni Huswi ka langun ne etew, “Egpakabulig kaniyu seini ne batu ne egkasuman-suman niyu ke nekey ka immanlalag ta kuntee. Kayid seini ne batu te pegnangen ku kaniyu te lalag te Magbebaye ne Manama. Purisu ka seini ne batu egpakabulig kaniyu ne egkasuman-suman niyu ke nekey ka neyitabu kuntee. Egpasuman-suman seini kaniyu eyew kene kew eg-inniyug te Manama.” 28 Nataman, impeuli e ni Huswi ka me etew diye te tagse inged dan isip karatuan ne inggaat kandan.

29 Nataman, napatey e ka suluhuanen te Magbebaye ne Manama ne si Huswi ne anak ni Nun, te sabeka ne gatus wey sapulu (110) ka idad din. 30  ✡ Huswi 19:49-50.Ne inlebeng dan sikandin diye te baad din ne inged diye te Timnat-Sira ne diye te bubungan te Ipraim, diye seini te igkahibang ne balabahan te bubungan te Gaas.

31 Migpamakey ka me kabuhalan ni Israil te Magbebaye ne Manama te neuyag pad si Huswi wey ka me igdatu te Israil ne nakataha te langun ne inggimu te Magbebaye para te Israil.

32  ✡ Hin 33:19; 50:24-25; Iks 13:19; Huw 4:5; Him 7:16.Egpakasungkiye pad ne guhud, ka tul‑an ni Husi ne in-uyan te me kabuhalan ni Israil puun te Ihiptu, diye dan ilebeng te Sikim. Diye dan seini ilebeng te inged ne nabeli ni Hakub te sabeka ne gatus (100) ne pelata diye te me anak ni Hamur ne amey ni Sikim. Ne iyan nakaangken kayi ne inged ka me kabuhalan ni Husi.

33 Ne migpatey e degma si Ilyasar ne anak ni Aarun, wey diye sikandin ilebeng te Gibiya, ka siyudad ne diye te bubungan te Ipraim ne imbehey rin te anak din ne si Pinihas.