1 Ne migkahiyan te Magbebaye ne Manama si Muwisis wey si Aarun, 2 “Kahii nu ka me kabuhalan ni Israil ne ka langun ne mananap kayi te tane, seini re ka egkaayun ne egkeenen: 3 Ka minsan nekey ne ayam ne naperi se sulu wey egsepe-sepe ke egkeen. 4-6 Piru kene niyu keena ka kamil, ka rabit, wey ke ambew naa. Keilangan ne eg-isipen niyu sika ne malindit su minsan ke egsepe-sepe sika ne egkeen piru ware naperi ka sulu. 7 Ne ka mahintalunan ne babuy minsan ke naperi ka sulu piru kene egsepe-sepe ke egkeen, sikan naa ka isipa niyu seini ne malindit. 8 Kene kew en iya keen te ngalap te sika ne me mananap wey minsan te pegsamsam naan de te nammatey ne me lawa ran. Isipa niyu sika ne malindit.

9 “Egkaayun ne egkeenen niyu ka langun ne me ngalap diye te dahat wey te weyig ne due piyapis wey engil. 10-12 Piru ka minsan nekey ne isda ne ware piyapis wey engil, kene niyu keena. Kene kew degma samsam te nammatey ne lawa ran wey isipa niyu ne malindit sika.

13-19 “Seini ka me manuk-manuk ne kene egkaayun ne egkeenen su in-isip ne malindit: me banug, me uwak, me manuk-manuk ne egkeen te napatey ne etew wey ke ayam naa, me dakel ne manuk-manuk ne ustrits, me ekang, me manuk-manuk ne egpandagmang te ngalap diye te weyig, bayaku ne egngaranan te bangkiyud, me tandungan ne bayaku, wey kalapenit.

20 “Ka langun ne me uled-uled ne due pakpak wey due hep‑at ne me paa, kene egkaayun ne egkeenen. Isipa niyu ne malindit sika. 21 Piru, due duma ne egkaayun ne egkeenen niyu, iling te me uled-uled ne due pakpak wey hep‑at se me paa ne due mule lelenguan diye te elat-elat te paa wey bubun eyew egpekeum-umbetut dan. 22 Ne seini ka me uled-uled ne eglayang wey egdul‑ug ne egkeenen niyu: me talangas, me tulung-tulung, dalen‑ug, wey palahe. 23 Piru ka duma pad ne me uled-uled ne due pakpak wey hep‑at se paa, isipa niyud ne malindit.

24-28 “Kene kew samsam te napatey ne ayam ne ware naperi se sulu wey kene egsepe ke egkeen. Kene kew man‑e samsam te napatey ne ayam ne hep‑at se paa ne due sulu ne igkalus. Isipa niyu sika ne malindit ne me ayam. Minsan hentew ne eggen-gen te napatey ne lawa, keilangan ne egpami‑pi te insaluub din, piru eg-isipen ded sikandin ne malindit taman te egkasagkup.

29-31 “Ne isipa niyu ne malindit ka me mananap ne egpananap iling te palabasan, me ambew, tuku, palees, buaya, ibid, ammahal wey ambekang.* Ka duma kayi ne me mananap mahirap ne eg-ileen, su ware kayi te kanta. Ka minsan hentew ne egsamsam te sika ne me mananap ke egpatey, eg-isipen ne malindit taman te egkasagkup. 32 Ne minsan nekey ne egkeuluhan te sika ne me mananap ke egpatey, eg-isipen degma ne malindit, minsan ka me kasangkapan ne kayu, kumbale, laplap te mananap, hinabel ne saku, wey ka minsan nekey ne kasangkapan. Keilangan ne ig-eled seini te weyig, piru eg-isipen ded man‑e ne malindit seini taman te egkasagkup. Pegkapenga due, eg-isipen e ne malinis wey egkahamit e man‑e. 33 Ne emun ke diye egkeulug te kuren ne tane ka lawa te napatey ne mananap ne egpananap, ka langun ne tahu kayi eg-isipen degma ne malindit, ne keilangan ne egpeseen e seini. 34 Ne ka minsan nekey ne egkakeen ne egkatihisan te weyig ne egpuun te sika ne kuren ne tane, eg-isipen ne malindit degma. Ne ka langun ne egkeinum ne weyig ne tahu te sika ne kuren ne tane, eg-isipen degma ne malindit. 35 Ne ka minsan nekey ne egkeuluhan te napatey ne mananap, eg-isipen ne malindit. Ke iyan egkeuluhan ka kuren wey ke sikan naa se hilutuanan, eg-isipen seini ne malindit wey keilangan ne egpeseen. 36 Piru ke iyan egkeuluhan ka belun wey ke sikan naa se inlimuran te weyig, kene sika eg-isipen ne malindit; piru ka minsan hentew ne eg-awe te napatey ne mananap, eg-isipen iya ne malindit. 37 Kene degma eg-isipen ne malindit ka minsan nekey ne beni ne egkeuluhan kayi. 38 Piru ke iyan egkeuluhan ka beni ne in-eled e te weyig, ka sika ne beni, eg-isipen e ne malindit.

39 “Ke egkapatey ka minsan nekey ne mananap ne egkakeen, eg-isipen ne malindit ka egpakasamsam kayi taman te egkasagkup. 40 Ne ka minsan hentew ne egkuwa wey ke egkeen naa kayi, keilangan ne egpi‑pian din ka insaluub din, piru eg-isipen ded sikandin ne malindit taman te egkasagkup.

41 “Kene niyu keena ka langun ne mananap ne egdul‑ug te tane, su in-isip ne malindit sika. 42 Kene kew man‑e keen te egdul‑ug wey ke egpananap naa ne mananap ne hep‑at se paa wey subla pad, su in-isip ne malindit sika. 43 Ne kene niyu linditi ka pegkeetew niyu. Keilangan ne kene kew egmalindit tenged te me mananap ne in-isip ne malindit. 44  ✡ Lib 19:2; 1Pid 1:16.Su sikeddi ka Magbebaye ne Manama niyu. Keilangan ne egmatulusen niyu ka pegkeetew niyu, su matulus e ma. Purisu kene niyu linditi ka pegkeetew niyu te minsan nekey ne mananap ne egdul‑ug te tane. 45 Su sikeddiey ka Magbebaye ka impaawe kaniyu puun te Ihiptu eyew egkeyimu a ne Manama niyu. Purisu matulusa niyu ka pegkeetew niyu, su matulus e ma.”

46 Sika ka me tulumanen meyitenged te me mananap wey me manuk-manuk wey te langun ne me mananap ne diye te weyig wey diye te tane, 47 eyew egkeila niyu ka in-isip ne malindit wey malinis, ka mananap ne egkaayun ne egkeenen wey ka kene egkaayun ne egkeenen.