1  ✡ Mat 11:10; Mar 1:2; Luk 1:76; 7:27.Ne migkahi ka Amana ne Maresen ne Magbebaye, “Igpewun‑a ku ka suluhuanen ku eyew eg-andam te dalan ne egbayaan ku. Ne ka Magbebaye ne Manama ne impamitew niyu, egtigkew eglepew diye te timplu rin. Ne egginguma ka talagpangguhud te kasabutan ku ne iyan seeye se igkeupii niyu.”

2  ✡ Huwil 2:11; Imp 6:17.Piru hentew‑a ka egpakaantus te aldew te pegginguma rin wey hentew‑a ka egpakasasindeg diye te tangkaan din ke eglepew rin e? Su egpekeiling sikandin te hapuy ne eglalab te putew wey iling te manedted ne sebbun ne amana egpakaawe te bilu. 3 Eglinisan din ka me kabuhalan ni Libi, iling te eglalab te bulawan wey ke pelata naa, eyew egkeyimu e ne likes ka igmanubad dan diye te Magbebaye ne Manama. 4 Purisu egpakapahale e te Magbebaye ne Manama ka igmanubad te me matig-Huda wey te me matig-Hirusalim, iling dengan te miglihad ne me leg‑un.

5 Ne migkahi ka Amana ne Maresen ne Magbebaye, “Eggenduen a te kaniyu eyew eggukuman ku ka egmammulingan, ka egmanlibug, ka me talagpamalehet te ubat, ka me ahalen ne egmanlimbung te me suluhuanen dan, ka egmanlupig te me balu, te me ilu, wey te me lapu. Ne eggukuman ku degma ka langun ne etew ne kene egkaaldek keddiey.”

6 “Sikeddiey ka Magbebaye ne Manama ne kene egkabalbalawan. Purisu sikaniyu se me kabuhalan ni Hakub, ware ded naamin nammatey. 7 Piru nekeiling kew red te me kaap-apuan niyu, mig-engked kew wey migsupak kew te me balaud ku. Ne kuntee libed kew e kayi te keddiey, wey eglibed a diye te kaniyu. Piru mig-inse kew, ‘Mania te egpaliberen key nikeykew te seini key man ded?’ 8 Eg-insaan ku sikaniyu, meupiya naa ne eglimbungan te etew ka Manama? Kene, piru inlimbungan a nikaniyu. Piru mig-inse kew, ‘Immenu ney sikeykew te eglimbung?’ Uya su kene ne eleg ka inhalad niyu keddi wey ware kew migbehey te igkasapulu! 9 Indilus ku sikaniyu tenged su ka intiru ne nasud migpanlimbung keddiey. 10  ✡ Lib 27:30; Num 18:21-24; Diy 12:6; 14:22-29; Nih 13:12.Na kuntee, uyana niyu ka langun ne igkasapulu diye te timplu* Te Hibruwanen: baley ne tinesanan. Due sinabeng ne tinesanan ne egtahuan te langun ne eg-uyanen diye te timplu. eyew due egkakeen diye te baley ku. El-elehi a nikaniyu wey egkatahaan niyu ne eglukatan ku ka me bintana te langit wey igbusbus ku due te kaniyu ka subla ne dakel ne panalangin. 11 Kene ku egparereetan te me uled-uled ka me pinamula niyu, wey egbebehas te masulug ka pinamula niyu ne paras. 12 Ne tenged due, ka keet-etawan te langun ne nasud egkahi te amana kew panalangini tenged su amana ne meupiya ka tane ne in-ugpaan niyu,” kahi te Amana ne Maresen ne Magbebaye.

13 Ne migkahi e man‑e ka Magbebaye ne Manama, “Migpanlalag kew te maddeet meyitenged keddi. Piru mig-inse kew pad iya man‑e, ‘Nekey bes ka maddeet ne impanlalag ney meyitenged keykew?’ 14 Migkahi kew, ‘Ware karuan te pegpamakey te Manama. Duen naa keupianan ke egtumanen ta ka me suhu din, wey igpapitew ta te Amana ne Maresen ne Magbebaye ne nekegsendit ki te neyimu ta? 15 Pitew kew! Iyan de impanalanginan ka me hambuhen. Nasi de iya sikandan migmatubung, wey in-el-elehan dan pad ka Magbebaye ne Manama pinaahi te mareet ne hinimuwan, piru ware sikandan paruseyi.’ ”

16 Nataman, migmalalahey ka me etew ne due pegkaaldek te Magbebaye ne Manama wey impammineg din sikandan paay-ayari. Ne nasulat te libru diye te tangkaan din ka me ngaran te me etew ne due pegkaaldek kandin wey migtahud kandin, eyew kene egkalingawan. 17 Ne migkahi ka Amana ne Maresen ne Magbebaye, “Egkeyimu sikandan ne keet-etawan ku. Te aldew ne eggukum ad, igteil ku sikandan se keet-etawan ku. Egpangabangan ku sikandan iling te amey ne egpangabang te anak din ne matinumanen† Te Hibruwanen: pamakey. kandin. 18 Ne egkakita niyud man‑e ne kene egpekeg-iling ka egpangkusan te miggimu te mareet wey ka miggimu te meupiya, ka migpamakey te Magbebaye ne Manama wey ka ware migpamakey kandin.”