1 “Ne seini ka me balaud wey me suhu ne keilangan ne egtumanen niyu diye te tane ne igbehey kaniyu te Magbebaye ne Manama, ka Manama te me kaap-apuan niyu, eyew egkaangken niyud te ware egtamanan. 2 Emun ke egkaahew niyud ka tane dan, keilangan ne egpangguhusen niyu egpatamtamani ka me simbaan dan te me manama ran—ka diye te me bubungan, me labuntud, wey ka diye te egdalungan te me kayu. 3  ✡ Diy 7:5.Panlundusa niyu ka me altar ne tutunganan dan te igpanubad, panlupeta niyu ka immeg-untud-untud dan ne me batu, panilabi niyu ka me sungkaleg ne larawan ni Asira, wey pamesaa niyu ka impangulit dan ne me larawan te me manama ran, eyew kenad egkasimba ka seeye ne me diyus-diyus diye te seeye ne me inged.

4 “Kene niyu simbaa ka Magbebaye ne Manama niyu iling te pegsimba ran te me manama ran. 5 Eg-alam ka Magbebaye ne Manama te sabeka ne inged puun te inged te sabeka te me kabuhalan niyu, eyew diye kew eglibulung langun ka egsimba kandin. 6 Ne diye niyu panguyana ka langun ne igmanubad niyu ne egtutungen, wey ka me duma ne ighalad niyu, me igkasapulu, me dasag, ka igsaad niyu ne ighalad diye te Magbebaye, wey ka me panganey te me ayam niyu. 7 Ne sikaniyu wey ka me pamilya niyu, egmangeen kew te ngalap te immanubad diye te inged ne egsimbaan niyu te Magbebaye ne Manama niyu duma te kahale, tenged te pegpalampus din kaniyu te langun ne inggimu niyu.

8 “Kene niyud ipabulus-bulus ke nekey ka inggimu niyu kuntee ne iyan ka pegtuman te igkeupii niyu, 9 su ware kew pad nekeuma diye te tane ne eg-ugpaan niyu ne ware samuk ne igbehey kaniyu te Magbebaye ne Manama. 10 Ke egpakalapas kew e te Weyig ne Hurdan, wey egpekeugpe kew e te tane ne igbehey kaniyu te Magbebaye ne Manama, eg-ugpe kew e diye ne malinawen, su kene ma egtuhutan te Magbebaye ne Manama ne egsamuken kew te langun ne kuntere niyu ne nakalingut kaniyu. 11 Eg-alam ka Magbebaye ne Manama te sabeka ne inged eyew diye niyu sikandin egsimbaa. Ne diye niyu panguyana ka igsuhu ku kaniyu: ka igmanubad niyu ne egtutungen, ka igmanghalad niyu, ka igkasapulu niyu, ka igmandasag niyu, wey ka langun ne insaad niyu ne ighalad diye te Magbebaye. 12 Ne gale-gale kew diye te tangkaan te Magbebaye ne Manama niyu duma te me anak niyu ne me lukes wey me malitan, me suluhuanen niyu ne me lukes wey me malitan, lagkes ka me Libita ne nangugpe diye te me lungsud niyu—sumsumana niyu ne ware ubag mule baad te me Libita. 13 Ne kene kew panubad te egtutungen diye te minsan hendei ne inged ne igkeupii niyu, 14 ke kene, diye de iya te inged ne eg-alamen te Magbebaye ne Manama puun te sabeka te me kabuhalan niyu. Ne diye niyu himuwa ka langun ne insuhu ku kaniyu.

15 “Piru egkaayun ded mule ne eglape kew wey egkeen te me ayam niyu minsan hendei. Egpakakeen kew taman te igkeupii niyu, iling te egmangekeen kew te ngalap te usa, sumale te igbehey kaniyu te Magbebaye ne Manama niyu. Egkaayun man‑e ne egkeen ka langun ne etew; in-isip ma ne malindit wey se malinis. 16  ✡ Hin 9:4; Lib 7:26-27; 17:10-14; 19:6; Diy 15:23.Piru kene kew keen te langesa; ulei niyu re seini diye te tane iling te weyig. 17 Ne kene egkaayun ne egkeenen niyu diye te me ugpaan niyu ka me halad niyu ne egkakeen, binu, wey ke mentika naa, panganey te me ayam niyu, wey ka insaad niyu ne ighalad, duma ne ighalad niyu, wey ka memeupiya ne igmandasag niyu; 18 diye niyu re seini keena te inged ne egsimbaan te Magbebaye ne Manama niyu, diye te inged ne eg-alamen din, duma te me anak niyu ne me lukes wey me malitan, me suluhuanen niyu ne me lukes wey me malitan, wey te me Libita ne nangugpe diye te me lungsud niyu. Gale-gale kew diye te tangkaan te Magbebaye ne Manama niyu tenged te langun ne inggimu niyu. 19 Ne keilangan ne kene niyu egbalaharen ka me Libita taheed te egmangugpe kew diye te tane niyu.

20 “Ne egpamaluahen e te Magbebaye ne Manama niyu ka tane niyu sumale te insaad din, wey egkakeen niyu ka langun ne ngalap ne igkeibeg niyu. 21 Ne emun ke mariyu te me ugpaan niyu ka inged ne eg-alamen te Magbebaye ne Manama niyu eyew egsimbaan niyu kandin, egkaayun ne diye kew re te me ugpaan niyu eglape te baka niyu wey ke karniru naa ne igbehey kaniyu te Magbebaye ne Manama. Ne sumale te insuhu ku kaniyu, egkaayun ne egkeen kew te me ayam taman te igkeupii niyu, 22 iling te egmangekeen kew te ngalap te usa. Egkaayun ne egkeen ka langun; in-isip ma ne malindit wey se malinis. 23  ✡ Lib 17:10-14.Piru kene kew keen te langesa su langesa ma ka egpuunan te umul; kene niyu ilagkes te egkeen duma te sapu ka umul. 24 Ke kene, ulei niyu re seini diye te tane iling te weyig. 25 Kene kew en iya keen te langesa eyew egmeupiya ka peg-ugpe niyu wey te me kabuhalan niyu, su meupiya diye te tangkaan te Magbebaye ka kene egkeen te langesa. 26 Piru keilangan iya ne eg-uyanen niyu diye te inged ne eg-alamen te Magbebaye ne Manama ka igmanubad wey me dasag ne insaad niyu para kandin. 27 Tutunga niyu diye te altar te Magbebaye ne Manama niyu ka langun ne egtutungen ne igpanubad. Ne ka langesa te duma ne igpanubad niyu, ulei niyu diye te altar, piru keena niyu mule ka sapu. 28 Tumana niyud iya ka langun ne suhu ne ingkahi ku kaniyu, eyew egmeupiya ka peg-ugpe niyu wey te me kabuhalan niyu te ware egtamanan, su meupiya wey eleg diye te tangkaan te Magbebaye ka pegtuman te langun ne suhu.”

29 Ne migpabulus-bulus si Muwisis ka migkahi te me kabuhalan ni Israil, “Emun ke egguleen e te Magbebaye ne Manama ka me nasud ne egpangendiyaan niyu, wey egkaddeldel niyud ka me mahinged diye wey sikaniyud ka egpangugpe te tane dan, 30 bantey kew ne kene kew egkasaligkat pinaahi te peg-ikul niyu te pegsimba ran. Kene kew panginginse ke immenu ran te egsimba ka me manama ran eyew eg-ilingen niyu degma ka pegsimba niyu. 31 Kene niyu simbaa ka Magbebaye ne Manama niyu iling te pegsimba ran te me manama ran, su ka paahi te pegsimba ran, inggimu ran ka langun ne igkeepes te Magbebaye. Ne impanutung dan pad iya man‑e ka me anak dan isip egtutungen ne igpanubad diye te me manama ran.

32  ✡ Diy 4:2; Imp 22:18-19.“Tumana niyud iya te mapahetpet ka langun ne suhu ne ingkahi ku kaniyu. Kene niyud seini timuli wey ke egsalinan naa.”