7
Ka peglungku wey pegpangananey
1 Ne migkahi si Mikiyas,
“Mekeyid‑u-hid‑u a!
Su egpekeiling a te egkaayu-ayu ne etew ne mig-iman-iman ne egpakapakilalew te prutas,
migpamitew te nenasame ne pungpung te paras eyew egkeenen, wey ke an-anayan naa ne neyinuhan ne iggira,
piru warad iya.
2 Warad etew ne matinumanen te Manama kayi te ampew te tane
wey warad matareng ne etew ne nasame.
Egmanggepas e ka minsan hentew eyew egpakiggira te duma;
eg-andam e te igsahilut te suled din ka tagse sabeka.
3 Ne mangngateu iya sikandan ne eggimu te mareet.
Egbuyu ka me pangulu ran wey ka me talaggukum dan te me bayad eyew igbunbun te mareet.
Sikan naa, ka mabantug ne me etew, egpangguhud te maddeet ne igkeupii ran,
wey egmekegtuleduwey iya sikandan.
4 Minsan seeye se in-isip ne amana ne matareng kandan, egpekeiling ded te ware karuan iling te balunseri,
wey seeye se kene amana ne mareet in-isip de ne ware karuan du te duhiyen ne alad.
“Miggingume e ka aldew te peglegpad te me talagtameng dan.
Ne kuntee egkengalibeg e sikandan.
5 Kene kew palintutuu te sumbaley niyu, wey kene kew salig te alukuy niyu.
Bantey kew te iglalag niyu* Te Hibruwanen: Bantayi nu ka me gumawan te be‑be nu. te asawa niyu.† Te Hibruwanen: diye te kandin ne mig-ukembe te kumeng nu.
6 ✡ Mat 10:35-36; Luk 12:53.Ne iyan ded egkakuntere te etew ka diye mismu te baley rin.
Su ka anak ne lukes, eglemet te amey rin,
ka anak ne malitan, egsukul te iney rin,
wey ka ambey, egsukul te anuhang din ne malitan.
7 “Piru sikeddi, egsalig‡ Te Hibruwanen: egtengteng. a mule te Magbebaye ne Manama,
egtetahad a te Manama ne iyan manluluwas ku.
Egpamminehen a te Manama ku.”
Ka pegluwas te Magbebaye ne Manama
8 “Kene ka kahale, kuntere ku,
su egsasindeg e red ke napeled a.
Minsan diya a nakatahu§ Te Hibruwanen: nakapinnuu. te marusilem,
piru ka Magbebaye ka kalayag ku.
9 Eg-antusen ku ka langet te Magbebaye keddi su nakasale e ma iya kandin.
Piru eg-iman-iman e re due ne egbulihan a nikandin keureme,
wey egbehayan a te eleg ne peggukum tenged te mareet ne neneyimu keddi te me kuntere ku.
Igpalihawang a nikandin peendiye te malayag,
wey egkaneem-neem ku red ka pegkamatareng din.
10 Ne egkakita seini te kuntere ku
wey egkeyilawan seeye se migkahi,
‘Na, hendei naan e ka Magbebaye ne Manama nu?’
Ne kuntee egkiteen kud sikandin ne egkatalu wey egdi-diekan
iling te basak diye te deralanen.
11 “Egginguma ka aldew ne eg-abayan e man‑e te eggimu ka alad te siyudad niyu,
wey egkatimulan e ka kaluag te inged niyu.
12 Te sikan ded ne aldew, egmangendiye kaniyu ka me etew ne egpuun te nalein-lein ne inged,
ka egpuun te Asirya, te Ihiptu,
wey minsan ka egpuun diye te Weyig ne Iyupratis,
wey ka egpuun te karagdahatan wey kabubunganan te minsan hendei.
13 Piru egkeyimu ne disirtu ka kaluahan te kalibutan
tenged te nangugpe ne mareet se hinimuwan.”
Ka himenew te Manama te Israil
14 “Magbebaye, bantayi nu ka keet-etawan nu ne in-angken nu,
iling te pegbantey te talagtameng te karniru.
Nakasuwey-suwey sikandan mig-ugpe diye te tane ne malised ne egbasuken* Te Hibruwanen: mig-ugpe diye te puwalas. piru nalingutan sikandan te meupiya ne tane.
Pakeena nu sikandan diye te Basan wey te Gilyad, iling te dengan ne timpu.
15 “Ne migtabak ka Magbebaye ne Manama,
‘Igpapitew ku kaniyu ka me kein-inuwan,
iling te inggimu ku te timpu ne impalihawang ku sikaniyu ka naddakep dengan diye te Ihiptu.’
16 Egkakita seini te me nasud,
egkeyilawan sikandan tenged su egkaawe ka langun ne karesen dan.
Egsagpengan dan naan de ka be‑be dan te me belad dan
wey hendue te kenad sikandan egmandineg ka egkatanengan.
17 Egpandile naan de sikandan te alinepung iling te uled,
wey iling te me ayam ne egpananap te tane.
Egpangelkelen sikandan ka egmanlihawang puun te me siyudad dan ne in-alad te matikang wey makepal ne batu,
wey eglibed sikandan diye te Magbebaye ta duma te pegkaaldek,
wey egkaaldek sikandan ka egparani kandin.
18 “Ware duma ne manama ne egpekeiling keykew,
ne egpakapasaylu te me sale te nenasame ne keet-etawan nu
wey eglingew te sale te pinalangge din.
Kene ka tetahu te langet nu te ware egtamanan,
su igkeupii nu ne igpapitew ka geyinawa nu ne kene egkabalbalawan.
19 Igkeyid‑u key e man‑e nikeykew.
Igdegpak nud e ka langun ne sale ney,
egpekeiling seini te egdi-diekan nu wey igdegpak nud diye te pused te dahat.
20 Ipapitew nu ne egtumanen nu ka me saad nu diye te me kabuhalan ni Hakub,
wey ka geyinawa nu ne kene egkabalbalawan diye te kabuhalan ni Abraham,
iling te insaad nu diye te kaap-apuan ney puun pad dengan.”