Nahum
Igpewun‑a
Ka seini ne baseen, insulatan te guhuren meyitenged te karereetan te Ninibi, ka iney ne siyudad te Asirya ne kuntere dengan te Israil. Nasulat seini te me elat-elat te 663 wey 612 ne leg‑un te ware pad neetew ka Kristu. Nahale si prupita Nahum te nareetan e ka Ninibi, su sika ka palinneu ne eglegparan iya te Magbebaye ne Manama ka me makasesale. Minsan ka me etew, migpalintutuu degma ne inlegparan te Manama ka Ninibi su mabbulut ma wey me hambuhen ka me mahinged te sika ne siyudad.
Ka nenasulat te seini ne baseen
Ka peglegpad te Magbebaye te Ninibi 1:1-15
Ka pegkahuhus te Ninibi 2:1–3:19
1
1 ✡ Isa 10:5-34; 14:24-27; Sup 2:13-15.Seini ka lalag te Magbebaye ne Manama meyitenged te Ninibi; impanengneng din seini ki prupita Nahum ne matig-Ilkus.
Ka pegkabelu te Manama te matig-Ninibi
2 Talikuren ka Magbebaye ne Manama
wey mahaan sikandin egsuli te me kuntere din,
wey kene sikandin egpeeneng-eneng ka egpakig-ehet kandan.
Subla sikandin ne lelangeten
wey mahaan egsuli kandan.
3 Malehet iya ne kene ne uupulen ka Magbebaye,
piru amana ne maresen sikandin
wey egpanlegparan din iya ka me makasesale.
Egpangalamag ke eglihad sikandin wey egbebalisusu,
wey ka me gapun ne egdiekan din, egpekeiling de te alinepung.
4 Egsaparan din ka dahat wey egkeetiyan e;
eg-etiyan din ka langun ne weyig.
Egkengallanes ka me pinamula diye te Basan wey diye bubungan te Karmil,
wey egkengallanes degma ka me bulak diye te Libanun.
5 Egkawelwel ka me bubungan ke eglepew sikandin,
wey egkallunew ka me labuntud.
Egkawelwel ka kalibutan,
wey egpangelkelen e te liyas ka langun ne nangugpe te inged.
6 Hentew ka kene egkamenu ke egkalangetan e sikandin?
Ware iya egkeuyag ke egpangebel-ebel e ka langet din.
Egpekeiling te hapuy ne egkanlabkanlab ka langet din,
wey egkengallupet ka me batu diye te tangkaan din.
7 Meupiya ka Magbebaye ne Manama;
sikandin ka maresen ne aputanan te timpu te keyirapan,
wey egtangguwen* Te Hibruwanen: neila. din seeye se eg-aput kandin.
8 Egpekeiling sikandin te mangune-kune ne baggiyu
ne eggule te langun ne egkuntere kandin,
wey egpanlupuhen din ka me kuntere din taman te egkareetan† Te Hibruwanen: peendiye te marusilem. sikandan.
9 Purisu ke eglelalis sikandan ne egdereet te Magbebaye,
egbalabahan din iya sika eyew kene egpakabulus,
wey kenad egkaabayan pad man‑e ka samuk.
10 Minsan iling sikandan te nekeglambid ne sapinit, wey iling te etew ne egkewubug,
egdereetan ded iya sikandan iling te nahangu ne lahami ne egsilaban.
11 Due migpuun te keykew, Ninibi, ka etew ne egpanambag te ware karuan,
wey eglelalis ne egdereet te Magbebaye.
12 Seini ka inlalag te Magbebaye,
“Minsan ke maresen wey masulug sikandan,
egguleen ku iya sikandan egpangimatayi.
Minsan impeyirapan ku ka keet-etawan ku,
piru kene kud e sikandan eg-abayan pad egpeyirapi.
13 Su igpaawe kud sikaniyu te me matig-Asirya ne mig-uripen kaniyu,‡ Te Hibruwanen: eggepuen ku ka yuggu rin kaniyu.
eyew duen e kaligwangan niyu.”
14 Seini ka inlalag te Magbebaye ne Manama diye te me matig-Asirya:
“Egkaawaan kew e te me kabuhalan ne iyan perem eg-uyan te ngaran niyu.
Egdereetan ku ka immangimu niyu ne me larawan ne intahu niyu diye te me panubaran niyu.
Eg-andamen kud e ka eglebengan kaniyu
su likes kew ne eggimatayan.”
15 ✡ Isa 52:7.Tengteng kew! Diye migpammubung te me bubungan
ka insuhu ne egpepangguhuren te meupiya ne panugtulen ne duen e keupianan niyu!
Hilutu kew te me sahakeen niyu me matig-Huda,
wey tumana niyu ka insaad niyu.
Kenad egpakalusud kaniyu ka maddeet ne me etew,
su naamin-amin e sikandan nahule.
✡1:1 Isa 10:5-34; 14:24-27; Sup 2:13-15.
*1:7 Te Hibruwanen: neila.
†1:8 Te Hibruwanen: peendiye te marusilem.
‡1:13 Te Hibruwanen: eggepuen ku ka yuggu rin kaniyu.