2
Ka pegkahuhus te Ninibi
1 Me matig-Ninibi,
eglusuran kew e te me kuntere niyu ne egmegsuwey-suwey kaniyu.
Tamengi niyu ka me alad niyu, wey bantayi niyu ka me dalan!
Pangandam kew te gira!
Libulunga niyud ka langun ne sundalu* Te Hibruwanen: kanekal. niyu.
2 Su iglibed ded te Magbebaye ne Manama ka kabantug ni Hakub ne kabantug te Israil,
minsan ke indereetan niyud sikandan iling te paras ne indereetan ka me sugpang.
3 Mallalab ka me kalasag te me kuntere niyu ne me sundalu,
wey mallalab degma ka insaluub dan.
Egpangilak-ilak ka me karwahi ran ke egkapane te layag te aldew,
wey egkengaana-ane en iya ne egligkat ka me kudde dan.† Te Hibruwanen: inwelewes dan ka me deldeg dan ne inggimu puun te kayu ne sipri.
4 Miglakiris de ka me karwahi ran diye te deralanen;
egmanaltalibeng sikandan diye te me plasa.
Egpamalusiksik ka me karwahi ran iling te sulu,
wey memeiyal sikandan ne egmanweil-weil iling te kilat.
5 Impeumew te Hari ka me pangulu te me sundalu
wey nenakarugsu sikandan ka eg-iyal-iyal.
Migsegseg sikandan diye te alad ne batu ne matikang wey makepal,
wey intangen dan ka ig-akeb te alad eyew kene egkabutbutan te me kuntere ka alad dan.
6 Egkengallukatan ka gumawan ne in-elet te weyig,
wey egkalened ka palasyu niyu.
7 Ingkerew e ne egdakepen kew,‡ Te Hibruwanen: nateil e ne egluungan. Migkahi ka duma ne iyan igpasabut kayi ka Rayna te Ninibi wey ke ngaran naa te diyus-diyus ne si Istar.
wey eg-uyanen diye te mariyu.
Egmandeg-uy ka me suluhuanen ne me malitan,
wey egmandabiyen dan ka me kumeng dan te eglungku.
Egmanlungku sikandan iling te me selepati.
8 Egpamallahuy ka me mahinged te Ninibi,
iling te linew ne egkaluwangan.
Ne egmanguleyi ka me duma ran ne egsapad kandan,
“Sanggel kew! Libed kew kayi!”
Piru kenad iya sikandan egmanlinga-linga.
9 Pangahawa niyu ka me pelata,
wey pangua niyu ka me bulawan diye te Ninibi!
Napenu te karatuan ka sika ne inged,
wey susuluhi ka mahal ne me kasangkapan dan.
10 Nahuhus e ka Ninibi
wey in-engkeran e seini.
Nenaaldek ka me mahinged;
migmahuye ka me lawa ran,
wey nangelkel ka me buel ran,
wey migmemakalawag e sikandan!
11 Hendei naan e ka Ninibi ne nekeiling te sulung ne ugpaan te me liyun;
ka inged ne egpekeiling te pakeenanan te me anak te liyun?
Hendei naan e ka siyudad ne nekeiling te dugmun te me liyun,
wey warad iya egpakabangkew kandan?
12 Egpamindasen te liyun ka dinawi rin,
wey igpangatul rin te me anak din wey te me beyan.
Eggipenuen din ka sulung te dinawi rin,
wey egsekel ka dugmun din te me sapu ne impamindas-bindas din.
13 Ne migkahi ka Amana ne Maresen ne Magbebaye, “Pammineg kew matig-Ninibi! Egpakig-ehet a kaniyu! Egpanilaban ku ka me karwahi niyu, wey egpamatey ka me sundalu diye te gira.§ Te Hibruwanen: eg-abelengen te kampilan ka anak nu ne me liyun. Egkuen ku ka langun ne karatuan ne in-ahew niyu diye te duma.* Te Hibruwanen: egtamperen ku ka indawi niyu puun te kalibutan. Kene kew e egpakasuhu te me suluhuanen niyu eyew egginalat wey egbanasal te duma ne me nasud.”† Te Hibruwanen: kenad egkarineg ka laheng te me talagpangguhud niyu.
*2:1 Te Hibruwanen: kanekal.
†2:3 Te Hibruwanen: inwelewes dan ka me deldeg dan ne inggimu puun te kayu ne sipri.
‡2:7 Te Hibruwanen: nateil e ne egluungan. Migkahi ka duma ne iyan igpasabut kayi ka Rayna te Ninibi wey ke ngaran naa te diyus-diyus ne si Istar.
§2:13 Te Hibruwanen: eg-abelengen te kampilan ka anak nu ne me liyun.
*2:13 Te Hibruwanen: egtamperen ku ka indawi niyu puun te kalibutan.
†2:13 Te Hibruwanen: kenad egkarineg ka laheng te me talagpangguhud niyu.