1 Ne ingkahiyan te Magbebaye ne Manama si Muwisis, 2 “Himu ka te daruwa ne trumpita ne indekdek ne pelata eyew eggamiten nu te pegpangumew te keet-etawan te peglibulung, wey pegpeyipanew kandan. 3 Ke egpegdenganen te egparahing ka daruwa ne trumpita, eglibulung ka keet-etawan due te tangkaan nu, diye te gumawan te Balungbalung ne Temuwanan. 4 Piru ke sabeka re ne trumpita ka egparahingen, ka me pangulu re te tagse tribu ka eglibulung due te tangkaan nu. 5 Ne emun ke egparahingen nu ka trumpita te pegpanengneng, egpangipanew e ka me tribu ne nangekampu diye te marani te Balungbalung ne Temuwanan, dapit te igsile. 6 Ne emun ke egparahingen nu ka trumpita te igkarangeb ne pegpanengneng, egpangipanew e degma ka me tribu ne nangekampu diye te igkakawanan ne balabahan. Ka sika ne pegparahing, iyan pegpanengneng ne eggipanew sikandan. 7 Ne emun ke egpalibulungen nu ka keet-etawan, parahinga nu ka trumpita piru lein ne pegparahing. 8 Ne iyan egparahing te me trumpita ka me talagpanubad ne me anak ni Aarun. Sika ka me tulumanen ne keilangan ne eg-ikulen niyu wey te me kabuhalan niyu te langun ne timpu.

9 “Ne emun ke diye kew e te tane niyu, wey te timpu ne egpakiggira kew te me kuntere ne egmanlusud kaniyu, parahinga niyu ka seini ne me trumpita eyew egkasuman-suman ku sikaniyu. Ne sikeddi se Magbebaye ne Manama, egluwasen ku sikaniyu. 10 Ne emun man‑e ke egmanggale-gale kew te pegsahakeen te Pegbunsud te Bulan, wey te duma pad ne me pegsahakeen, parahinga niyu man‑e ka me trumpita lenged te igmandasag niyu, wey te igmanubad niyu ne egtutungen para te keupianan. Sika ka egpakabulig kaniyu ne egkasuman-suman niyu ka Manama niyu. Sikeddi ka Magbebaye ne Manama niyu.”

11 Te igkararuwa ne pulu (20) ne aldew te igkarangeb ne bulan te igkarangeb ne leg‑un puun te peg-awe te keet-etawan te Israil diye te Ihiptu, migparibabew e ka gapun puun te Matulus ne Balungbalung ne In-alad. 12 Ne nangipanew e ka me kabuhalan ni Israil puun te disirtu, diye te Sinay. Ne diye migsanggel ka gapun te disirtu, diye te Paran.

13 Seeye ka an-anayan ne timpu ne miggipanew sikandan sumale te suhu te Magbebaye ki Muwisis. 14 Ne ka hun‑a ne punduk ne miggipanew ne mig-uyan te bendila dan, iyan ka punduk te me kabuhalan ni Huda. Ne ka egpangulu te me kabuhalan ni Huda, iyan si Naasun ne anak ni Aminadab. 15 Ne ka egpangulu te me kabuhalan ni Isakar, iyan si Natanail ne anak ni Suar. 16 Ne ka egpangulu te me kabuhalan ni Sabulun, iyan si Iliyab ne anak ni Hilun.

17 Te neimpusan e te egtines ka Matulus ne Balungbalung, intitiang e seini te me kabuhalan ni Girsun wey ni Mirari, wey migsinundul sikandan nangipanew.

18 Ne ka migsinundul ne miggipanew ne mig-uyan te bendila dan, iyan ka punduk te me kabuhalan ni Rubin. Ne ka egpangulu te me kabuhalan ni Rubin, iyan si Ilisur ne anak ni Sidiyur. 19 Ne ka egpangulu te me kabuhalan ni Simyun, iyan si Silumil ne anak ni Surisaday. 20 Ne ka egpangulu te me kabuhalan ni Gad, iyan si Iliyasap ne anak ni Diyuwil.

21 Ne ka migsinundul ne miggipanew iyan ka me kabuhalan ni Kuhat ne mig-uyan te matulus ne me kasangkapan. Te ware pad sikandan nekeuma diye te seup ne egkekampuwan dan, nakapasasindeg e ka Matulus ne Balungbalung ne In-alad.

22 Ne ka migsinundul ne miggipanew ne mig-uyan te bendila dan, iyan ka punduk te me kabuhalan ni Ipraim. Ne ka egpangulu te me kabuhalan ni Ipraim, iyan si Ilisama ne anak ni Amihud. 23 Ne ka egpangulu te me kabuhalan ni Manasis, iyan si Gamalil ne anak ni Pidasur. 24 Ne ka egpangulu te me kabuhalan ni Binhamin, iyan si Abidan ne anak ni Gidyuni.

25 Ne ka kinamewuriyan ne miggipanew ne mig-uyan te bendila dan, iyan ka punduk te me kabuhalan ni Dan. Sikandan ka egbantey diye te keinniyuhan te langun ne punduk. Ne ka pangulu ran, iyan si Ahisir ne anak ni Amisaday. 26 Ne ka egpangulu te me kabuhalan ni Asir, iyan si Pagil ne anak ni Ukran. 27 Ne ka egpangulu te me kabuhalan ni Naptali, iyan si Ahira ne anak ni Inan. 28 Iling due ka pegkateil te me punduk te me tribu te Israil te timpu ne egpangipanew sikandan.

29 Ne ingkahiyan ni Muwisis ka uyang din ne si Hubab ne anak te anuhang din ne si Hitru ne matig-Midiyan, “Egpeendiye key e te Inged ne Insaad te Magbebaye ne Manama ne igbehey rin kanami. Duma ka kanami, su eg-ay-ayaran ney ma sikeykew su migsaad ma ka Magbebaye ne egmatubungen din ka Israil.”

30 Piru migtabak si Hubab ki Muwisis, “Kena a egduma. Eg-uli ad e diye te inged ku wey te me karumaan ku.”

31 Piru ingkahiyan sikandin ni Muwisis, “Kene key ubag engkeri su sikeykew ma ka nakataha ke hendei ka meupiya ne egkekampuwan ney diye te disirtu. Sikeykew ka egpanulu kanami. 32 Ne emun ke egduma ka kanami, egbaaran ney degma sikeykew te langun ne panalangin ne igbehey kanami te Magbebaye.”

33 Purisu nangawe e sikandan puun te bubungan te Magbebaye wey nangipanew e te tatelu ne aldew. Ne layun dan igpewun‑a ka Tahuanan te Kasabutan eyew egpamitew te inged ne egkeyimelayan dan. 34 Ne egparibabew kandan ka gapun te Magbebaye te tagse aldew ne eggipanew sikandan.

35  ✡ Sal 68:1.Te tagse timpu ne eg-uyanen ka Tahuanan te Kasabutan, egkahi si Muwisis, “Sasindeg kad Magbebaye wey megsusuwaya nu ka me kuntere nu; egmakapallahuy perem ka langun ne eg-ehet keykew.” 36 Ne emun ke igsabuk e man‑e ka Tahuanan te Kasabutan, egkahi e man‑e si Muwisis, “Libed kad Magbebaye kayi te linibu ne kabuhalan ni Israil.”