1 Ne migpakiglalag ka Magbebaye ne Manama ki Muwisis diye te disirtu, diye te Sinay, te an-anayan ne bulan te igkarangeb ne leg‑un puun te peg-awe te me kabuhalan ni Israil te Ihiptu. 2 Migkahi ka Magbebaye, “Kahii nu ka me kabuhalan ni Israil: ‘Keilangan ne egsahakeen kew te Peglihad te Panalihan, te intahahe ne timpu. 3 Keilangan ne egsahakeen kew te Peglihad te Panalihan te timpu te marusilem te igkasapulu wey hep‑at (14) ne aldew te seini ne bulan. Ikula niyu ay-ayari ka langun ne tulumanen wey me suhu meyitenged te sahakeen.’ ” 4 Purisu ingkahiyan ni Muwisis ka me kabuhalan ni Israil ne keilangan ne egsahakeen sikandan te Peglihad te Panalihan. 5 Ne migsahakeen sikandan te timpu te marusilem te igkasapulu wey hep‑at (14) ne aldew te seeye ne bulan diye te disirtu, diye te Sinay. Intuman te me kabuhalan ni Israil ka langun ne insuhu te Magbebaye kandan pinaahi ki Muwisis.

6 Piru due me etew ne nalinditan tenged te nakasamsam te minatey, purisu, ware sikandan nakaapil te Pegsahakeen te Peglihad te Panalihan te seeye ne aldew. Nangendiye sikandan engki Muwisis wey Aarun 7 wey migkahi sikandan, “Nalinditan* Eg-isipen te me kabuhalan ni Israil ne malindit ka etew ne egpakasamsam te minsan nekey ne in-isip ne malindit. key su nakasamsam key te minatey. Piru mania te ware key paapila te duma ne me kabuhalan ni Israil te peghalad te me dasag para te Magbebaye te intahahe ne timpu?”

8 Ne ingkahiyan sikandan ni Muwisis, “Tahad kew pa taman te egkanengnengan ku ke nekey ka igsuhu te Magbebaye keddi meyitenged kaniyu.”

9 Ne ingkahiyan te Magbebaye si Muwisis, 10 “Kahii nu ka me kabuhalan ni Israil: Emun ke nalinditan kew wey ke ka me kabuhalan niyu naa tenged te nakasamsam te minatey, wey ke diye naa te mariyu ne hipanawan, egkaayun kew red ne egsahakeen te Peglihad te Panalihan. 11 Piru himuwa niyu seini te timpu te marusilem te igkasapulu wey hep‑at (14) ne aldew te igkarangeb ne bulan. Keena niyu ka ighalad niyu ne nati te karniru duma te me mapeit ne gulay, wey te me paan ne ware patulin. 12  ✡ Iks 12:46; Huw 19:36.Ne keilangan ne ware egsameen niyu taman te egkapawe, wey keilangan ne ware minsan sabeka ne tul‑an te karniru ne egkahepu. Te pegsahakeen niyu, keilangan ne eg-ikulen niyu eg-ay-ayari ka me balaud te pegsahakeen. 13 Piru ke ware kew mule nallinditi wey ke ware kew naa miggipanew diye te mariyu, piru ware kew mig-apil te Pegsahakeen te Peglihad te Panalihan, eg-isipen kew e ne kenad ne kabuhalan pad ni Israil, su ware kew ma mighalad para keddi te intahahe ne timpu. Eg-antus kew tenged te sale niyu.

14 “Ne emun ke due me lapu ne egkeupian ne eg-apil te Pegsahakeen te Peglihad te Panalihan, keilangan ne eg-ikulen dan ka langun ne balaud wey me suhu te pegsahakeen. Nekeg-iling de ka me tulumanen para kaniyu wey te me lapu.”

15-16 Te aldew ne nakapasasindeg e ka Matulus ne Balungbalung ne In-alad, nabunbunan seini te gapun puun te egkasagkup taman te egkapawe. Te marusilem, egpekeiling seini te hapuy ne egtengtengan. 17 Emun ke egparibabew e ka gapun, egmangalaglag e degma ka me kabuhalan ni Israil, wey ke hendei seini egsanggel, diye degma sikandan egkekampu. 18 Purisu eggipanew ka me kabuhalan ni Israil wey egkekampu sumale te suhu te Magbebaye ne Manama; kene sikandan egpangipanew ke diye pad ka gapun te ampew te Matulus ne Balungbalung ne In-alad. 19 Ne kene iya sikandan eggipanew minsan egkaluhey ne egsanggel ka gapun diye te dibabew te Matulus ne Balungbalung ne In-alad. Intuman dan iya ka suhu te Manama. 20 Ne due me timpu ne egsanggel ka gapun te pila re ne aldew diye dibabew te Matulus ne Balungbalung ne In-alad, purisu kene degma egkaluhey ka me kabuhalan ni Israil ne eg-uugpe. Ne eggipanew e man‑e sikandan sumale te suhu te Manama. 21 Ne due degma me timpu ne egsanggel re ka gapun diye te dibabew te Balungbalung ne Temuwanan puun te egkasagkup taman te egkapawe, wey egpabulus e man‑e sikandan te peggipanew ran ke egparibabew e man‑e ka gapun. Ne minsan maaldew wey ke marusilem naa ne egparibabew ka gapun, eggipanew degma sikandan. 22 Ne minsan pad ke egkararuan wey ke senge-bulan naa wey ke senge-leg‑un naa ne egsanggel ka gapun diye te dibabew te Matulus ne Balungbalung ne In-alad, kene iya eggipanew ka me kabuhalan ni Israil. Piru ke egparibabew e seini, human pad man‑e sikandan eggipanew. 23 Purisu egkekampu wey egpangipanew ka me kabuhalan ni Israil sumale te suhu te Magbebaye pinaahi ki Muwisis.