1  ✡ Hud 11.Sabeka ne aldew, migsukul ki Muwisis si Kura, ka lukes ne anak ni Isar ne anak ni Kuhat ne anak ni Libi. Duma rin te migsukul ka me sakup te me kabuhalan ni Rubin ne ensi Datan wey si Abiram ne me anak ni Iliyab, wey si Un ne anak ni Pilit. 2 Migsukul sikandan ki Muwisis duma te 250 ne me lukes ne neila ne me pangulu te me kabuhalan ni Israil. 3 Migsabeka sikandan wey ingkahiyan dan si Muwisis wey si Aarun, “Suble e seini se inggimu niyu kanami! Mania te igpalabew-labew niyu ka pegkeetew niyu te langun ne keet-etawan te Magbebaye ne Manama, te in-alam ma degma te Manama ka keet-etawan, wey migduma sikandin kandan?”

4 Te pegkarineg ni Muwisis kayi, miglangkeb sikandin diye te tane wey mig-ampu diye te Magbebaye. 5 Ne ingkahiyan din si Kura wey ka langun ne duma ne migsukul kandin, “Kaaselem te maselem, igpapitew te Magbebaye ke hentew ka kandin wey hentew ka matulus. Ne egpeparaniyen din diye te tangkaan din ka etew ne eg-alamen din. 6 Purisu seini himuwa niyu kaaselem: kuwa kew te tahuanan te insinsu, 7 wey tahui niyu seini te hapuy wey insinsu diye te tangkaan te Magbebaye. Ne ka etew ne eg-alamen te Magbebaye, iyan eg-isipen ne matulus. Sikaniyu se me kabuhalan ni Libi ka migsuble e.”

8 Ne migpabulus-bulus pad man‑e si Muwisis ka migkahi ki Kura, “Pammineg kew kayi me kabuhalan ni Libi! 9 Kene bes naan pad ne eleg para kaniyu ne sikaniyu ka in-alam te Magbebaye puun te langun ne kabuhalan ni Israil, eyew egpakaparani kew kandin pinaahi te pegtrabahu diye te Matulus ne Balungbalung, wey egpakabulig te keet-etawan? 10 In-alam kew nikandin wey ka langun ne karumaan niyu ne me kabuhalan ni Libi eyew egpakaparani kew diye te tangkaan din. Ne kuntee, eg-awes kew pad iya man‑e ne egkeyimu ne me talagpanubad? 11 Hentew kun bes naa ubag si Aarun ne insagsahukulan niyu? Iyan niyu insagsahukulan ka Magbebaye.”

12 Ne impeumew ni Muwisis si Datan wey si Abiram ne me anak ni Iliyab. Piru migkahi re iya sikandan, “Kene key eggendue! 13 Kene bes naan pad ne eleg ka pegpalihawang nu kanami puun te Ihiptu ne meupiya ne tane ne dakel se eg-uma,* Te Hibruwanen: tane ne egtulayasan te gatas wey teneb. eyew egpatey key kayi te disirtu? Ne kuntee, egpalabew-labew ke pad iya man‑e kanami? 14 Ne timul pad, ware key nikeykew uyana diye te meupiya ne tane wey dakel se eg-uma wey ke impamehayan key naa nikeykew te egkapanunud ne me kamet wey me parasan. Ne kuntee, eglimbungan key pad iya man‑e nikeykew?† Te Hibruwanen: egpamuturan nu pad iya man‑e ka keet-etawan? Kene key eggendue!”

15 Ne nalanglangetan si Muwisis wey ingkahiyan din ka Magbebaye, “Kene nu pandawata ka ighalad dan. Ware ingkuwa ku ne minsan sabeka ne asnu puun kandan, wey ware minsan sabeka kandan ne impasakitan ku.”

16 Ne ingkahiyan ni Muwisis si Kura, “Hendiye ka kaaselem te tangkaan te Magbebaye diye te Balungbalung ne Temuwanan, duma te langun ne me duma nu, wey eggendiye degma si Aarun. 17 Ne ka tagse sabeka te 250 ne me duma niyu, keilangan ne eg-uyan te tahuanan te insinsu, wey keilangan ne egtahuan dan seini te insinsu wey ighalad dan diye te Magbebaye. Ne sikeykew degma wey si Aarun, uyan kew degma te tahuanan te insinsu.” 18 Purisu migkuwa te tahuanan te insinsu ka tagse sabeka, wey intahuan dan seini te hapuy wey insinsu, wey migmanasindeg sikandan duma ki Muwisis wey ki Aarun diye te gumawan te Balungbalung ne Temuwanan. 19 Te nalibulung e ni Kura ka langun ne me duma rin te migsukul ki Muwisis wey ki Aarun, sahuhune ne migpapitew te langun ne miglibulung ka sisil-awi ne katelesan te Magbebaye diye te Balungbalung ne Temuwanan. 20 Ne ingkahiyan te Magbebaye si Muwisis wey si Aarun, 21 “Pariyu kew puun te seini ne me etew su eglegparan ku sikandan te senge-pele-pele de.”

22 Piru migmanlangkeb ensi Muwisis wey si Aarun wey migkahi, “He Manama, ka Manama ne migbehey te umul te langun ne etew, egkabelu ke bes naa te langun te sabeka man de ne etew ka nakasale?” 23 Ne ingkahiyan te Magbebaye si Muwisis, 24 “Kahii nu ka keet-etawan ne nalibulung te egpepariyuen te me balungbalung enni Kura, ni Datan, wey ni Abiram.”

25 Ne inggendiyaan ni Muwisis si Datan wey si Abiram, wey migmanduma kandin ka me pangulu te Israil. 26 Ne ingkahiyan din ka keet-etawan, “Pariyu kew te me balungbalung te seini se me etew ne maddeet, wey kene kew samsam te minsan nekey ne kandan, su kema ke igpakalagkes kew te eglegpad tenged te me sale dan.” 27 Purisu migpariyu e ka keet-etawan puun te me balungbalung enni Kura, ni Datan, wey ni Abiram. Ne miglihawang si Datan wey si Abiram puun te me balungbalung dan wey migmanasindeg diye te gumawan duma te me asawa wey me anak dan.

28 Ne ingkahiyan ni Muwisis ka me kabuhalan ni Israil, “Te seini ne paahi, egkanengnengan niyu ne ka Magbebaye ka migsuhu keddi te seini ne me himu wey kene ne keddi ne pegbuut. 29 Ke egpatey ka seini ne me etew te iling ded te kamatayen te langun, migpasabut naa ne wara a suhua te Magbebaye. 30 Piru ke eggimu ka Magbebaye te kein-inuwan wey egbekabeka ka tane wey egkengeulug sikandan langun, wey egmemakalebeng e sikandan ne neuyag pad duma te langun ne kandan, egkanengnengan niyu ne migsukul te Magbebaye ka seini ne me etew.”

31 Te nekeimpus de iya si Muwisis ka miglalag, sahuhune ne migbekabeka ka tane ne immanasindehan enni Datan wey ni Abiram, 32 wey impangameluk sikandan wey ka me pamilya ran lagkes si Kura wey ka me etew ne duma rin wey ka langun ne kasangkapan dan. 33 Nekeendiye sikandan ne mannekal te inged te me minatey duma te langun ne karatuan dan. Ne nekegtiem e man‑e ka tane wey naawe e sikandan puun te me kabuhalan ni Israil. 34 Ne namallahuy ka langun ne kabuhalan ni Israil ne nakalingut ne nakarineg te kuleyian dan, su suman-suman te me kabuhalan ni Israil ne kema ke eg-ameluken degma sikandan te tane.

35 Ne migpeuyan ka Magbebaye te hapuy ne nakasilab te 250 ne me etew ne mighalad te insinsu.

36 Ne ingkahiyan te Magbebaye si Muwisis, 37 “Kahii nu si Iliyasar, ka anak te talagpanubad ne si Aarun te igpakuwa ka me tahuanan te insinsu puun te hapuy su me matulus seini ne tahuanan, wey ipawahey nu ka baha. 38 Migmatulus ka me tahuanan te insinsu te peghalad kayi te seeye se nenakasale ne nammatey diye te tangkaan te altar te Magbebaye. Purisu iparekdek nu seini taman te egmanipis wey itel-eb nu seini te altar. Egkeyimu seini ne tuus te pegpaney-paney te me kabuhalan ni Israil.” 39 Purisu impanguwa ni Iliyasar ne talagpanubad ka me burunsi ne tahuanan te insinsu ne inhalad te seeye se me etew ne impanilaban. Ne impandekdek din e seini wey inggimu ne tel-eb te altar. 40 Neyimu seini ne tuus te pegpaney-paney te me kabuhalan ni Israil, eyew ware minsan hentew ne kene ne kabuhalan ni Aarun ne egpakarani-rani te altar eyew egtutung te insinsu, su kema ke egpekeiling sikandin ki Kura wey te me duma rin.

41 Piru te seup ne aldew, migmanagsahukul e man‑e ka me kabuhalan ni Israil ki Muwisis wey ki Aarun te migkahi, “Impangimatayan niyu ka me etew te Magbebaye ne Manama.” 42 Ne taheed te nalibulung ka me kabuhalan ni Israil wey nasabeka ka migsagsahukul ki Muwisis wey ki Aarun, migtangke sikandan te Balungbalung ne Temuwanan, wey nakita ran ne nabukusan seini te gapun, wey miglepew ka katelesan te Magbebaye. 43 Ne migparani si Muwisis wey si Aarun diye te gumawan te Balungbalung ne Temuwanan. 44 Ne ingkahiyan te Magbebaye si Muwisis, 45 “Pariyu kew te seini ne me etew su eg-aminen ku sikandan te egpangimatey te senge-pele-pele de.”

Piru migmanlangkeb sikandan se daruwa 46 wey ingkahiyan ni Muwisis si Aarun, “Kua nu ka tahuanan nu te insinsu wey tahui nu seini te hapuy puun te altar wey tahui nu man‑e seini te insinsu. Ne dagdahawi nu seini uyana diye te me kabuhalan ni Israil wey panubad-tubad ka diye te Magbebaye eyew te peglinis te me sale dan. Nalanglangetan ka Magbebaye wey migbunsud e ka karereetan.” 47 Ne intuman ni Aarun ka insuhu ni Muwisis, wey migpallahuy sikandin diye te taliware te me kabuhalan ni Israil su migbunsud man e ka karereetan. Ne migtutung si Aarun te insinsu eyew egpasayluwen te Magbebaye ka me kabuhalan ni Israil te me sale dan. 48 Ne migsasindeg si Aarun diye te taliware te nammatey wey ware nammatey, wey migpeeneng-eneng e ka karereetan. 49 Piru 14,700 e ka migpatey ware labet te seeye se migpatey ne me duma ni Kura. 50 Te migpeeneng-eneng e ka karereetan, miglibed e man‑e si Aarun diye te ki Muwisis ne diye te gumawan te Balungbalung ne Temuwanan.