1 Ne ingkahiyan te Magbebaye ne Manama si Muwisis, 2 “Kahii nu ka me kabuhalan ni Israil: Emun ke egginguma kew e diye te tane ne igbehey ku kaniyu eyew eg-ugpaan niyu, 3 panubad kew diye te Magbebaye te egtutungen ne igpanubad puun te me karniru niyu wey ke me baka naa. Igpanubad sika ne egtutungen, eyew te pegtuman te panaad wey ke me dasag naa para te Magbebaye, wey ke para naa te me sahakeen. Ne ka lansi te sika ne igpanubad ka igkeemuti te Magbebaye. 4-5 Ne emun ke egpanubad kew te nati te karniru isip egtutungen ne igpanubad para te Magbebaye, keilangan degma ne egpatapikan sika te sabeka ne kilu te meupiya ne klasi te harina ne linuyang te senge-litru ne mentika, wey egpatapikan man‑e te binu ne senge-litru wey liware, isip halad ne egkeinum. 6 Emun ke lukesan ne karniru ka igpanubad niyu, patapiki niyu sika te hep‑at ne kilu te meupiya ne klasi te harina ne linuyang te senge-litru wey liware ne mentika. 7 Ne patapiki niyu man‑e sika te binu ne senge-litru wey liware isip pegpahale te Magbebaye. 8 Ne emun ke egpanubad kew te turu ne baka diye te Magbebaye eyew te pegtuman te panaad wey ke igpanubad naa para te keupianan, 9 keilangan degma ne egpatapikan niyu sika te hen‑em ne kilu te meupiya ne klasi te harina ne linuyang te daruwa ne litru ne mentika. 10 Ne patapiki niyu man‑e sika te daruwa ne litru ne binu isip pegpahale te Magbebaye.

11 “Sika ka eggimuwen niyu te tagse turu ne baka, wey ke lukesan naa ne karniru ne buyag e, wey ke lukesan naa ne karniru ne nati pad, wey ke kambing naa. 12 Himuwa niyu sika te tagse sabeka te ayam minsan pad ke pila ne buuk ka igpanubad niyu. 13 Ne ka langun ne diye neetew te Israil wey diye migtulin ne egpanubad te egtutungen isip meemut ne egpakapahale te Magbebaye, keilangan ne eg-ikul te sika langun ne me balaud. 14 Ne emun ke due lapu ne migtaheed de mig-ugpe due te kaniyu wey ke kenad naa eg-awe ne egkeupian degma ne egpanubad te egtutungen isip pegpahale te Magbebaye, keilangan ne eg-ikul sikandin te sika ne me balaud. 15 Sikaniyu se me kabuhalan ni Israil wey ka me lapu, nenekeg-iling kew re te pegtengteng ku, wey nekeg-iling de ka me balaud ne eg-ikulen niyu. Me balaud seini ne ware egtamanan ne keilangan ne eg-ikulen niyu wey te mewuri ne egkabuwad ne me kabuhalan niyu. 16 Ka sika ne me balaud wey me suhu, keilangan ne egtumanen niyu wey te me lapu ne mig-ugpe due te kaniyu.”

17 Ne ingkahiyan e man‑e te Magbebaye ne Manama si Muwisis, 18 “Kahii nu ka me kabuhalan ni Israil: ‘Emun ke egpekeuma kew e diye te tane ne igbehey ku kaniyu, 19 kaayun ne egkeen kew te me pinamula diye. Piru keilangan ne egteil kew te ighalad niyu te Magbebaye. 20 Halad kew te an-anayan ne paan ne inggimu puun te linuyang niyu ne harina iling te peghalad niyu te trigu puun te diekanan. 21 Halad kew diye te Magbebaye ne Manama puun te an-anayan ne linuyang niyu ne harina. Iling due ka eggimuwen te langun ne kabuhalan niyu.

22 “ ‘Piru panunggiling ke ware niyu tuyui ne nakasupak kew te sabeka te seini ne me suhu ne imbehey ku kaniyu pinaahi ki Muwisis, 23 wey ke nakasupak degma ka me kabuhalan niyu te ware dan tuyui, 24 wey ke ware minsan sabeka ne nakanengneng kayi, keilangan ne eg-uyan ka langun ne keet-etawan te sabeka ne nati ne turu ne baka isip egtutungen ne igpanubad, wey ka lansi due ka igkeemuti te Magbebaye. Ne egpatapikan seini te binu wey harina. Ne eg-uyan man‑e sikandan te lukesan ne kambing isip igpalangesa ne ig-awe te sale. 25 Ne ka talagpanubad ka egpalangesa eyew ig-awe te sale te langun ne keet-etawan. Egpasayluwen ku sikandan su ware dan ma tuyui ne nakasupak, wey mig-uyan pad man‑e sikandan te igpanubad ne egtutungen. 26 Egpasayluwen ku ka langun ne kabuhalan ni Israil lagkes ka me lapu ne migmanlemung su narahabas ma ka langun te sale ne ware tuyui.

27 “ ‘Piru ke sabeka re ne etew ka nakasale te ware tuyui, keilangan ne eg-uyan sikandin te sabeka ne beyan ne nati ne kambing ne sabeka pad ne leg‑un se kabuyahi isip panubad ne ig-awe te sale. 28 Ne ka talagpanubad ka egpalangesa diye te tangkaan te Magbebaye ne Manama, eyew te peg-awe te sale te etew ne nakasale te ware tuyui, wey egpasayluwen sikandin. 29 Nekeg-iling de ka tulumanen para te nenakasale ne ware tuyui—me kabuhalan ma ni Israil wey se me lapu. 30 Piru ka minsan hentew ne egpakasale te intuyuan, kabuhalan ma ni Israil wey se lapu ne egbaley-baley keddi, ka sika ne etew kenad e eg-isipen ne duma niyu pad, 31 su insamsamilian din ma ka lalag ku wey insupak din ka suhu ku. Kenad e sikandin eg-isipen ne duma niyu pad. Sikandin ded ka egpuunan te peg-antus din tenged te sale din.’ ”

32 Taheed te diye pad ka me kabuhalan ni Israil te disirtu, nakakita sikandan te etew ne migpangayu te Aldew te Peggimeley. 33 Ne in-uuyan sikandin te me etew ne nakakita kandin diye te engki Muwisis wey ki Aarun wey te langun ne kabuhalan ni Israil. 34 Ne imprisu ran sikandin su ware ma sikandan nakataha ke nekey ka eleg ne eggimuwen dan diye te kandin. 35 Ne ingkahiyan te Magbebaye ne Manama si Muwisis, “Keilangan ne eggimatayan ka sika ne etew! Ipabatu nu sikandin te keet-etawan diye te lihawangan te kampu.” 36 Purisu in-uuyan e sikandin te keet-etawan diye te lihawangan te kampu wey imbebatu e taman te migpatey, sumale te insuhu te Magbebaye.

37 Ne insuhu te Magbebaye si Muwisis ne egpakahiyan ka me kabuhalan ni Israil, 38 “Himuwi niyu te me palungpung ka me sidsid te me kumbale niyu wey panahui niyu te malugtem ne bula-bula ka tagse palungpung. Sika ka eggimuwen te langun ne kabuhalan niyu. 39 Ka sika ne me palungpung ka egpasuman-suman kaniyu te langun ne suhu te Magbebaye eyew egtumanen niyu. Ne tenged kayi, kene ne iyan niyu egtumanen ka igkeupii niyu ne eggimuwen, wey ka igkengeeyami niyu ne iyan egpakapanulu kaniyu ne egmasinupaken. 40 Pinaahi te sika ne me palungpung, egpakasuman-suman kew te pegtuman te langun ne suhu te Magbebaye wey egmatulus kew e diye te Manama niyu. 41 Sikeddi ka Magbebaye niyu, ne migpalihawang kaniyu puun te Ihiptu eyew egkeyimu ne Manama niyu. Sikeddi iya ka Magbebaye, ne Manama niyu.”