1 Ne nataman, nangipanew e man‑e ka me kabuhalan ni Israil, wey diyad man‑e sikandan nangekampu te kanapnapuan te Muwab, te ilis te Weyig ne Hurdan ne egkatalipag te Hiriku. 2 Te pegkanengnengi te Hari te Muwab ne si Balak ne anak ni Sipur, te langun ne inggimu te me kabuhalan ni Israil diye te me Amurihanen, wey te kasulug te me kabuhalan ni Israil, 3 amana sikandin naaldek wey ka langun ne Muwabihanen. 4 Ne ingkahiyan te me Muwabihanen ka me igbuyag te Midiyan, “Eg-aminen iya te seini ne keet-etawan ka langun ne nakalingut kanta—iling sikandan te baka ne eg-amin egpanabtab te me sagbet diye te kamet.”

Purisu te seeye ne timpu, ka anak ni Sipur ne si Balak ne Hari te Muwab 5  ✡ Num 31:8; 2Pid 2:15-16; Hud 11.migsuhu te me upisyal ne egpeendiyeen ki Balaam ne anak ni Biyur ne diye mig-ugpe te Pitur ne marani te Weyig ne Iyupratis te inged te Amaw. Ne seini ka igpakahi ni Balak ki Balaam, “Due keet-etawan ne namuun te Ihiptu, wey nekeempet sikandan te intiru ne tane wey nangugpe e kayi te marani ku. 6 Hendini ke naa kuntee, wey dilusa nu sikandan su madmaresen sikandan keddi. Kema ke egkatalu wey egkaddeldel ku red sikandan puun te inged ku. Nakanengneng a nahud ne ka minsan hentew ne egpanalanginan nu, egkapanalanginan iya, wey ka minsan hentew ne egdilusen nu, egkarilus iya.”

7 Purisu miggipanew e ka me igbuyag te Muwab wey Midiyan ne nanguyan te igbayad dan ki Balaam te egdilus te me kabuhalan ni Israil. Nangendiye sikandan ki Balaam wey ingguhuran dan e sikandin te igpalalag ni Balak diye te kandin. 8 Ne ingkahiyan sikandan ni Balaam, “Hirehe kew pa kayi, wey egguhuran ku re sikaniyu ke nekey ka iglalag keddi te Magbebaye ne Manama.” Purisu miggirehe pad diye ki Balaam ka me pangulu te Muwab.

9 Ne mig-inse ka Manama ki Balaam, “Hentew bes ne me etew seini se me duma nu?”

10 Ne migtabak si Balaam, “Insuhu sikandan te Hari te Muwab ne si Balak ne anak ni Sipur eyew te pegkahi keddi te seini ne lalag, 11 ‘Due keet-etawan ne namuun te Ihiptu, wey nekeempet sikandan te intiru ne tane. Ne hendini ke naa kuntee wey dilusa nu sikandan su kema ke egkatalu wey egkaddeldel ku red sikandan puun te inged ku.’ ” 12 Ne ingkahiyan te Manama si Balaam, “Kene ka duma kandan wey kene nu dilusa ka seeye ne keet-etawan su impanalanginan kud sikandan.”

13 Purisu te peggimata ni Balaam te maselem, ingkahiyan din e ka me pangulu ni Balak te, “Uli kew e diye te tane niyu, su wara a tuhuti te Manama ne egduma kaniyu.” 14 Purisu mig-enew e ka me pangulu te Muwab wey migmanlibed e diye ki Balak, wey ingkahiyan dan e sikandin, “Migbalibad si Balaam ne egduma kanami.”

15 Ne migsuhu e man‑e si Balak te me pangulu ne masmasulug wey subla pad ne me talahuren du te hun‑a ne impanuhu din. 16 Te pegginguma ran diye ki Balaam, ingkahiyan dan e sikandin, “Migkahi si Balak ne anak ni Sipur te, ‘Kene nu tuhuti ne egkabalabahan ka te minsan nekey te peggendini nu te keddi, 17 su egdasahan ku iya sikeykew, wey eggimuwen ku ka minsan nekey ne igkahi nu keddi. Purisu hendini ka wey dilusa nu seini ne me etew.’ ”

18 Piru migtabak si Balaam te me sinuhu ni Balak, “Minsan pad igbehey ni Balak keddi ka baley rin ne napenu te me pelata wey bulawan, kene ku iya egsupaken ka suhu te Manama, ne Manama ku. 19 Piru hirehe kew pa kayi kuntee te marusilem, iling te me duma niyu, su kema ke duen pad iglalag keddi te Manama.”

20 Te pegkamarusilem, ingkahiyan te Manama si Balaam, “Emun ke iyan dan innendini ka eg-angey keykew, duma ka kandan, piru keilangan ne iyan nu re eggimuwen ka igpeyimu ku keykew.” 21 Purisu te pegkamaselem, mig-enew si Balaam wey insakangan din e ka asnu rin, wey migdume e sikandin te me igbuyag te Muwab.

22 Piru nabelu amana ka Manama te migduma si Balaam. Purisu migsasindeg ka panalihan te Manama diye te dalan eyew te pegbalabag kandin te mig-untud te asnu duma te daruwa ne suluhuanen din. 23 Ne nakita te asnu ka panalihan te Manama ne miggen-gen te kampilan ne migsasindeg diye te dalan. Purisu migsuwey ka asnu wey migpeendiyad e te kamet. Ne inlampesan ni Balaam ka asnu eyew eglibed diye te dalan. 24 Ne migsasindeg ka panalihan te Manama diye te malig-et ne dalan taliware te me batu ne alad te daruwa ne parasan. 25 Te pegkakita te asnu te panalihan te Manama, migsahilid e seini diye te alad ne batu wey nalipit ka paa ni Balaam. Purisu inlampesan e man‑e ni Balaam ka asnu. 26 Ne miggalin e man‑e ka panalihan te Manama diye te kewun‑aan, wey diyad migsasindeg te lilig-eti ne dalan ne ware egkasuwayan diye te igkakawanan wey ke igkahibang naa. 27 Te pegkakita te asnu te panalihan te Manama, migbuluku naan de seini ne neunturan ni Balaam. Ne nanasnasian naan pad iya ka langet ni Balaam, wey inlampesan din e man‑e te tuked din ka asnu. 28 Ne impalalag te Manama ka asnu wey mig-inse ki Balaam, “Nekey bes ka neyimu ku? Mania te inlampesan a nikeykew te katatelu?”

29 Ne migtabak si Balaam, “Uya su in-ung-ungelan a nikeykew. Ke duen pa perem kampilan ku kayi, eggimatayan ku iya mule sikeykew.”

30 Ne ingkahiyan te asnu si Balaam, “Kene bes naa ne sikeddi ka asnu nu ne layun nu eg-un-unturi puun pad dengan taman kuntee? Neyimu ku naa dengan seini keykew?”

Ne migtabak si Balaam, “Ware.”

31 Ne intuhutan te Manama ne egkiteen ni Balaam ka panalihan ne miggehen-gen te kampilan ne migsasindeg diye te taliware te dalan. Purisu miglangkeb si Balaam te tane. 32 Ne ingkahiyan sikandin te panalihan te Manama, “Mania te inlampesan nu te katatelu ka asnu nu? Seini a eyew te pegbalabag keykew, su mareet ka seini ne hipanew nu. 33 Katatelu nakakita keddi ka asnu, wey katatelu sikandin mig-alihu keddi. Ke ware pad sikandin mig-alihu keddi, inggimatayan kud perem sikeykew kuntee, piru eg-uyahen ku mule ka asnu nu.”

34 Ne in-angken ni Balaam ne nakasale sikandin diye te panalihan te Manama te migkahi, “Nakasala a su wara a nahud nakataha te migsasindeg ke bes due te taliware te dalan eyew te pegbalabag keddi. Sikan naa, ke mareet ma diye te keykew seini se hipanew ku, eglibed ad e nasi.”

35 Ne migtabak ki Balaam ka panalihan te Manama, “Duma ka te me etew, piru iyan nu re ilalag ka igpalalag ku keykew.” Purisu migduma red si Balaam te me pangulu ni Balak.

36 Te pegkanengnengi ni Balak te eggingume e si Balaam, insinug-ung din e sikandin diye te sabeka te me lungsud te Muwab, ne marani te Weyig ne Arnun, ne pulipusan te eletanan te tane din. 37 Ne ingkahiyan ni Balak si Balaam, “Mania te ware ka miggendini te an-anayan ne pegpeumew ku keykew? Kahiyen nu buwa ne kene ku sikeykew egdasahan?”

38 Ne migtabak si Balaam ki Balak, “Miggendini ad e te keykew, piru kena a egkaayun ne eglalag te minsan nekey. Iyan ku re iglalag ka igpalalag keddi te Manama.” 39 Ne migdume e si Balaam ki Balak diye te lungsud te Husut. 40 Ne migpanubad si Balak te turu ne me baka wey me karniru diye. Ne impamehayan din te ngalap si Balaam wey ka me pangulu ne mig-angey kandin. 41 Te pegkapawe, indume e ni Balak si Balaam diye te Bamut-Baal, wey nakita rin diye te marani ka keet-etawan te Israil.